ក្រុមហ៊ុនអាកាសចរណ៍ជប៉ុន Japan Airlines បានសម្រេចបញ្ជាទិញយន្តហោះ ចំនួន ៤២ គ្រឿង ពីក្រុមហ៊ុនធំៗ ចំនួនពីរ គឺ Airbus របស់អឺរ៉ុប និង Boeing របស់អាមេរិក។

ក្រុមហ៊ុន Japan Airlines ឲ្យដឹងកាលពីថ្ងៃព្រហស្បតិ៍ថា ការបញ្ជាទិញនេះ គឺជាផ្នែកមួយ នៃការជំរុញកំណើនប្រតិបត្តិការហោះហើរ ក្នុងស្រុក និងអន្តរជាតិ។

Japan Airlines បញ្ជាក់ទៀតថា ខ្លួនបានទិញ Boeing 787-9 ១០គ្រឿង និង Airbus A350-900 ចំនួន ២១គ្រឿង និង A321neo ចំនួន ១១គ្រឿង។

យ៉ាងណាមិញ អ្នកនាំពាក្យក្រុមហ៊ុនបានបដិសេធ មិនធ្វើអត្ថាធិប្បាយ លើព័ត៌មានលម្អិត អំពីហិរញ្ញវត្ថុនៃការបញ្ជាទិញ នៅពេលដែល AFP ទាក់ទងទៅ កាលពីថ្ងៃព្រហស្បតិ៍។

ប៉ុន្តែ សេចក្តីថ្លែងការណ៍ ដាច់ដោយឡែកមួយ បានបង្ហាញពីបញ្ជីតម្លៃ «កាតាឡុក» នៃយន្តហោះមានតម្លៃសរុបជិត១៣ពាន់លានដុល្លារសម្រាប់យន្តហោះ៤២គ្រឿងនេះ៕
ប្រភពពី AFP ប្រែសម្រួល៖ សារ៉ាត