លើកកម្ពស់សមត្ថភាព និងនវានុវត្តន៍របស់សហគ្រិន ពិតជាមានសារៈសំខាន់សម្រាប់ការអភិវឌ្ឍ និងរីកចម្រើន នៃសេដ្ឋកិច្ច
(ភ្នំពេញ)៖ លើកកម្ពស់សមត្ថភាព និងនវានុវត្តន៍របស់សហគ្រិនពិតជាមានសារៈសំខាន់សម្រាប់ការអភិវឌ្ឍ និងរីកចម្រើននៃសេដ្ឋកិច្ចប្រកបដោយនិរន្តភាពក្នុងបណ្តាប្រទេសនីមួយៗ ជាពិសេសប្រទេសកម្ពុជាផ្ទាល់។ ការជួយជំរុញគាំទ្រដល់ធុរកិច្ចថ្មី សហគ្រាសធុនតូច និងមធ្យម ត្រូវបានផ្តល់ជាអាទិភាព និងបានចាត់បញ្ចូលជាជ្រុងមួយនៃយុទ្ធសាស្ត្របញ្ចកោណរបស់រាជរដ្ឋាភិបាលនៅក្នុងអាណត្តិទី៧ ដើម្បីជាការរួមចំណែកដល់ការសម្រេចបាននូវមហិច្ឆតារបស់រាជរដ្ឋាភិបាល ក្នុងការប្រែក្លាយប្រទេសកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសរីកចម្រើននៅឆ្នាំ២០៥០។
![](https://asset.ams.com.kh/central/media/2024/06/photo_2024-06-17_17-23-08-1024x574.jpg)
នេះគឺជាការលើកឡើងរបស់ លោក ឃឹម លាង នាយកមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC) ក្នុងជំនួបអតីសិក្ខាកាម និងចែកវិញ្ញាបនបត្រនៃវគ្គបណ្តុះបណ្តាល ដល់ម្ចាស់អាជីវកម្មចំនួន ២១៦នាក់ ដែលបានទទួលវិញ្ញាបនបត្របណ្តុះបណ្តាលជំនាញសហគ្រិនភាព គាំទ្រដោយ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) កាលពីថ្ងៃទី១៤ ខែមិថុនា ឆ្នាំ២០២៤ បន្ទាប់ពីសិក្ខាកាមបានបញ្ចប់ការសិក្សា វគ្គបណ្តុះបណ្តាលសហគ្រិនភាព ពីជំនាន់ទី២១ ដល់ទី២៩។
![](https://asset.ams.com.kh/central/media/2024/06/photo_2024-06-17_17-23-12-1024x574.jpg)
លោក ឃឹម លាង បន្តថា ២០ឆ្នាំមកនេះ CJCC បាននិងកំពុងចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក៏ដូចជាវិស័យឯកជន និងអង្គការនានា តាមរយៈការផ្តល់វគ្គបណ្តុះបណ្តាលផ្នែកសហគ្រិនភាព ការគ្រប់គ្រងធុរកិច្ច និងការផ្គូរផ្គងដៃគូរអាជីវកម្មជាដើម ។
![](https://asset.ams.com.kh/central/media/2024/06/photo_2024-06-17_17-23-15-1024x574.jpg)
លោក ង៉ន ម៉ អតីតប្រធានក្លឹបសហគ្រិនភាព នៃ CJCC បានឱ្យដឹងថា សហគ្រិននេះ គឺជាការផ្តល់ការសិក្សាទាំងនិងការបង្កើតគំនិតអាជីវកម្ម ដែលត្រូវដឹងថា តើយើងត្រូវធ្វើអាជីវកម្មបែបណាដើម្បីឱ្យមាននិរន្តរភាព និងការរីកចម្រើន។ លោកបន្ថែមថា កាលមិនទាន់បានចូលរៀនវគ្គសហគ្រិនភាពនៅទីនេះ កាលពីបើកអាជីវកម្មគឺបើករៀនតពីគ្នា មានពីឪពុកម្តាយ បងប្អូន មិត្តភ័ក្រ្ត ក៏ប៉ុន្តែមកដល់សម័យកាលឥឡូវនេះ ខុសប្លែកជាងមុនដែលមានការងារជាច្រើនដើម្បីធ្វើអាជីវកម្ម។
![](https://asset.ams.com.kh/central/media/2024/06/photo_2024-06-17_17-23-19-1024x682.jpg)
បន្ថែមពីលើការប្រគល់សញ្ញាបត្រជូនដល់សិក្ខាកាមដែលបានបញ្ចប់ការសិក្សាកម្មវិធីនេះ CJCC ក៏បានផ្តល់ឱកាសដល់អតីតសិក្ខាកាមទាំងអស់អាចកសាងបណ្តាញជាមួយគ្នាផងដែរ ជាពិសេសមជ្ឈមណ្ឌលក៏មានបង្កើតជាក្លឹបសហគ្រិនភាព សម្រាប់ផ្តល់ឱកាសដល់អតីតសិក្ខាកាមទាំងនោះ អាចធ្វើការទំនាក់ទំនងគ្នា ក៏ដូចជាកសាងបណ្តាញអាជីវកម្មផងដែរ ។
![](https://asset.ams.com.kh/central/media/2024/06/photo_2024-06-17_17-23-22-1024x574.jpg)
សូមបញ្ជាក់ថា វគ្គបណ្តុះបណ្តាលសហគ្រិនភាព ជាវគ្គសិក្សាខ្លីមានរយៈពេល ៥ខែ ត្រូវបានបង្កើតឡើងកាលពីឆ្នាំ២០០៥ សម្រាប់ជាថ្នាលផ្តល់ចំណេះដឹង និងជំនាញ ផ្នែកសហគ្រិនភាពជូនដល់ប្រជាជនកម្ពុជា ដែលមានបំណងចង់ក្លាយជាសហគ្រិន ក៏ដូចជាម្ចាស់អាជីវកម្មស្រាប់ ដែលមានបំណងចង់ពង្រីកអាជីវកម្មរបស់ខ្លួនឱ្យមានស្តងដារ ជាប្រពន្ធ័ត្រឹមត្រូវ។ គិតរហូតមកដល់បច្ចុប្បន្ននេះ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បានបណ្តុះបណ្តាលសហគ្រិន ក៏ដូចជាម្ចាស់ធុរកិច្ចបានប្រមាណជាង ៨៤៦នាក់ រួចមកហើយ តាមរយៈវគ្គបណ្តុះបណ្តាលមួយនេះ ដោយក្នុងមួយវគ្គៗកំណត់ចំនួនសិក្ខាកាមត្រឹមតែ ៤០នាក់ប៉ុណ្ណោះ។
សម្រាប់អ្នកចង់ក្លាយជាសហគ្រិន មជ្ឈមណ្ឌលមានវគ្គបណ្តុះបណ្តាលសហគ្រិនភាព, សម្រាប់អ្នកចាប់ផ្តើមថ្មីធុរកិច្ចដំបូង មជ្ឈមណ្ឌលមានកម្មវិធីពន្លឿនអាជីវកម្ម (Accelerator Program), សម្រាប់ម្ចាស់ និងអ្នកគ្រប់គ្រងសហគ្រាសធុនតូច និងមធ្យម និងវិនិយោគិន ក៏មានវគ្គបណ្តុះបណ្តាលការគ្រប់គ្រងអាជីវកម្ម និងការផ្គូរផ្គងអាជីវកម្ម តាមរយៈសមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) ផងដែរ៕
អត្ថបទ ង៉ាន់ ទិត្យ
រូបភាព រិន រចនា