អង្គការសុខភាពពិភពលោកព្រមានថា ក្មេងជំទង់នៅអឺរ៉ុបប្រឈមជំងឺមហារីក និងទឹកនោមផ្អែម
កូប៉ិនហាក់៖ អង្គការសុខភាពពិភពលោក (WHO) បានព្រមានកាលពីថ្ងៃព្រហស្បតិ៍ថា ក្មេងជំទង់មកពីគ្រួសារមានជីវភាពខ្សត់ខ្សោយនៅអឺរ៉ុប អាចប្រឈមមុខនឹងជំងឺធាត់ ភាពអសកម្ម និងរបបអាហារមិនល្អ ដែលជាកត្តាហានិភ័យកើតជំងឺមហារីក ជំងឺសរសៃឈាមបេះដូង និងជំងឺទឹកនោមផ្អែម។
អង្គការសុខភាពពិភពលោក (WHO) បាននិយាយថា របាយការណ៍ថ្មីមួយបានបង្ហាញពី “ភាពខុសគ្នាគួរឱ្យព្រួយបារម្ភ” ពាក់ព័ន្ធនឹងបញ្ហាសុខភាពរបស់មនុស្សវ័យក្មេងនៅទូទាំងទ្វីបអឺរ៉ុប ជាពិសេសក្មេងជំទង់មកពីគ្រួសារមានប្រាក់ចំណូលទាប។ ការសិក្សាអំពីអាកប្បកិរិយាសុខភាពចំពោះកុមារវ័យសិក្សា (HBSC) ដោយផ្អែកលើទិន្នន័យពីប្រទេសចំនួន៤៤នៅអឺរ៉ុប បានបង្ហាញថា ក្មេងជំទង់ម្នាក់ក្នុងចំណោមក្មេងជំទង់ ៤នាក់បានរាយការណ៍ពីការទទួលទានជាតិផ្អែម ឬសូកូឡាជាប្រចាំថ្ងៃ។
![](https://asset.ams.com.kh/central/media/2024/05/photo_2024-05-24_13-47-54-1024x682.jpg)
អង្គការ WHO បានបញ្ជាក់ថា ក្មេងជំទង់ប្រហែល ២៧ភាគរយមកពីគ្រួសារមានប្រាក់ចំណូលទាប ភាគច្រើនកើតជំងឺធាត់ ហើយ១៨ភាគរយទៀតមកពីគ្រួសារមានទ្រព្យសម្បត្តិ។
នាយកអង្គការសុខភាពពិភពលោកប្រចាំតំបន់អឺរ៉ុប លោក Hans Kluge បាននិយាយថា កុមារមកពីគ្រួសារមានប្រាក់ចំណូលទាប ទំនងជាជួបប្រទះនឹងលទ្ធផលសុខភាពមិនល្អ ដែលអាចរារាំងដល់ការទទួលបានការអប់រំ លទ្ធភាពការងារ និងគុណភាពជីវិតទាំងមូល។
ប្រការនេះធ្វើឱ្យវិសមភាពសង្គមបន្តកើតមាន។ ដើម្បីដោះស្រាយបញ្ហាទាំងនេះ អង្គការ WHO បានអំពាវនាវឱ្យមានគោលនយោបាយបន្ថែមទៀត ដែលផ្តោតលើវិសមភាពសង្គម និង ណែនាំការទទួលទានរបបអាហារដែលមានសុខភាពល្អ ក៏ដូចជារឹតបន្តឹងការចែកចាយអាហារដែលប៉ះពាល់ដល់សុខភាពកុមារ។
![](https://asset.ams.com.kh/central/media/2024/05/photo_2024-05-24_13-47-54-2-1024x686.jpg)
យោងតាមរបាយការណ៍សិក្សាស្រាវជ្រាវមួយ ដោយទស្សនាវដ្តីវេជ្ជសាស្រ្ត Lancet បានរកឃើញថា សព្វថ្ងៃនេះ មនុស្សសរុបច្រើនជាង ១ពាន់លាននាក់ហើយ នៅជុំវិញពិភពលោក ដែលកំពុងកើតជំងឺធាត់ជ្រុល ឬ obesity ដោយតួលេខនេះ បានកើនឡើង៤ដង បើធៀបទៅនឹងកាលពីឆ្នាំ១៩៩០។ ក្នុងនោះកុមារ និងក្មេងវ័យជំទង់ប្រមាណ ១៥៩លាននាក់ ក៏បានស្ថិតក្នុងស្ថានភាពធាត់ជ្រុលផងដែរ ដែលកើនពីចំនួនត្រឹម ៣១លាននាក់ គិតចាប់តាំងពីឆ្នាំ១៩៩០៕
![](https://asset.ams.com.kh/central/media/2024/05/photo_2024-05-24_13-47-52-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា