កំពង់ធំ៖ ឯកឧត្តម ដៀប ពីរី ប្រធានក្រុមប្រឹក្សាខេត្ត លោក ទូច សុខា អភិបាលរងខេត្តឯកឧត្តម ងួន រតនៈ អភិបាល​ខេត្តកំពង់ធំ បានអញ្ជើញចូលរួមទិវាអន្តរជាតិប្រយុទ្ធប្រឆាំង​គ្រឿងញៀនកាលពីព្រឹកទី២៦ ខែមិថុនា ឆ្នាំ២០២៤ នៅទីតាំង​សួនស្ទឹងសែន ខេត្តកំពង់ធំ។

ឧត្តមសេនីយ៍ត្រី ខេន ឈុនគ័រ ស្នងការងខេត្តកំពង់ធំបាន​បង្ហាញអំពីលទ្ធផលការងារប្រយុទ្ធប្រឆាំងគ្រឿងញៀន ឆ្នាំ២០២៣ និងឆមាសទី១ ឆ្នាំ២០២៤ ដោយបានផ្សព្វផ្សាយ​អប់រំ ដើម្បីលើកកម្ពស់ការយល់ដឹង អំពីគ្រោះថ្នាក់ នៃគ្រឿ​ង​ញៀន ខ្លឹមសារអប់រំអំពីគ្រឿងញៀន និងច្បាប់ស្តីពីការត្រួត​ពិនិត្យ​គ្រឿងញៀន តាមគោលដៅងាយរងគ្រោះ សណ្ឋាគារ ផ្ទះសំណាក់ ផ្ទះជួល ខារ៉ាអូខេ ក្រុមហ៊ុន រោងចក្រ សាលារៀន និងបញ្ជ្រាបតាមរយៈគោលនយោបាយភូមិ-ឃុំ-សង្កាត់ មានសុវត្ថិភាពបានចំនួន ១.២៦៤លើក មនុស្សចូលរួម​សរុប៦២២.៣៤០ នាក់ (ស្រី ៤២២.១៧៦ នាក់ )។

ក្នុងឱកាសនោះលោក ទូច សុខា អភិបាលរងខេត្ត​កំពង់ធំបាន​ក្រើនរំលឹកថា យើងត្រូវនិយាយថាទេចំពោះគ្រឿងញៀន ។គ្រឿង​ញៀន​បំផ្លាញអនាគតខ្លួនឯង ក្រុមគ្រួសារ និងសង្គម​ជាតិ​ទាំងមូល។ សូមបងប្អូនប្រជាពលរដ្ឋទាំងអស់ គ្រប់​ស្រទាប់វ័យ គ្រប់​មជ្ឈដ្ឋាន និងគ្រប់វិស័យ ជាពិសេស​សិស្សានុសិស្ស សូមបន្តអនុវត្តស្មារតីជាតិរបស់​យើង​ចាត់ទុកបញ្ហាគ្រឿងញៀនជាបញ្ហារួម ដែលត្រូវចូលរួម​ដោះស្រាយ និងលុបបំបាត់ទាំងអស់គ្នា៕
ដោយ៖ប៊ុន រដ្ឋា