កំពង់ឆ្នាំង៖ គណៈកម្មាធិការសមាគមអតីតយុទ្ធជនកម្ពុជា​ខេត្តកំពង់ឆ្នាំង កាលពីព្រឹកថ្ងៃទី៣០ ខែមិថុនា ឆ្នាំ២០២៤​បានរៀប​ចំពិធី​អបអរសាទរខួបអនុស្សាវរីយ៍លើកទី១៧ ទិវាអតីតយុទ្ធជនកម្ពុជា ២១ មិថុនា ២០២៤នៅទីបញ្ជាការ តំបន់ប្រតិបត្តិ​ការសឹករង​កំពង់ឆ្នាំង ក្រោមអធិបតីភាពលោក យិន សាវ៉េន អភិបាលរង តំណាង ឯកឧត្តម ស៊ុន សុវណ្ណារិទ្ធិ អភិបាល និងជាប្រធានកិត្តិយស​សមាគមអតីតយុទ្ធជនកម្ពុជា​ខេត្តកំពង់ឆ្នាំង, ឧត្តមសេនីយ៍ត្រី អ៊ុ សុភា មេបញ្ជាការតំបន់​ប្រតិបត្តិការសឹករងកំពង់ឆ្នាំង  ឯក​ឧត្តម​ស្នងការនគរបាលខេត្ត

ក្នុងឱកាសនេះលោក ឈាង ចន្ធី ប្រធានមន្ទីរសង្គមកិច្ច អតីត​យុទ្ធជន និងយុវនីតិសម្បទា និងជាអនុប្រធាន​អចិន្ត្រៃយ៍​គណៈ​កម្មា​ធិការ​សមាគមអតីតយុទ្ធជនកម្ពុជាខេត្តកំពង់ឆ្នាំង បាន​ឡើង​អានសារលិខិតរបស់សម្ដេចមហាបវរធិបតី ហ៊ុន ម៉ាណែត នាយក​រដ្ឋមន្ត្រីនៃព្រះរាជាណាចក្រកម្ពុជា និងជាអនុ​ប្រធានទី១ សមាគមអតីតយុទ្ធជនកម្ពុជា ក្នុងឱកាសខួប​លើកទី១៧ ទិវាអតីតយុទ្ធជន​កម្ពុជា ២១ មិថុនា ២០២៤ ដែលជាការដឹងគុណបំណាច់យ៉ាងធំធេងចំពោះវីរយុទ្ធជន យុទ្ធនារី ដែលបានបូជាសាច់ស្រស់ឈាម​ស្រស់ ពលីជីវិត​ដើម្បីបុព្វហេតុជាតិមាតុភូមិ និងប្រជាជនកម្ពុជា ។

ក្នុងពិធីនេះដែរក៏បាននាំយកអង្ករ ១ ៥០០គីឡូក្រាម មី ៦០កេះ ត្រីខ ៦០យួរ ទឹកត្រី ៦០យួរ រួមនិងថវិកាចំនួន ១,៨លានរៀល ដែលជាអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាអនុប្រធានទី១ សមាគម​អតីតយុទ្ធជនកម្ពុជា និងលោកជំទាវបណ្ឌិត ពេជ ច័ន្ទមុន្នី ហ៊ុន ម៉ាណែត ឧបត្ថម្ភដល់បងប្អូនអតីតយុទ្ធជន​ទាំង៦០នាក់ ៕
ដោយ៖សុខ គឹមសៀន