ឯកឧត្តម ជាប សត្ថារតន៍ អញ្ជើញចូលរួម បិទយុទ្ធនាការឃោសនាបោះឆ្នោតក្រុមប្រឹក្សា រាជធានី ខេត្ត ក្រុមប្រឹក្សាស្រុក ក្រុង នៅស្រុកព្រែកប្បាស ខេត្តតាកែវ
(តាកែវ)៖ ឯកឧត្តម ជាប សត្ថារតន៍ សមាជិកគណៈកម្មាធិការកណ្តាល គណបក្សប្រជាជនកម្ពុជា អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ និងជាប្រធានក្រុមការងារគណបក្សចុះជួយស្រុកព្រៃកប្បាស រួមជាមួយនិងគណៈកម្មាធិការគណបក្សខេត្តតាកែវ បានអញ្ជើញបិទយុទ្ធនាការឃោសនាបោះឆ្នោតក្រុមប្រឹក្សា រាជធានី ខេត្ត ក្រុមប្រឹក្សាស្រុក ក្រុង នៅព្រឹកថ្ងៃទី២៤ ខែឧសភា ឆ្នាំ២០២៤ ។
![](https://asset.ams.com.kh/central/media/2024/05/photo_2024-05-24_12-29-36-1024x666.jpg)
ឯកឧត្តម ជាប សត្ថារតន៍ បានថ្លែងអំណរគុណចំពោះគណៈកម្មាធិការគណបក្ស ស្រុក ដែលបានខិតខំប្រឹងប្រែងនិងរៀបចំយុទ្ធនាការឃោសនាបោះឆ្នោតទាំងពិធីបើក និងពិធីបិទយុទ្ធនាការ ក៏ដូចជាការចុះឃោសនានៅមូលដ្ឋានក្រុងស្រុកផ្ទាល់ជាមួយអង្គបោះឆ្នោត។ យុទ្ធនាការឃោសនាបោះឆ្នោតដែលយើងធ្វើនៅក្នុងស្រុក ដែលប្រព្រឹត្តទៅដោយរលូន គ្មានហិង្សា និងគណបក្សនយោបាយនីមួយៗមានសិទ្ធិពេញលេញ ក្នុងការឃោសនា។
![](https://asset.ams.com.kh/central/media/2024/05/photo_2024-05-24_12-29-55-1024x682.jpg)
នៅថ្ងៃទី២៦ ខែឧសភា ឆ្នាំ២០២៤ ខាងមុខនេះ ជាថ្ងៃសម្រេចចិត្តរបស់អង្គបោះឆ្នោតដែលជាសមាជិកសមាជិកាក្រុមប្រឹក្សាឃុំសង្កាត់ក្នុងតំណែងក្នុងការបោះឆ្នោតជូនគណបក្សខ្លួនដែលស្រឡាញ់ពេញចិត្ត និងជឿជាក់ដើម្បីជ្រើសរើសសមាជិកក្រុមប្រឹក្សាខេត្ត ក្រុមប្រឹក្សាក្រុង ស្រុក ខណ្ឌ។ ការបោះឆ្នោតជ្រើសរើសសមាជិកក្រុមប្រឹក្សាខេត្ត និងក្រុមប្រឹក្សា ក្រុង ស្រុក ជាការពង្រឹងការអនុវត្តលទ្ធិប្រជាធិបតេយ្យនៅមូលដ្ឋានឱ្យកាន់តែប្រសើរបន្ថែមទៀត។
គួរបញ្ជាក់ថា ការឃោសនាបោះឆ្នោតជ្រើសរើសក្រុមប្រឹក្សា អាណត្តិទី៤ ឆ្នាំ២០២៤ មានរយៈពេល ៨ ថ្ងៃ ចាប់ពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ២០២៤ រីឯការបោះឆ្នោត នឹងប្រព្រឹត្តទៅនាថ្ងៃអាទិត្យ ទី២៦ ខែឧសភា ឆ្នាំ២០២៤ ចាប់ពីវេលាម៉ោង ៧:០០ព្រឹក ដល់ ៣:០០រសៀល នៅតាមការិយាល័យ បោះឆ្នោតទាំង ២០៩ ការិយាល័យ នៅទូទាំងប្រទេស ៕
![](https://asset.ams.com.kh/central/media/2024/05/photo_2024-05-24_12-30-02-1024x682.jpg)
![](https://asset.ams.com.kh/central/media/2024/05/photo_2024-05-24_12-29-45-1024x682.jpg)
![](https://asset.ams.com.kh/central/media/2024/05/photo_2024-05-24_12-29-58-1024x682.jpg)
ដោយ ៖ ង៉ាន់ ទិត្យ