ប៉ារីស៖ ប្រធានាធិបតីបារាំង លោក អេម៉ានុយអែល ម៉ាក្រុង និងសម្ព័ន្ធមិត្តរបស់គាត់ នៅថ្ងៃចន្ទនេះ បានចាប់ផ្តើមយុទ្ធនាការដ៏ខ្លាំងក្លា មួយសប្តាហ៍មុនការបោះឆ្នោតសភាជុំទី២ ដើម្បីទប់ស្កាត់បក្សស្តាំជ្រុលនិយម RN ពីការទទួលជ័យជំនះលើកដំបូងជាប្រវត្តិសាស្រ្ត និងការគ្រប់គ្រងរដ្ឋាភិបាល។

នៅក្នុងសេចក្តីថ្លែងការណ៍មួយ លោក ម៉ាក្រុង បានអំពាវនាវឱ្យមានបង្កើតសម្ព័ន្ធភាពដ៏ទូលំទូលាយមួយ ប្រឆាំងនឹងគណបក្សស្តាំនិយមជ្រុល National Rally (RN) នៅក្នុងការបោះឆ្នោតសភាជុំទី២។

គណបក្សស្តាំនិយមជ្រុល National Rally (RN) របស់លោកស្រី ម៉ារីន ឡឺប៉ែន បានទទួលជ័យជម្នះនៅក្នុងការបោះឆ្នោតសភាបារាំងមុនអាណត្តិជុំទី១ កាលពីថ្ងៃអាទិត្យ ប៉ុន្តែលទ្ធផលចុងក្រោយ នឹងអាស្រ័យលើការចរចាខាងនយោបាយក្នុងពេលប៉ុន្មានថ្ងៃនេះ មុនចូលដល់ការបោះឆ្នោតជុំទី២។

ការបោះឆ្នោតសភាបារាំងជុំទី២ នឹងត្រូវធ្វើឡើងនៅថ្ងៃទី៧ ខែកក្កដាខាងមុខ ហើយបើតាមការស្ទង់មតិរបស់ទូរទស្សន៍បារាំង BFM TV គណបក្ស RN អាចនឹងឈ្នះអាសនៈចំនួន ២៦០ នៃអាសនៈសភាសរុប ៣១០។

សូមបញ្ជាក់ថា ជ័យជំនះរបស់គណបក្ស RN នៅក្នុងបោះឆ្នោតសភាបារាំងជុំទី១ បានបង្ហាញពីការបរាជ័យរបស់លោក ម៉ាក្រុង ដែលជាអ្នកអំពាវនាវឱ្យមានការរៀបចំការបោះឆ្នោតសភាមុនអាណត្តិ បន្ទាប់ពីគណបក្សរបស់គាត់ចាញ់ក្រោមថ្វីដៃបក្សស្ដាំនិយមជ្រុល RN នៅក្នុងការបោះឆ្នោតសភាអឺរ៉ុប កាលពីដើមខែមិថុនា៕

ប្រភព៖ AFP ប្រែសម្រួលដោយ៖ ឈឹម ទីណា