ចិនវ៉ាដាច់អាមេរិក លក់ឡានច្រើនបំផុតជាលើកដំបូង
ប៉េកាំង៖ ក្រុមហ៊ុនផលិតឡានក្នុង ប្រទេស ចិន លក់ឡានបានច្រើនជាងអាមេរិក ជា លើក ដំបូង កាល ពី ឆ្នាំ ២០២៣ ជំរុញដោយក្រុមហ៊ុន BYD នេះបើតាមអ្នកស្រាវជ្រាវនៃក្រុមហ៊ុនស្រាវជ្រាវឡាន Jato Dynamics បញ្ជាក់នៅក្នុងរបាយការណ៍មួយចេញផ្សាយកាលពីពេលថ្មីៗនេះ។
![](https://asset.ams.com.kh/central/media/2024/06/photo_2024-06-17_17-19-41-1024x768.jpg)
ទិន្នន័យបានបង្ហាញថា ឡានម៉ាកយីហោចិនដែលដឹកនាំដោយក្រុមហ៊ុន BYD ដែលមានមូលដ្ឋាននៅទីក្រុង Shenzhen បានលក់ឡានថ្មីចំនួន ១៣.៤លានគ្រឿងកាលពីឆ្នាំ ២០២៣ ខណៈដែលឡានម៉ាកយីហោរបស់អាមេរិកលក់បានប្រហែល ១១.៩លានគ្រឿង។
![](https://asset.ams.com.kh/central/media/2024/06/photo_2024-06-17_17-19-43-1024x682.jpg)
រីឯឡានម៉ាកយីហោជប៉ុនបាននាំមុខគេលើពិភពលោក ជាមួយនឹងការលក់ ចំនួន ២៣.៥៩លានគ្រឿង។ យោងតាមរបាយការណ៍បានឱ្យដឹងថា កំណើននៃការលក់ឡានរបស់ប្រទេសចិន ក៏បានកើនឡើងលើសពីអាមេរិកផងដែរ ពោលគឺកើនឡើង ២៣ភាគរយ បើធៀបនឹងអាមេរិកមានចំនួនត្រឹម ៩ភាគរយ។
របាយការណ៍បន្ថែមថា ក្រុមហ៊ុនផលិតឡានចិនបានចាប់យកចំណែកទីផ្សារដ៏ធំនៅទូទាំងតំបន់មជ្ឈិមបូព៌ា អឺរ៉ាស៊ី និងអាហ្រ្វិក ហើយក៏បានប្រកាសពីកំណើនលក់នៅអាមេរិកឡាទីន និងអាស៊ីអាគ្នេយ៍ផងដែរ។ ទន្ទឹមនឹងនេះដែរ ម៉ាកយីហោចិនមួយចំនួនក៏បានចាប់យកចំណែកនៅក្នុងសេដ្ឋកិច្ចអភិវឌ្ឍន៍ផងដែរ រួមមានអឺរ៉ុប អូស្ត្រាលី នូវែលសេឡង់ និងអ៊ីស្រាអែល។
![](https://asset.ams.com.kh/central/media/2024/06/photo_2024-06-17_17-19-47-1024x723.jpg)
ប៉ុន្តែឧស្សាហកម្មឡានចិនកំពុងប្រឈមមុខនឹងការកើនឡើងពន្ធនាំចេញនៅឆ្នាំ ២០២៤នេះ ដោយប្រទេសជាច្រើនបានអនុម័តវិធានការ ដើម្បីការពារឧស្សាហកម្មក្នុងស្រុក ពីការនាំចូលឡានរបស់ចិនដែលមានតម្លៃថោក។ តួយ៉ាង ថ្មីៗនេះសហភាពអឺរ៉ុបបានប្រកាសដំឡើងពន្ធលើឡានអគ្គិសនីរបស់ចិនរហូតដល់ ៣៨ភាគរយ។
វិធានការនេះកើតឡើងបន្ទាប់ពីអាមេរិកបានដំឡើងពន្ធបួនដងលើឡានអគ្គិសនីរបស់ចិនដល់ ១០០ភាគរយ។ ប្រទេសតួកគីក៏ត្រូវបានគេរាយការណ៍ដែរថា បានប្រកាសយកពន្ធបន្ថែមចំនួន ៤០ភាគរយ លើឡាននាំចូលពីប្រទេសចិន៕ ប្រភព: CNBC ប្រែសម្រួលដោយ: ឈឹម ទីណា