(ភ្នំពេញ)៖ អាជ្ញាធរជាតិប្រយុទ្ធប្រឆាំង និងគ្រឿងញៀន បានសម្រេចដុតបំផ្លាញ​គ្រឿង​ញៀន​, សារធាតុគីមីផ្សំ និងសារធាតុគីមីពាក់ព័ន្ធបទល្មើស ដែលមានតម្លៃ​ប្រមាណជាង ២២លានដុល្លារនៃការជួញដូរនៅលើទីផ្សារ ដែលសម្រេចរឹបអូស​កម្ទេចចោល ជាវត្ថុតាងដែលដកហូតពីសេចក្តីសម្រេច​របស់តុលាការ សាលាដំបូ​រាជធានីភ្នំពេញ និងដែនសមត្ថកិច្ចរបស់សាលាដំបូង ក៏ដូចជាអយ្យការអម​សាលារាជធានីភ្នំពេញ។

ពិធីដុតបំផ្លាញនេះធ្វើឡើង នៅថ្ងៃទី១៤ ខែមិថុនា ឆ្នាំ២០២៤នេះស្ថិតក្នុងទីតាំង​ភូមិសំរោង សង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ ឯកឧត្តម នាយឧត្តម​សេនីយ៍ មាស វិរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធ​ប្រឆាំង​គ្រឿងញៀន បនគូសបញ្ជាក់ថា វត្ថុតាងដែលត្រូវបានដុតបំផ្លាញ ចំនួន 7.35តោន​នេះ បែងចែកជា ៣ប្រភេទ ដោយ៖ គ្រឿងញៀន មានទម្ងន់សរុប 2.95 តោន (ពីរ ក្បៀសកៅសិបប្រាំ) ក្នុងនោះ រួមមាន សារធាតុញៀនឈ្មោះ ហេរ៉ូអ៊ីន, មេតំហ្វេតា​មីន, អ៊ឹម ដេ អឹម អា MDMA ឬ ថ្នាំគ្រវី, កេតាមីន, នីមេតាហ្សេប៉ាម, កញ្ឆាក្រៀម, កូកាអ៊ីន – សារធាតុគីមី មានទម្ងន់សរុប 3.25 (បី ក្បៀសម្ភៃប្រាំ) តោន- និងសារធាតុគីមី មិនច្បាស់ មានទម្ងន់សរុប 1.14តោន។

ឯកឧត្តម នាយឧត្តមសេនីយ៍ មាស វិរិទ្ធ បានគូសបញ្ជាក់ថា រយៈពេល១៦០ ថ្ងៃនេះ អាជ្ញាធរមានសមត្ថកិច្ច នៅទូទាំងប្រទេស បានបង្រ្កាបបទល្មើសគ្រឿងញៀន​បាន​ប្រមាណ ៤ពាន់ករណី ដែលជនល្មើសប្រមាណជា១ម៉ឺននាក់ត្រូវបានចាប់ ឃាត់ខ្លួន ហើយបញ្ជូនទៅតុលាការ ដែលភាគច្រើនជាជនជាតិវៀតណាម ចិន ឡាវ ជាដើម។

ឯកឧត្តម បន្តថា គ្រឿងញៀនទាំងអស់ដែលរឹបអស់បានប្រមាណាជា ៨៥ភាគរយ ដែលចាប់ រឹបអូសបានកន្លងមកនេះ មានប្រភព មកពីតំបន់ត្រីកោណមាស ដែលមិន​ឆ្ងាយប៉ុន្មានពីប្រទេសកម្ពុជានោះទេ ហើយក្រុមឧក្រិដ្ឋជនមានបណ្តាញច្រើន ក្នុងនោះមានបណ្តាញនៃការផលិត បណ្តាញនៃការដឹកជញ្ជូនឆ្លងកាត់ ពីប្រទេសមួយទៅប្រទេសមួយ និងបណ្តាញពង្រីកទីផ្សារនៃការប្រើប្រាស់ ក៏ដូចជាទីផ្សារនៃការជួញដូរជាដើម ។

ឯកឧត្តម ក៏បានគូសបញ្ជាក់ផងដែរថា ប្រទេសកម្ពុជា គឺជាប្រទេស​ដែលអ្នក​ជួញដូរ​គ្រឿងញៀន ធ្វើការចរាចរណ៍ពីប្រទេសផលិត ធ្វើការឆ្លងកាត់ដើម្បីទៅកាន់​ប្រទេស​ទី៣ ។ ត្រង់ចំណុចនេះ ឯកឧត្តម អគ្គលេខធិការរូបនេះបានគូសបញ្ចាក់ថា ប្រទេសទី៣គឺជាប្រទេស ដែលមានការជួញដូរ និងទីផ្សារមានតំលៃ គុណ២ ឈានទៅដល់ ៤ដង នៃតម្លៃទីផ្សារក្នុងប្រទេសកម្ពុជា ៕

អត្ថបទ ៖ ង៉ាន់ ទិត្យ
រូបភាព ៖ រិន រចនា