ឧត្តមសេនីយ៍ទោ សោម ស៊ុន នាំយកអំណោយទៅប្រគល់ជូនកងកម្លាំងចម្រុះ ការពារ ទប់ស្កាត់និងបង្ក្រាបបទល្មើសធនធានធម្មជាតិនៅតំបន់ព្រៃឡង់
កំពង់ធំ៖ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការការពារគ្រប់គ្រង និងបង្ក្រាបបទល្មើសធនធាន ក្នុងភូមិសាស្ត្រខេត្តកំពង់ធំក្នុងសប្ដាហ៍នេះនាំយកអំណោយរបស់នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងទ័ពជើងគោក ប្រគល់ជូនកងកម្លាំងចម្រុះ ដែលកំពុងសហប្រតិបត្តិការក្នុងភារកិច្ចគ្រប់គ្រង ការពារ ទប់ស្កាត់ និងបង្ក្រាបបទល្មើសធនធានធម្មជាតិចំនួន ពីរគោលដៅស្ថិតនៅក្នុងតំបន់ព្រៃឡង់ក្នុងភូមិសាស្ត្រស្រុកសណ្តាន់ ខេត្តកំពង់ធំ ។គោលដៅទី១ នៅតំបន់អូរឃ្មង និងគោលដៅទី២ នៅតំបន់ឃុំសុចិត្រ ។
ក្នុងឱកាសនេះឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះកងកម្លាំងប្រដាប់អាវុធទាំងបី មន្ត្រីជំនាញពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ ដែលបានសហការគ្នាល្អ ចូលរួមក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិ ក្នុងរយៈពេល៤៥ថ្ងៃកន្លងទៅនេះទទួលបានជោគជ័យគួរជាទីមោទនៈដោយគ្មានការកាប់បំផ្លាញជាថ្មី។ដោយឡែកចំពោះការកាប់ទន្ទ្រានក្នុងរយៈពេលកន្លងទៅកងកម្លាំងចម្រុះ និងសមត្ថកិច្ចជំនាញបាននឹងកំពុងបន្តគ្រប់គ្រង និងស្រាវជ្រាវវែកមុខរកជនល្មើស ដើម្បីកសាងសំណុំរឿងបញ្ជូនទៅតុលាការ អនុវត្តតាមនីតិវិធីច្បាប់ជាធរមាន។
នៅក្នុងឱកាសនេះដែរមេបញ្ជាការតំបន់ប្រតិបត្តិការសឹករងកំពង់ធំបាននាំយកនូវស្បៀងអាហារគ្រឿងឧបភោគបរិភោគ ភេសជ្ជៈ ប្រេងឥន្ធនៈ សម្ភារៈសម្រាប់បម្រើឲ្យវិទ្យុទាក់ទង និងតង់កៅស៊ូតូច ធំ សម្រាប់ធ្វើជម្រកស្នាក់នៅបណ្តោះអាសន្ន ដែលជាអំណោយរបស់នាយឧត្តមសេនីយ៍ ម៉ៅ សុផាន់៕
ដោយ៖ប៊ុន រដ្ឋា
