មូស្គូ ៖ ស្តេចប្រទេសបារ៉ែន ព្រះអង្គម្ចាស់ Hamad bin Isa Al Khalifa ក្នុងពេលយាងទៅដល់ទីក្រុងមូស្គូ ដើម្បីបំពេញព្រះរាជទស្សនកិច្ចការងារ រយៈពេលពីរថ្ងៃ នៅរុស្ស៊ី បានមានព្រះបន្ទូលកោតសរសើរ ប្រធានាធិបតី ពូទីន ថា មានគោលនយោបាយ ដ៏ឈ្លាសវៃ។

ក្នុងពេលជួបលោក ពូទីន នៅក្នុងទីក្រុងមូស្គូ កាលពីថ្ងៃព្រហស្បតិ៍ ស្តេចបារ៉ែន បានទទួលស្គាល់ពីតួនាទី របស់រុស្ស៊ី ក្នុងការដោះស្រាយ ដោយយុត្តិធម៌ ចំពោះបញ្ហា នៅអារ៉ាប់។ ព្រះអង្គម្ចាស់ ដែលបច្ចុប្បន្នកាន់តំណែងជាប្រធានសម្ព័ន្ធអារ៉ាប់ផងដែរនោះ បានមានព្រះបន្ទូលថា បារ៉ែន មានបំណងរៀបចំសន្និសីទអន្តរជាតិមួយ ដើម្បីដោះស្រាយជម្លោះអ៊ីស្រាអែល និងក្រុមហាម៉ាស។ ព្រះអង្គម្ចាស់ Hamad បានប្រកាសថា រុស្ស៊ីនឹងក្លាយជាប្រទេសដំបូង ដែលធ្វើឲ្យទ្រង់នឹងងាកទៅរកការគាំទ្រលើ គំនិតផ្តួចផ្តើមនេះ ពីព្រោះរុស្ស៊ី ដើរតួយ៉ាងសំខាន់ និងមានសិទ្ធិអំណាចដ៏អស្ចារ្យ នៅទូទាំងពិភពលោក ។

បន្ទាប់ពីការសន្ទនា រយៈពេលពីរម៉ោង លោក ពូទីន និងព្រះមហាក្សត្របារ៉ែន បានចុះហត្ថលេខាលើឯកសារទាក់ទងនឹងកិច្ចសហប្រតិបត្តិការ ក្នុងឧស្សាហកម្មឱសថ និងវេជ្ជសាស្ត្រ, ការដឹកជញ្ជូន, ការផ្លាស់ប្តូរវប្បធម៌ និងបរិស្ថាន នេះបើយោងតាមវិមានក្រឹមឡាំង។

លោក Putin បាននិយាយថា ពាណិជ្ជកម្មរវាងរុស្ស៊ី និងបារ៉ែន គឺស្ថិតក្នុងដំណាក់កាលដំបូង ប៉ុន្តែ មានភាពវិជ្ជមាន។

ភាគីទាំងពីរក៏បានលើកឡើងពីបញ្ហាភូមិសាស្ត្រនយោបាយ និង ស្ថានភាពក្នុងតំបន់ និងពិភពលោកផងដែរ៕ ប្រភពពី RT ប្រែសម្រួល៖ សារ៉ាត