ក្រុមរដ្ឋឥស្លាម IS សម្លាប់មនុស្សជាង ៤ពាន់នាក់ មុនពេលត្រូវកម្ទេចនៅស៊ីរី
បេរូត៖ អ្នកឃ្លាំមើលសង្គ្រាមបាននិយាយកាលពីថ្ងៃសៅរ៍ថា ពួកសកម្មប្រយុទ្ធរដ្ឋអ៊ីស្លាម បានសម្លាប់មនុស្សជិត ៤,១០០នាក់នៅក្នុងទឹកដីស៊ីរី ចាប់តាំងពីឆ្នាំ ២០១៩ មុនពេលដែលក្រុមភេរវករនេះបានបាត់បង់ទីតាំងរឹងមាំចុងក្រោយរបស់ខ្លួននៅក្នុងប្រទេសស៊ីរី។
![](https://asset.ams.com.kh/central/media/2024/06/photo_2024-06-30_12-26-18-1024x823.jpg)
ក្រុមអ្នកឃ្លាំមើលសិទ្ធិមនុស្សស៊ីរីបាននិយាយនៅក្នុងរបាយការណ៍មួយថា ពួកសកម្មប្រយុទ្ធរដ្ឋឥស្លាម IS បានសម្លាប់មនុស្សប្រហែល ៤,១០០នាក់ នៅក្នុងប្រតិបត្តិការជាង ២,៥៥០នាក់ក្នុងតំបន់ដែលគ្រប់គ្រងដោយក្រុមខ្លួនចាប់តាំងពីឆ្នាំ ២០១៩មក។ ក្រុមសង្កេតការណ៍ដែលមានមូលដ្ឋាននៅចក្រភពអង់គ្លេស បានបន្ថែមថា ជនរងគ្រោះបាត់បង់ជីវិតភាគច្រើនជាទាហាន អ្នកស្មោះត្រង់នឹងរដ្ឋាភិបាល និងយុទ្ធជនដែលដឹកនាំដោយជនជាតិឃឺដ ប៉ុន្តែចំនួនអ្នកស្លាប់ក៏មានជនស៊ីវិលចំនួន ៦២៧នាក់ផងដែរ។
![](https://asset.ams.com.kh/central/media/2024/06/photo_2024-06-30_12-26-21-1024x682.jpg)
បើតាមរបាយការណ៍ដដែល ពួករដ្ឋឥស្លាមនេះក៏បានរងការខាតបង់ធ្ងន់ធ្ងរផងដែរ ដោយបានបាត់បង់យុទ្ធជនប្រយុទ្ធរបស់ខ្លួនជាង ២,០០០នាក់ រួមទាំងមេដឹកនាំកំពូលចាប់តាំងពីឆ្នាំ ២០១៩មក។ រីឯរបាយការណ៍របស់អង្គការសហប្រជាជាតិ ដែលបានចេញផ្សាយកាលពីខែមករា បានឱ្យដឹងដែរថា កម្លាំងរួមរបស់ពួកឥស្លាម IS នៅក្នុងប្រទេសអ៊ីរ៉ាក់ និងស៊ីរី មានយុទ្ធជនចន្លោះពី ៣,០០០ ទៅ ៥,០០០នាក់។
គួរបញ្ជាក់ថា ក្រុមរដ្ឋឥស្លាម IS បានវាយលុកទឹកដីស៊ីរី និងអ៊ីរ៉ាក់នៅក្នុងឆ្នាំ ២០១៤ និងចាប់ផ្តើមរជ្ជកាលភេរវកម្មនៅក្នុងខែមិថុនានៃឆ្នាំនោះ។ ហើយនៅក្នុងខែមីនា ឆ្នាំ ២០១៩ ក្រុមរដ្ឋឥស្លាមបានបាត់បង់ទឹកដីចុងក្រោយរបស់ខ្លួននៅក្នុងប្រទេសស៊ីរី ដោយសារតែយុទ្ធនាការយោធាដឹកនាំដោយជនជាតិឃឺដគាំទ្រដោយក្រុមចម្រុះដឹកនាំដោយសហរដ្ឋអាមេរិក៕ ប្រភព៖ AFP ប្រែសម្រួលដោយ៖ ឈឹម ទីណា
![](https://asset.ams.com.kh/central/media/2024/06/photo_2024-06-30_12-26-22-1024x581.jpg)