សៀមរាប៖ ឆ្លងតាមការហ្វឹកហ្វឺនរៀនសូត្រអស់រយៈពេល៤៥ថ្ងៃរួចមក របស់នាយទាហាន ពលទាហាន កងវរសេនាតូចលេខ១ តំបន់ប្រតិបត្តិការសឹករងសៀមរាប ចំណុះយោធភូមិភាគទី៤ ប្រចាំឆ្នាំ២០១៩ ប្រកបដោយភាពរលូន និងទទួលបានលទ្ធផលជាផ្លែផ្កាដូចគោលបំណងដែលបានគ្រោងទុកនៅទីបញ្ជាការវរៈសេនាតូចការពារព្រំដែនលេខ៤០៨ អូរកូនតឹង ស្ថិតនៅភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប ត្រូវបានធ្វើពិធីបិទក្រោមអធិបតីភាពរបស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ឯកឧត្តម ឧត្តមសេនីយ៍ទោ ស៊ុន គឹមថៃ មេបញ្ជាការរង តំណាង ឯកឧត្តម មេបញ្ជាការយោធភូមិភាគទី៤ កាលពីព្រឹកថ្ងៃទី០៦ ខែកក្កដា ឆ្នាំ២០១៩នេះ ដោយមានការអញ្ជើញចូលរួមពីសំណាក់លោកជាមេបញ្ជាការ មេបញ្ជាការរងប្រចាំទិស នាយ នាយរងស្ថាប័នការិយាល័យ និងមេបញ្ជាការបណ្ដាកងឯកភាពចំណុះទីបញ្ជាតំបន់ប្រតិបត្តិការសឹករងសៀមរាប ព្រមទាំងអស់លោកជាយោធាចារ្យ កម្មការីសិក្សា អាជ្ញាធរដែនដី និងសមត្ថកិច្ចចូលរួមផងដែរ។
មានប្រសាសន៏នៅក្នុងឳកាសនោះ ឯកឧត្តម ទៀ សីហា ក៏បានថ្លែងនូវការកោតសរសើរចំពោះការយកចិត្តខ្ពស់ ការបង្ហាត់ហ្វឹកហ្វឺនរបស់គ្រូយោធាចារ្យ នៃតំបន់ប្រតិបត្តិការសឹករងសៀមរាបដល់កម្មសិក្សាការី ជានាយទាហាន ពលទាហាន វរៈសេនាតូចការពារព្រំដែនលេខ៤០៨ ឲ្យកាន់តែយល់អំពីច្បាប់កងយោធពលខេមរភូមិន្ទលើការកំណែទម្រង់បួនយ៉ាងរបស់រាជរដ្ឋាភិបាលកម្ពុជា សំដៅរួមចំណែកការកាត់បន្ថយភាពក្រីក្ររបស់ប្រជាជន។
ឯកឧត្តម បានគូសបញ្ជាក់ថា វគ្គហ្វឹកហ្វឺនពង្រឹងនាយទាហាន នាយទាហានរង និងពលទាហាន វរៈសេនាតូចការពារព្រំដែនលេខ៤០៨ នៃតំបន់ប្រតិបត្តិការសឹករងសៀមរាប ដើម្បីជាការបង្កើនសមត្ថភាពដល់កម្លាំងកងយោធពលខេមរភូមិន្ទ ក្នុងការត្រៀមលក្ខណៈការពារអធិបតេយ្យភាពដែនដី នៃព្រះរាជាណាចក្រកម្ពុជា មិនឲ្យសត្រូវណាឈ្លានពានបានឡើយ។ វគ្គហ្វឹកហ្វឺននេះក៏ជាការឆ្លើយតបទៅនឹងវិស័យអភិវឌ្ឍន៍ការងារ កងទ័ព ដែលតម្រូវឲ្យមានការយកចិត្តទុកដាក់ និងជាទុនក្នុងការកសាងប្រភពធនធានមនុស្សរបស់កងខេមរភូមិន្ទ។
ឯកឧត្តម ឧត្តមសេនីយ៍ទោ ស៊ុន គឹមថៃ ក៏បានសង្កត់ធ្ងន់ចំពោះការអនុវត្តឲ្យបានខ្ជាប់ខ្ជួន និងគាំទ្រនូវអនុសាសន៍ចតុកោណរបស់រាជរដ្ឋាភិបាល ព្រមទាំងមានការអត់ធ្មត់ ដោយឈរលើការគោរពនូវបទបញ្ញត្តិទាំង០៨ របស់កងយោធពលខេមរភូមិន្ទ ដោយមានការទំនាក់ទំនងល្អរវាងគ្នានឹងគ្នានៅតាមព្រំដែន ក្នុងការបន្តការគ្រប់គ្រងទាំងវិស័យយោធា និងសេដ្ឋកិច្ច ក្នុងការបញ្ចៀសនូវជម្លោះរវាងប្រទេសទាំងពីរ ។
ឯកឧត្តម ក៏បានផ្ដាំផ្ញើដល់សិក្ខាកាមទាំងអស់ ត្រូវយកចិត្តទុកដាក់គោរពអង្គការវិន័យសណ្ដាប់ធ្នាប់ គឺត្រូវនាំគ្នាគោរពច្បាប់ចរាចរណ៍ ព្រមទាំងត្រូវយកចិត្តទុកដាក់ថែទាំ សម្ភារៈអាវុធយុទ្ធភណ្ឌដែលបានបំពាក់ និងត្រូវបង្កើនយកចិត្តទុកដាក់លើការហ្វឹកហ្វឺនបន្ថែមឲ្យបានជាប្រចាំ ក្នុងការបង្កើនសមត្ថភាព និងធនធានមនុស្ស តាមអង្គភាព ត្រៀមលក្ខណៈនូវគ្រប់វិនាទីលើការគ្រប់គ្រងកម្លាំងក្នុងការធានារ៉ាប់រងបានទាន់ពេល នៅមានពេលមានសភាពការណ៍កើតឡើងណាមួយ ជាពិសេសក្នុងការចុះជួយសង្គ្រោះប្រជាពលរដ្ឋរងគ្រោះដោយគ្រោះធម្មជាតិ និងឧបទ្ទវហេតុផ្សេងៗ សំខាន់សន្តិសុខទេសចរណ៍ និងកសាងអង្គភាព ចិញ្ចឹមសត្វ បង្កបង្កើនផលក្នុងការទ្រទុងជីវភាពកងទ័ព និងគ្រួសារទ័ព ព្រមទាំងការងារប្រឡងប្រណាំងលើការកសាងអង្គភាព និងអនាម័យ សុខភាព បរិស្ថាន និងចូលរួមសហការជាមួយអាជ្ញាធរមូលដ្ឋាន កម្លាំងសមត្ថកិច្ចជំនាញក្នុងការទប់ស្កាត់បទល្មើសព្រៃឈើ កាត់បន្ថយវប្បធម៌អន្តរាគមន៍ និងសកម្មក្នុងការអនុវត្តនូវគោលនយោបាយភូមិ/ឃុំមានសុវត្ថិភាពនៅតាមមូលដ្ឋានដែលអង្គភាពបានឈរជើង ដើម្បីរក្សាសន្តិសុខជូនដល់ប្រជាជន៕ ដោយ ស៊ាន សុផាត