ភ្នំពេញ៖ អត្តពលិកជានិស្សិតបណ្ឌិត្យសភានគរបាលកម្ពុជា ដណ្តើមបានមេដាយមាសច្រើនជាងគេ ពីព្រឹត្តិការណ៍កីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ២០២៤ លើប្រភេទកីឡាតេក្វាន់ដូ WT ។

តាមរបាយការណ៍ លោក គង់ សក្ខិដា អគ្គលេខាធិការរងសហព័ន្ធ បានអោយដឹងថា អត្តពលិក បណ្ឌិត្យសភានគរបាលកម្ពុជា ឈរលេខ១ ដណ្តើមបានមេដាយមាស ៨ គ្រឿង និងប្រាក់ ៤ គ្រឿង ,សាកលវិទ្យាល័យ គ្រប់គ្រង់ និងសេដ្ឋកិច្ច ឈរលេខ២ ដណ្តើមបានមេដាយមាស ២ គ្រឿង ,សាកលវិទ្យាល័យ បៀលប្រាយខេត្តបាត់ដំបង ឈរលេខ៣ ដណ្តើមបានមេដាយមាស១គ្រឿង ប្រាក់ ៤ គ្រឿង និងសំរិទ្ធ១ គ្រឿង និងសាកលវិទ្យាល័យផ្សេងទៀតក៏ដណ្តើមបានមេដាយមាស ប្រាក់ និងសំរិទ្ធផងដែរ។

លោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា បានបញ្ជាក់ថា កាប្រកួតនេះ សង្កេតឃើញថាមន្រ្តីបច្ចេកទេស ដឹកនាំការប្រកួតមានតម្លាភាព គ្រូបង្វឹកមានការយល់ដឹងខ្ពស់ រីឯកីឡាករ-កីឡាការិនីមានការរីកចំរើនកម្រិតបច្ចេកទេសគួរអោយកត់សំគាល់ ធ្វើអោយព្រឹត្តិការណ៍ប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ ប្រព្រឹត្តិទៅដោយរលូន ជោគជ័យ និងមានការសហការយ៉ាងស្អិតរមួត ពីគណៈកម្មការរៀបចំការប្រកួត និងមន្រ្តីបច្ចេកទេស របស់ក្រសួងអប់រំ យុវជន និងកីឡា ។

សូមបញ្ជាក់ថា ព្រឹត្តិការណ៍កីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ២០២៤ លើប្រភេទកីឡាតេក្វាន់ដូ WT មានគ្រឹះស្ថានឧត្តមសិក្សា ចំនួន១៣ បានចូលរួម ប្រកួតប្រជែងលើ១២វិញ្ញាសា និងមានមន្រ្តីបច្ចេកទេស២០នាក់ ប្រតិភូ ៣៣នាក់ កីឡាករ កីឡាការិនី សរុបចំនួន១២១នាក់ ដោយចែកចេញជា២ផ្នែក គឺផ្នែកមេគុនមាន ៣វិញ្ញាសា និងផ្នែកប្រយុទ្ធមាន៩វិញ្ញាសា៕

អត្ថបទ ៖ លោក ចាន់ វិចិត្រ
រូបភាព ៖ ងីម ឆាយហួត
(FB-TT)