អ្នកជួញដូរគ្រឿងញៀនក្នុងខេត្តព្រះវិហារចំនួន ៣នាក់ ត្រូវបានគេរកឃើញមានកាំភ្លើង និងដាវសាំមូរ៉ៃ សម្រាប់ប្រើប្រាស់ក្នុងអំពើជួញដូរគ្រឿងញៀនខុសច្បាប់។ ជនសង្ស័យទាំងបីនាក់ ត្រូវបានសមត្ថកិច្ចចាប់ខ្លួនក្នុង៣ទីតាំងផ្សេងគ្នា នៅក្នុងស្រុកសង្គមថ្មី នាថ្ងៃទី៩ និង១០មិថុនា។

ជនសង្ស័យទាំងបីរួមមានឈ្មោះ ឯក សំណាង អាយុ ៤០ឆ្នាំមុខរបរជាងសិប្បកម្ម, ឈ្មោះ ម៉ី សើម អាយុ ២២ឆ្នាំ មុខរបរបើកបរត្រាក់ទ័រ និងឈ្មោះ សោ បុល អាយុ ៥១ឆ្នាំមានមុខរបរបើកហាងខារ៉ាអូខេ។

ក្រៅពីការចាប់យកគ្រឿងញៀនជាម្សៅក្រាមសថ្លាច្រើនកញ្ចប់, សមត្ថកិច្ចបានរកឃើញជនសង្ស័យមានកាំភ្លើងកែច្នៃ ៣ដើម ក្នុងនោះ ម៉ាកកាប៊ីន ២ដើម និងប្រភេទកាំភ្លើងខ្យល់មួយដើម, គ្រាប់កាំភ្លើង និងដាវសាមូរ៉ៃ។

ជនសង្ស័យត្រូវបានបញ្ជូនមកតុលាការ ដើម្បីធ្វើការកាត់ទោសតាមច្បាប់។