គ្រាប់ទម្លាក់ប្រភេទ MK82 មួយគ្រាប់ ត្រូវបានគេប្រទះឃើញ ពេលកំពុងកាយដីធ្វើផ្លូវ នៅខេត្តកំពង់ចាម។ គ្រាប់ MK82 គឺជាគ្រាប់ផលិតដោយសហរដ្ឋអាមេរិក និងត្រូវបានប្រើប្រាស់ក្នុងអតីតកាលសង្គ្រាមស៊ីវិលក្នុងប្រទេសកម្ពុជា។

ការរកឃើញគ្រាប់ទម្លាក់ទម្ងន់ជាង ២០០គីឡូក្រាមនេះ គឺនៅវេលាល្ងាចថ្ងៃទី២០ ឧសភា ឆ្នាំ២០២៤ នៅភូមិសេកយំ ឃុំព្រៃឈរ នៃស្រុកព្រៃឈរ ក្នុងពេលដែលគ្រឿងចក្រកំពុងតែកាយដី ដាក់លើរថយន្ត ដើម្បីមកស្ថាបនាផ្លូវលំក្នុងភូមិ។ គ្រាប់នេះ បានកប់ចូលក្នុងដីជម្រៅប្រមាណ ជាង១ម៉ែត្រ។

នៅថ្ងៃទី២១ឧសភានេះ កម្លាំងបោសសំអាតគ្រាប់មីន និងគ្រាប់មិនទាន់ផ្ទុះ បានដោះក្បាលគ្រាប់នោះ ដើម្បីបន្សាប និងបានស្ទូចយកគ្រាប់នោះទៅរក្សាទុក ក្នុងសារមន្ទីរខេត្តសៀមរាប។