សៀមរាប៖កូនឈើចំនួនមួយពាន់ដើម ត្រូវបានដាំតាម​បណ្តោយ​វិថីព្រះនរោត្តមសីហមុនី ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប ក្នុងសប្ដាហ៍នេះ ដោយយុវជន​កាកបាទក្រហមកម្ពុជាដើម្បីអបអរសាទរខួបលើកទី៧២ រុក្ខទិវា ៩ កក្កដា ២០២៤ក្រោមប្រធានបទ« ព្រៃឈើ​ដើម្បីប្រជាជន និងការអភវិឌ្ឍដោយចិរភាព» ។

ក្នុងកម្មវិធីដែលរៀបចំដោយកាកបាទក្រហមកម្ពុជា និងអាជ្ញាធរ​ជាតិអប្សរាលោក ពិត ចំណាន សមាជិក​គណៈកម្មាធិការកណ្តាល កាកបាទក្រហមកម្ពុជាមាន​ប្រសាសន៍ថា ថ្ងៃនេះគឺជាថ្ងៃដំបូង ឆ្នាំដំបូងនៃការចាប់ផ្តើម ដោយយុវជនកាកបាទក្រហមកម្ពុជា និង​ចាប់​ផ្តើមយុទ្ធនាការ​ដាំដើមឈើឱ្យបាន១០០០ដើមក្នុងមួយឆ្នាំរៀងរាល់ឆ្នាំ ។លោកបន្តថា ការដាំដើមឈើ នៅក្នុងយុទ្ធនាការនេះ គឺអនុវត្ត​តាមផែនការដែលបានដាក់ចេញក្នុងសេចក្តីថ្លែងការណ៍រាជធានីភ្នំពេញ ក្នុងកិច្ចប្រជុំថ្នាក់ដឹកនាំលើកទី២០ នៃសមាគម​ជាតិកាកបាទក្រហម អឌ្ឍចន្ទក្រហម ភូមិភាគអាស៊ីអាគ្នេយ៍ កាលពីឆ្នាំ២០២៣ កន្លងទៅ និងស្រមតាមប្រធានបទ រួមគ្នាជាមួយ​កាកបាទក្រហមកម្ពុជា ដើម្បីសហគមន៍ មានសុខភាព​ល្អ និងមានភាពធន់នឹងអាកាសធាតុ ខួប១៦១ ទិវាពិភពលោកកាកបាទ​ក្រហម និងអឌ្ឍចន្ទក្រហម ៨ ឧសភា ២០២៤ផងដែរ។

សូមជម្រាបថា ចូលរួមក្នុងសកម្មភាពដាំកូនឈើនេះដែរមាន​លោកស្រី ទុយ ជិ ប្រាក់ សោភ័ណ អនុប្រធានគណៈកម្មាធិការ​សាខា​កាកបាទក្រហមកម្ពុជា ខេត្តសៀមរាប លោក ឡុង កុសល់ អគ្គនាយករងអាជ្ញាធរជាតិអប្សរា និងមានការចូលរួមពី​គណៈកម្មាធិការ​កាកបាទក្រហមកម្ពុជា មកពីសាខា ខេត្តបាត់ដំបង បន្ទាយមានជ័យ ឧត្តរមានជ័យ កំពង់ធំ និងខេត្តព្រះវិហារ ផងដែរ៕

ដោយ៖ ប៊ុន រដ្ឋា