ភ្នំពេញ៖ សម្តេចធិបតី ហ៊ុន ម៉ាណែត បានផ្តល់ទស្សនៈ និងអនុសាសន៍ ៥ចំណុច ដល់និស្សិត និងសាស្រ្តាចារ្យទាំងអស់ ដើម្បីបន្តរួមចំណែកដល់ការលើក​កម្ពស់គុណ​ភាពវិស័យអប់រំនៅកម្ពុជា និងបង្កើនសក្តានុពលរបស់ខ្លួនឱ្យកាន់តែខ្ពស់ ។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា បានលើកឡើងដូច្នេះ ក្នុងពិធីប្រគល់ សញ្ញាបបត្រជូនដល់និស្សិត នៃសាកលវិទ្យាល័យ លីមកុកវីង ដែល​សម្រេចបានជោគជ័យ ក្នុងឆ្នាំសិក្សា២០២១-២០២២ និង ឆ្នាំសិក្សា២០២២- ២០២៣ សរុបចំនួន ៥៤០នាក់ នៅរាជធានីភ្នំពេញ នាព្រឹកថ្ងៃទី១៣ ខែមិថុនា ឆ្នាំ២០២៤ ។

សម្តេចធិបតី ហ៊ុន ម៉ាណែត បានមានប្រសាសន៍ថា ទន្ទឹមនឹងភាពជោគជ័យ​ដ៏ត្រចះ​ត្រចង់ របស់និស្សិតជ័យលាភី និងដើម្បីបន្តរួមចំណែក ដល់ការលើក​កម្ពស់គុណភាព​វិស័យអប់រំនៅកម្ពុជា ជាពិសេស​ ចូលរួមអនុវត្តឱ្យបានជោគជ័យនូវយុទ្ធសាស្ត្របញ្ច​កោណ​ដំណាក់កាលទី ១ សម្រាប់ការអភិវឌ្ឍមូលធនមនុស្ស សូមផ្ដល់នូវទស្សនៈ និងអនុសាសន៍មួយចំនួន ដូចខាងក្រោម ៖

ទី១. ជាមួយនឹងចំណេះដឹង ទទួលបានពីការសិក្សា នៅសាកលវិទ្យាល័យ លីមកុកវីង ជ័យលាភីទាំងអស់ គួរបន្តការសិក្សាជំនាញឯកទេសបន្ថែមទៀត ដើម្បីបង្កើនសក្តា​នុពល​​របស់ខ្លួនឱ្យកាន់តែខ្ពស់តាមដែលអាចធ្វើទៅបាន និង ត្រូវអភិវឌ្ឍខ្លួន​ឱ្យក្លាយ​ជាយុវជនឌីជីថល នឹងយុវជនសកល ក្នុងឯកទេសកម្មរៀងៗខ្លួន សំដៅទាញ​យក​ផល​​ប្រយោជន៍ជាអតិបរមាពីបរិវត្តកម្មឌីជីថល និងរួមចំណែកដល់ការកសាងម៉ូ​ដែល​កំណើនសេដ្ឋកិច្ចថ្មីរបស់កម្ពុជា ដែលផ្អែកលើជំនាញ បច្ចេកវិទ្យា និងនវានុវត្តន៍។

ទី២. សូមលើកទឹកចិត្តខ្ពស់ដល់គ្រប់សាស្ត្រាចារ្យទាំងអស់ បន្តអភិវឌ្ឍសមត្ថភាព និង បង្កើនការសិក្សាស្រាវជ្រាវ បែបវិទ្យាសាស្រ្តតាមជំនាញឯកទេសរៀងៗខ្លួន ដើម្បី​លើក​កម្ពស់ប្រសិទ្ធភាពនៃការបង្រៀន និងផ្សារភ្ជាប់ទ្រឹស្តីទៅនឹងការអនុវត្ត និង ឧត្តមានុវត្ត​ជាក់ស្តែង, ហើយចំណេះដឹងពីការស្រាវជ្រាវនេះ គួរតែបានចែករំលែក ឱ្យបានទូលំ​ទូលាយ ដើម្បីជាប្រយោជន៍ដល់ប្រទេសជាតិ និងប្រជាជន។

ទី៣. សូមលើកទឹកចិត្តឱ្យគ្រឹះស្ថានឧត្តមសិក្សារដ្ឋ និងឯកជន បន្តធ្វើបច្ចុប្បន្នកម្ម កម្មវិធី​សិក្សាឱ្យស្របនឹងតម្រូវការ នៃទីផ្សារការងារ និងបន្តអភិវឌ្ឍកម្មវិធីសិក្សាថ្មីៗ ដើម្បីធានានូវគុណភាពនៃការបណ្តុះបណ្តាល, ដោយផ្តោតការយកចិត្តទុកដាក់បន្ថែម​លើចំណេះដឹង និងជំនាញផ្នែកបច្ចេកវិទ្យា និងឌីជីថល ស្របតាមបរិការណ៍ នៃការ​រីកចម្រើននៃសេដ្ឋកិច្ច និងសង្គម, ការប្រកួតប្រជែង នៃទីផ្សារការងារ, សាកល​ភាវូប​នីយកម្ម និងការវិវត្តនៃសកលលោក។

ទី៤. សូមលើកទឹកចិត្តដល់គ្រឹះស្ថានឧត្តមសិក្សា ទាំងរដ្ឋ និងឯកជន បង្កើនកិច្ច​សហប្រតិបត្តិការជាមួយគ្រឹះស្ថានអប់រំ និងគ្រឹះស្ថានស្រាវជ្រាវជាតិអន្តរជាតិ សម្រាប់ធ្វើការ​សិក្សាស្រាវជ្រាវរួមគ្នា ដកស្រង់បទពិសោធ និង ធ្វើទស្សនកិច្ច​សិក្សាទៅវិញទៅមក ដើម្បីផ្ទេរចំណេះដឹង បទពិសោធជាក់ស្ដែង និងឧត្តមានុវត្ត សំដៅបង្កើនគុណភាព នៃការអប់រំ ការបណ្ដុះបណ្ដាល និងការសិក្សាស្រាវជ្រាវ ឱ្យកាន់តែប្រសើរ ។

ទី៥. សូមក្រសួងអប់រំ យុវជន និង កីឡា, ដៃគូអភិវឌ្ឍ, វិស័យឯកជន និង​គ្រប់​អង្គភាព ពាក់ព័ន្ធសហការ និងបន្តលើកស្ទួយវិស័យអប់រំ និងការបណ្តុះបណ្តាល ឱ្យកាន់តែល្អប្រសើរ តាមរយៈការធ្វើទំនើបកម្មអភិបាលកិច្ចគ្រប់គ្រង, ការផ្តល់​សេវាបង្រៀនប្រកប ដោយគុណភាពខ្ពស់, និងកិច្ចខិតខំបន្ត​អភិវឌ្ឍសមត្ថភាព​ជា​ប្រចាំ ព្រមទាំងយកចិត្តទុក ដាក់លើធនធានយុវជន សម្រាប់ជាសសរទ្រូងដ៏រឹងមាំ និងពោរពេញដោយសមត្ថភាព៕

អត្ថបទ៖ វណ្ណលុក
រូបភាព៖ វ៉េង លីមហួត និង សួង ពិសិដ្ឋ