កំពត៖ ថ្លែងនៅក្នុងពិធីបិទការប្រកួតកីឡាមហាជនជ្រើសរើស​ជើងឯកទូទាំងខេត្តប្រចាំឆ្នាំ២០២៤ នៅរសៀលថ្ងៃទី២៩ ខែមិថុនា ឆ្នាំ២០២៤ នៅពហុកីឡដ្ឋានខេត្តកំពតលោក ខៀវ រិទ្ធិភ័ណ្ឌ អភិបាលរងខេត្តកំពតបានអធិប្បាយថា វិស័យអប់រំ​កាយ និងកីឡា​បានរួមចំណែកលើកកម្ពស់សុខភាពនិងសុខុ​មាលភាពសិស្សនិស្សិតប្រជាពលរដ្ឋគ្រប់រូប  និងកាត់បន្ថយ​នូវភាពអសកម្មផ្សេងៗក្នុងសង្គម ជាពិសេសការប្រើប្រាស់​គ្រឿងញៀនជាដើម។ 

លោក ខៀវ រិទ្ធិភ័ណ្ឌ បានបន្តថា កម្ពុជាក្រោមការដឹកនាំ​ដ៏ប៉ិនប្រសប់ និងឈ្លាសវៃរបស់​សម្តេចធិបតី ហ៊ុន ម៉ាណែត សម្តេចបានចាត់ទុកថាការងារអប់រំកាយ និងកីឡាបានដើរ​តួយ៉ាងសំខាន់  និងជាយានក្នុងការអភិវឌ្ឍសង្គម ពីព្រោះ “កីឡាកសាងមនុស្ស  មនុស្សកសាងសង្គម”  ធ្វើឱ្យវិស័យ​កីឡា​មានការរីកចម្រើនគួរឱ្យកត់សម្គាល់ ដោយទទួលបាន​នូវការ​ចាប់​អារម្មណ៍ ,ការចូលរួមគាំទ្រច្រើនពីយុវជន  ហើយ​លទ្ធផលនៃការប្រកួតជាលក្ខណៈអន្តរជាតិមានការប្រែប្រួលជាវិជ្ជមានដោយទទួល​បានការអបអរសាទរពីមហាជន រហូតដល់ថ្នាក់ដឹកនាំរាជរដ្ឋាភិបាល។ 

សូមជម្រាបថា ការប្រកួតកីឡាមហាជនជ្រើសរើសជើង​ឯកទូទាំងខេត្តកំពតមាន៣ប្រភេទកីឡា ៖១-កីឡាបាល់ទាត់ ១២ ក្រុម, ២-កីឡាបាល់បោះ ៥ ក្រុម និង ៣-កីឡាប៉េតង់ ២០ក្រុម សរុបកីឡាករ-កីឡាការិនីដែលបានចូលរួម​ប្រកួតទាំង​អស់​ចំនួន ៣៦៦នាក់(ស្រី២០នាក់)។ ឆ្លងកាត់ការប្រកួតយ៉ាងស្វិតស្វាញជើងឯកបាល់ទាត់មហាជនខេត្តកំពត ២០២៤  ចំណាត់ថ្នាក់លេខ១ បានទៅលើក្រុម​កីឡាករក្លិបកំពង់សំរោង  ,លេខ២ ក្លិបបូកគោ និងទី៣ក្លិបបូរីរ៉ាត់FC៕ដោយ៖ សិលា សារិន