ប្រធានសាខាពន្ធដារ៖ ការបង់ពន្ធ ជាការរួមចំណែកអភិវឌ្ឍប្រទេសនិងផ្ដល់ផលប្រយោជន៍ចំពោះសង្គមនិងខ្លួនឯង
កំពង់ធំ៖ លោក ជឹម សុវណ្ណ ប្រធានសាខាពន្ធដារខេត្តកំពង់ធំបានបញ្ជាក់ថា ការបង់ពន្ធគឺជាការរួមចំណែកក្នុងការអភិវឌ្ឍន៍ប្រទេសនិងផ្ដល់ផលប្រយោជន៍ចំពោះសង្គមជាតិនិងខ្លួនឯង។លោកថ្លែងបែបនេះក្នុងសិក្ខាសាលាផ្សព្វផ្សាយស្ដីពីពន្ធលើប្រាក់បៀវត្ស ជូនក្រុមប្រឹក្សាខេត្ត រដ្ឋបាលខេត្ត មន្ទីរអង្គភាពជុំវិញខេត្ត កាលពព្រឹកថ្ងៃទី២១ ខែមិថុនា ឆ្នាំ២០២៤ នៅសាខាពន្ធដារខេត្តកំពង់ធំ។
លោក ជឹម សុវណ្ណ បន្តថា អត្ថប្រយោជន៍នៃការបង់ពន្ធ គឺសម្រាប់សាងសង់ ហេដ្ឋារចនាសម្ព័ន្ធ ស្ពាន សាលារៀន ផ្លូវថ្នល់ មន្ទីរពេទ្យ ប្រព័ន្ធធារាសាស្ត្រ អគារសាធារណៈផ្សេងៗ សម្រាប់បម្រើផលប្រយោជន៍រួមជូនប្រជាជន។ ការការពារ សណ្ដាប់ធ្នាប់សន្តិសុខ និងធានានូវសេវាសាធារណៈទាំងឡាយសម្រាប់បម្រើប្រជាពលរដ្ឋក្នុងសហគមន៍។ ការបើកប្រាក់បៀវត្សជូនមន្ត្រីរាជការ គ្រូបង្រៀន គ្រូពេទ្យ កងកម្លាំងប្រដាប់អាវុធគ្រប់ប្រភេទ និងនិវត្តន៍ជន។ ការផ្ដល់សេវាវិស័យអប់រំ វិស័យសុខាភិបាល សន្តិសុខសង្គម សណ្ដាប់ធ្នាប់សាធារណៈ គាំពារសង្គម ឧបត្ថម្ភគ្រួសារក្រីក្រ និងជនងាយរងគ្រោះ។បង្កើតថវិកាបម្រុងសម្រាប់ការពារគ្រោះអាសន្ន វិបត្តិសេដ្ឋកិច្ចផ្សេងៗ សុខុមាលភាព និងលើកកម្ពស់សមត្ថភាពសង្គម ។កាត់បន្ថយជំនួយនិងកម្ចីបរទេស ជាដើម។
បើតាមលោកប្រធានសាខាគយខេត្តបញ្ជាក់ កម្ពុជាបានកំណត់យកនូវការបង់ពន្ធអាករចំនួន១៣ប្រភេទរួមមាន៖ ១.ពន្ធលើប្រាក់ចំណូល, ២.ពន្ធលើប្រាក់បៀវត្ស, ៣.ពន្ធលើតម្លៃបន្ថែម,៤.អាករពិសេស, ៥.អាករសម្រាប់បំភ្លឺសាធារណៈ, ៦.អាករលើការស្នាក់នៅ, ៧.ពន្ធប៉ាតង់, ៨.ពន្ធលើផ្ទាំងផ្សព្វផ្សាយ,៩.ពន្ធលើថ្លៃឈ្នួលអចលនទ្រព្យ,១០.ពន្ធលើអចលនទ្រព្យ,១១.ពន្ធប្រថាប់ត្រា. ១២.ពន្ធលើដីធ្លីមិនបានប្រើប្រាស់និង ១៣.ពន្ធលើមធ្យោបាយដឹកជញ្ជូន៕
ដោយ៖ប៊ុនរដ្ឋា
