ទស្សនៈវិទូឥណ្ឌាដ៏ល្បីល្បាញមួយរូបមករៀបចំព្រឹត្តិការណ៍សមាធិនៅប្រាសាទបាយ័ន
ភ្នំពេញ៖ទស្សនៈវិទូឥណ្ឌាលោកសាស្រ្តាចារ្យ Sadhguru បានដឹកនាំប្រតិភូអន្តរជាតិចំនួនប្រមាណ ១៣០នាក់ មកកាន់កម្ពុជា ដើម្បីរៀបចំព្រឹត្តិការណ៍សមាធិ “Mystic Musing” ដែលប្រព្រឹត្តទៅនាថ្ងៃទី២៧-២៩ ខែមេសា ឆ្នាំ២០២៤ នៅទឹកដីអង្គរខេត្តសៀមរាប។នេះបើយោងតាមសេចក្តីប្រកាសព័ត៌មានរបស់ក្រសួងទេសចរណ៍នៅថ្ងៃសុក្រនេះ។
ក្រសួងទេសចរណ៍បានប្រាប់ថា ក្រសួងសហការជាមួយក្រសួងវប្បធម៌ និងវិចិត្រសិល្បៈ, រដ្ឋបាលខេត្តសៀមរាប និងមូលនិធិ ISHA រៀបចំ “ព្រឹត្តិការណ៍សមាធិរបស់លោកសាស្រ្តាចារ្យ Sadhguru ក្រោមប្រធានបទ “Mystic Musing” នាល្ងាចថ្ងៃទី២៧ ខែមេសា នៅបរិវេណប្រាសាទបាយ័ន។លោកសាស្ត្រាចារ្យ ជាទស្សនៈវិទូល្បីល្បាញ និងមានឥទ្ធិពលមួយរូបក្នុងពិភពលោកដែលមានចំនួនអ្នកចូលទស្សនារាប់លាននាក់នៅលើប្រព័ន្ធផ្សព្វផ្សាយសង្គមនានា និងជាប្រធានមូលនិធិ ISHA Foundation ។
ការជ្រើសរើសទីតាំងប្រាសាទបាយ័នសម្រាប់រៀបចំព្រឹត្តិការណ៍សមាធិអន្តរជាតិនេះ បានឆ្លុះបញ្ចាំងឱ្យឃើញថា តំបន់ប្រាសាទអង្គរ គឺជាទីតាំងប្រកបដោយភាពស័ក្តិសិទ្ធិនិងបង្កប់ទៅដោយភាពមហស្ចារ្យជាច្រើនសម្រាប់ការរៀបចំព្រឹត្តិការណ៍ជំនឿសាសនាបែបអន្តរជាតិ ដែលប្រការនេះរួមចំណែក ធ្វើឱ្យកម្ពុជា ជាពិសេសខេត្តសៀមរាប គឺជាគោលដៅទេសចរណ៍ជំនឿសាសនាលំដាប់អន្តរជាតិ។
សូមជម្រាបថា លោកសាស្ត្រាចារ្យ Sadhguru បានអញ្ជើញមកដល់អាកាសយានដ្ឋានអន្តរជាតិសៀមរាប អង្គរ នារសៀលថ្ងៃទី២៦ ខែមេសា ដោយមានការទទួលបដិសណ្ឋារកិច្ចដ៏កក់ក្តៅពីសំណាក់ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងលោកជំទាវ ចម ក្រស្នា ព្រមទាំងថ្នាក់ដឹកនាំនៃ ក្រសួងទេសចរណ៍។ក្នុងឱកាសស្នាក់នៅកម្ពុជាប្រតិភូទាំងអស់គ្រោងនឹងចូលទស្សនាប្រាសាទនានាក្នុងតំបន់អង្គរ ដូចជាប្រាសាទអង្គរវត្ត ប្រាសាទព្រះខ័ន ប្រាសាទតាព្រហ្ម និងប្រាសាទបាយ័នជាដើម៕
អត្ថបទ៖មុនី
រូបភាព៖ក្រសួងទេសចរណ៍