សម្តេចធិបតី ហ៊ុន ម៉ាណែត អញ្ជើញប្រកាសបើកដំណើការជាផ្លូវការ “សមាគមសហព័ន្ធអ្នកវិនិយោគកម្ពុជា”
ភ្នំពេញ៖ សមាគមចំនួនប្រាំបួនដែលកំពុងបណ្ដាក់ទុនរកស៊ីនៅកម្ពុជាបានរួមគ្នាបង្កើតសម័្ពន្ធភាពមួយដែលមានឈ្មោះថា
““សមាគមសហព័ន្ធអ្នកវិនិយោគកម្ពុជា” និងត្រូវបានប្រកាសជាផ្លូវការនៅរសៀលថ្ងៃទី៩ ខែឧសភា ឆ្នាំ២០២៤ក្រោមអធិបតីភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត។
អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជាបានបញ្ជាក់ឱ្យដឹងថា ការបង្កើតឱ្យមានសមាគមសហព័ន្ធអ្នកវិនិយោគ កម្ពុជា នាពេលនេះជាការផ្តួចផ្តើមរួមគ្នាដោយសមាគមចំនួន ៩ រួមមាន៖ ១. សមាគមស្បែកជើងកម្ពុជា ២. សមាគមផលិតផលធ្វើដំណើរ និងស្បែកនៅកម្ពុជា ៣. សភាពាណិជ្ជកម្មម៉ាឡេស៊ីនៅកម្ពុជា ៤. សមាគមពាណិជ្ជកម្មកម្ពុជាខេមឈីន ៥. សមាគមអភិវឌ្ឍន៍ពាណិជ្ជកម្មចិនស៊ីឈួនឆុងឈីងកម្ពុជា ៦. សមាគមសហគ្រិនចិនជាំងស៊ូនៅកម្ពុជា ៧. សមាគមពាណិជ្ជកម្មកម្ពុជា អានហួយ ៨. សមាគមពាណិជ្ជករ និងវិនិយោគិនខេត្តហ៊ូណាននៅកម្ពុជា និង៩. សមាគមសហភាពអ្នកដឹកនាំ។
អ្នកឧកញ៉ា លី ឃុនថៃ បញ្ជាក់ថា “សម្រាប់ទិន្នន័យសរុប នៃសមាគមទាំងប្រាំបួន រួមគ្នាបានចូល រួមសម្រេច នូវការជំរុញ និងទាក់ទាញវិនិយោគិនបរទេសចូលមកបណ្តាក់ទុនក្នុង ប្រទេសកម្ពុជា មានទំហំវិនិយោគសរុបជាង ១៥,២ ពាន់លានដុល្លារអាមេរិក និងបានផ្ដល់ឱកាសការងារ ជូនដល់កម្មករ និយោជិត ជាង ៦,៤ សែននាក់”។
អ្នកឧកញ៉ាប្រធានសមាគមសហព័ន្ធអ្នកវិនិយោគកម្ពុជាបានថ្លែងបន្តថា “ការបង្កើតឱ្យមានសមាគមសហព័ន្ធអ្នកវិនិយោគ កម្ពុជា ក្នុងគោលបំណងរួមគ្នាជាថ្នាលធំមួយដើម្បីពង្រឹង និងពង្រីកសកម្មភាពទាក់ទាញ វិនិយោគិនបរទេសមកពីគ្រប់ប្រទេស ដើម្បីចូលមកបណ្តាក់ទុនក្នុងប្រទេសកម្ពុជា ជា អតិបរមា”។
អ្នកឧកញ៉ាប្រធានសមាគមសហព័ន្ធអ្នកវិនិយោគកម្ពុជា បន្តថា “ដោយសម្លឹងឃើញពីកត្តាសក្តានុពលដ៏សម្បូរបែប នៃប្រទេសកម្ពុជា ជាពិសេសក្រោមម្លប់នៃសន្តិភាព ស្ថិរភាពនយោបាយ សន្តិសុខ សុវត្ថិភាព ក្រោមការដឹកនាំ ប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្ត្រី និង ស្របតាមមាគ៌ាដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា នៃព្រះរាជាណាចក្រកម្ពុជា ជាកំពូលស្ថាបនិក និងបិតាសន្តិភាព បានជួយឲ្យប្រជាជនរស់នៅប្រកបដោយ ភាពសុខុដុម និងមានភាពរីកចម្រើនលើ គ្រប់វិស័យទាំងអស់។ កត្តាទាំងនេះជា ភាពអំណោយផលយ៉ាងខ្លាំងក្លា សម្រាប់ការវិនិយោគ និងការធ្វើពាណិជ្ជកម្មបច្ចុប្បន្ន ដែលបានជម្រុញទឹកចិត្តសមាគមយើងខ្ញុំ បន្តពង្រីកខ្លួនកាន់តែសកម្មឡើង ដោយរួមគ្នាកំណត់គោលដៅ ជំរុញ និងទាក់ទាញលំហូរវិនិយោគិនបរទេស ចូលមក ប្រទេសកម្ពុជាបានកាន់តែច្រើនបន្ថែមទៀត” ៕
អត្ថបទ៖វណ្ណ
រូបភាព៖វេង លីមហួត,សួង ពិសិដ្ឋ,ង៉ាន ទិត្យ
