អភិបាលខេត្តបាត់ដំបង បញ្ជាឱ្យឃ្លុំរក្សាទុកព្រៃលិចទឹកតំបន់២និងចាត់វិធានការច្បាប់ដល់អ្នកកាន់កាប់និងបន្តទន្ទ្រានដីតំបន់៣
បាត់ដំបង៖ឯកឧត្តម សុខ លូ អភិបាលខេត្តបាត់ដំបង បានដាក់បទបញ្ជាឱ្យឃ្លុំរក្សាទុកព្រៃលិចទឹកតំបន់២ និងអនុវត្តវិធានការច្បាប់ ចំពោះអ្នកដែលនៅតែបន្តបំពានទន្រ្ទានកាន់កាប់ដីតំបន់៣ដោយមិនត្រូវលើកលែងដល់អ្នកដែលល្មើសហួសបន្ទាត់ក្រហមទៀតឡើយ ។លោកថា ត្រូវតែមានចំណាត់ការច្បាប់ជាដាច់ខាត។
ក្នុងកិច្ចប្រជុំស្ដីពីការទប់ស្កាត់ពីការបន្តទន្រ្ទានកាន់កាប់ដីរដ្ឋក្នុងតំបន់ដែនព្រៃលិចទឹក នៃ ស្រុកទាំង៤នៅជុំវិញបឹងទន្លេសាប ក្នុងភូមិសាស្រ្តខេត្តបាត់ដំបងកាលពីព្រឹកថ្ងៃទី២៥ ខែមិថុនា ឆ្នាំ២០២៤ នៅសាលាខេត្តបាត់ដំបង ឯកឧត្តម សុខ លូ បានបញ្ជាក់ថា អាជ្ញាធរស្រុក ឃុំពាក់ព័ន្ធនៅជុំវិញតំបន់បឹងទន្លេសាប ត្រូវតែពង្រឹងការទប់ស្កាត់ ការកាប់បំផ្លាញព្រៃលិចទឹកនៅតំបន់២ និងអនុវត្តឱ្យខាងតែបាននូវវិធានការច្បាប់ឱ្យបានម៉ឺងមាត់ចំពោះអ្នកដែលនៅតែបន្តទន្រ្ទានកាន់កាប់ដីព្រៃលិចទឹកតំបន់៣។
ស្រុកទាំងបួនដែលនៅជាប់នឹងបឹងទន្លេសាបមាន ស្រុកមោងឫស្សី ស្រុកសង្កែ ស្រុកឯកភ្នំ និងស្រុកថ្មគោល។បទបញ្ជារបស់ឯកឧត្តមអភិបាលខេត្តបានធ្វើឡើងបន្ទាប់ពី ក្រសួងរៀបចំដែនដី នគរូបនីយកម្ម និងសំណង់ បានរកឃើញផ្ទៃដី ជាងមួយពាន់ហិកតា ស្ថិក្នុងភូមិសាស្រ្តខេត្តបាត់ដំបង ត្រូវបានជនខិលខូចនៅតែបន្តចូលទៅទន្រ្ទានកាន់កាប់ជាបន្តបន្ទាប់ហួសព្រំប្រទល់ ដែលត្រូវបានកំណត់ និងសម្រេចរួច។
ឯកឧត្តមអភិបាលខេត្តបាត់ដំបងបានសង្កត់ធ្ងន់ទៀតថា ក្រសួងរៀបចំដែនដី នគរូបនីយកម្មនិងសំណង់បានចាត់ទុកការទន្រ្ទាប់កាន់កាប់ដីព្រៃលិចទឹកដោយខុសច្បាប់កើតមានឡើងសារជាថ្មីនេះ បង្កឱ្យមានផលប៉ះពាល់យ៉ាងធ្ងន់ធ្ងរ ដល់ធនធានធម្មជាតិ មច្ឆជាតិ ជីវៈចម្រុះ និងជាពិសេសប្រព័ន្ធអេកូឡូស៊ីរបស់បឹងទន្លេសាប ទាំងមូលទៀតផង។
តំបន់បឹងទន្លេសាប ចែកចេញជា ៣តំបន់ ។គឺ៖តំបន់១ជាតំបន់ភូមិឋានរបស់ប្រជាពលរដ្ឋអាចចុះបញ្ជីដីធ្លីនិងផ្តល់បណ្ណកម្មសិទ្ធិជូនប្រជាពលរដ្ឋបាន។តំបន់២.ជាតំបន់ទ្រនាប់ស្ថិតនៅចន្លោះតំបន់១ និងតំបន់៣ ដែលតំបន់នេះ រដ្ឋអាចអនុញ្ញាតផ្តល់សិទ្ធិប្រើប្រាស់ និងអាស្រ័យផលជូនប្រជាពលរដ្ឋបាន។ ដោយឡែក តំបន់៣ គឺជាតំបន់ព្រៃលិចទឹក និងជាតំបន់ត្រូវបានហាមឃាត់មិនឱ្យប៉ះពាល់ដាច់ខាត។
គប្បីជម្រាបជូនថា កាលពីថ្ងៃទី៣ ខែឧសភា ឆ្នាំ២០២៣ រាជរដ្ឋាភិបាលកម្ពុជា បានចេញអនុក្រឹត្យកាត់ឆ្វៀលផ្ទៃដីទំហំ១ ៣៥៣ហិកតា៣៤អា ស្ថិតក្នុងភូមិសាស្រ្តឃុំកោះជីវាំង និងឃុំព្រៃចាស់ ស្រុកឯកភ្នំ ខេត្តបាត់ដំបង កាត់ចេញពីតំបន់៣នៃតំបន់ទន្លេសាប ធ្វើអនុបយោគជាដីឯកជនរបស់រដ្ឋ និងផ្ដល់ជាកម្មសិទ្ធិជូនប្រជាពលរដ្ឋចំនួន២ ៩៩៥គ្រួសារ។អនុក្រឹត្យដដែល បានសម្រេចកែសម្រួលផ្ទៃដីតំបន់៣ បញ្ចូលមកជាតំបន់២ មានទំហំ ១០ ៤៣០ហិកតា១៧អា ស្ថិតក្នុងភូមិសាស្រ្តស្រុកថ្មគោល, ស្រុកឯកភ្នំ, ស្រុកសង្កែ និង ស្រុកមោងឫស្សី ខេត្តបាត់ដំបង សម្រាប់ផ្ដល់ជូនប្រជាពលរដ្ឋចំនួន២ ៤០៨គ្រួសារ ដើម្បីបន្តប្រើប្រាស់ និងអាស្រ័យ
ផល។
អនុក្រឹត្យដាច់ដោយឡែកមួយទៀត របស់រាជរដ្ឋាភិបាល ចុះថ្ងៃទី៣ ខែឧសភា ឆ្នាំ២០២៣ ក៏បានសម្រេចកំណត់តំបន់ទ្រនាប់នៃដែនព្រៃលិចទឹក(តំបន់២)នៃតំបន់បឹងទន្លេសាប មានទំហំ ៥៤៤៩៣ហិកតា១៨អា ស្ថិតក្នុងភូមិសាស្រ្តខេត្តបាត់ដំបង៕
( អត្ថបទ-រូបភាព៖ អ៊ុក សំអាន បប. )
