ឧត្តមសេនីយ៍ទោ សោម ស៊ុន ដឹកនាំកម្លាំងចម្រុះត្រួតពិនិត្យការកាប់ទន្ទ្រានព្រៃឈើនៅតំបន់ត្រពាំងបាញ់ចាម
កំពង់ធំ៖ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបទល្មើសធនធានធម្មជាតិក្នុងភូមិសាស្ត្រខេត្តកំពង់ធំកាលពីព្រឹកថ្ងៃទី២១ ខែមិថុនា បានដឹកនាំកងកម្លាំងចម្រុះទៅត្រួតពិនិត្យសកម្មភាពការកាប់ទន្ទ្រានព្រៃឈើយកដីរដ្ឋធ្វើកម្មសិទ្ធិ ពីសណាក់ក្រុមជនល្មើសមួយចំនួននៅក្នុងភូមិសាស្ត្រតំបន់ត្រពាំងបាញ់ចាមក្នុងសហគមន៍ក្បាលដូនក្រី នៃឃុំមានរិទ្ធ ស្រុកសណ្តាន់ ខេត្តកំពង់ធំ ។
លោក លី ស្រេង អនុប្រធានមន្ទីរបរិស្ថានខេត្តកំពង់ធំប្រចាំការនៅតំបន់ព្រៃឡង់ បានបញ្ជាក់ថា តំបន់ដែលមានការកាប់បំផ្លាញនេះមានឈ្មោះហៅថា តំបន់ជាំរឹម និងតំបន់ត្រពាំងបាញ់ចាម ស្ថិតក្នុងព្រៃសហគមន៍ក្បាលដូនក្រី ដែលមានផ្ទៃដីជាង ១៣ ហិកតា នៅពីរទីតាំង ។ផ្ទៃដីជាង១៣ហិកតា ជាផ្ទៃដីកាប់ទន្ទ្រានថ្មី នៅក្នុងចន្លោះមុនពេលចូលឆ្នាំថ្មីប្រពៃណីខ្មែរ មុនពេលកងកម្លាំងចម្រុះការពារទប់ស្កាត់ និងបង្ក្រាបបទល្មើសធនធានធម្មជាតិចុះមកបង្រ្កាប។
ឧត្តមសេនីយ៍ទោ សោម ស៊ុន បានសម្ដែងការសោកស្ដាយចំពោះការបាត់បង់នូវធនធានធម្មជាតិដោយសារជនល្មើសមួយចំនួន និងបានណែនាំដល់មន្ត្រីជំនាញដែលមានការពាក់ព័ន្ធ រួមជាមួយកងកម្លាំងចម្រុះ ត្រូវគ្រប់គ្រងឱ្យបាននូវផ្ទៃដីដែលបានប្រមូលយកពីជនល្មើសឱ្យបានគង់វង្សនិងត្រូវស្រាវជ្រាវរកមុខសញ្ញាជនល្មើសដើម្បីកសាងសំណុំរឿងបញ្ជូនទៅតុលាការដោយគ្មានការលើកលែងឡើយ។
នៅក្នុងឱកាសនេះដែរ ឧត្តមសេនីយ៍ទោ សោម ស៊ុន បានប្រគល់ស្បៀងអាហារ ប្រេងឥន្ធនៈ ភេសជ្ជៈ អាវភ្លៀង តង់កៅស៊ូ និងសម្ភារៈប្រើប្រាស់មួយចំនួន ដែលជាអំណោយរបស់នាយឧត្ដមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ជូនដល់កងកម្លាំងចម្រុះដែលកំពុងបំពេញបេសកកម្មការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្រ្តខេត្តកំពង់ធំ៕ដោយ៖ប៊ុនរដ្ឋា
