ខេត្តបាត់ដំបងចាប់ផ្ដើមយុទ្ធនាការ”ផ្ទះ១ខ្នងដើមឈើ១ដើម” ទូទាំងខេត្ត
បាត់ដំបង៖យុទ្ធនាការ”ផ្ទះ១ខ្នង ដើមឈើ១ដើម”ត្រូវបានចាប់ផ្ដើមនៅទីប្រជុំជនក្រុង ស្រុក ទាំង១៤នៅទូទាំងខេត្តបាត់ដំបង កាលពីថ្ងៃទី១១ ខែកក្កដាឆ្នាំ២០២៤នេះ។ដោយឡែកឯកឧត្តម សុខ លូ អភិបាលខេត្តបាត់ដំបងបានអញ្ជើញចូលរួមបើកយុទ្ធនាការនេះនៅក្នុងក្រុងបាត់ដំបង ដែលជាចំណុចស្នូលនៃយុទ្ធនាការ។កូនឈើចម្រុះចំនួន២៥ ០០០ ដើមក៏ត្រូវបានត្រៀមសម្រាប់យុទ្ធនាការបង្កើតភាពបៃតង និងសោភណភាពទីក្រុងនេះផងដែរ។
ពីកណ្ដាលប្រជុំជននៃខេត្តជង្រុករបស់កម្ពុជា លោក លាង វាសនា អភិបាលក្រុងបាត់ដំបងបានប្រាប់ទៅអ្នកចូលរួមដែលកាន់កូនឈើនៅក្នុងដៃថា យុទ្ធនាការ“ផ្ទះ១ខ្នងដើមឈើ១ដើម”ក្នុងក្រុងបាត់ដំបងថ្ងៃនេះផ្តើមចេញពីទីប្រជុំជននិងតាមដងផ្លូវជាតិសំខាន់ៗដែលឆ្លងកាត់ក្រុងបាត់ដំបង ក្នុងគោលបំណង ប្រែក្លាយទីក្រុងបាត់ដំបង ជាទីក្រុងបៃតង។
ក្នុងពិធីដាំកូនឈើនៃយុទ្ធនាការនានេះក្រុងបាត់ដំបង នឹងដាំដើមឈើចំនួនបីប្រភេទ ស្មើនឹង ៥៥៨ដើមក្នុងនេះ ឈើដើមធ្នង ចំនួន ២៥៦ដើម, ដើមត្របែកព្រៃ ចំនួន ២១០ដើម និងដើមក្ងោក ចំនួន ៩២ដើម។
ចំណែកឯកឧត្តម សុខ លូ អភិបាលខេត្តបាត់ដំបងបញ្ជាក់ថា យុទ្ធនាការ”ផ្ទះ១ខ្នងដើមឈើ១ដើម” គឺចាប់ផ្ដើមដាំដើមឈើ នៅក្នុងក្រុងបាត់ដំបង និងទីប្រជុំជនស្រុកទាំង១៣ នៅទូទាំងខេត្តបាត់ដំបង។
ឯកឧត្តមអភិបាលខេត្តបាត់ដំបង បានបញ្ជាក់បន្ថែមថា យុទ្ធនាការនេះ មិនមែនធ្វើតែមួយថ្ងៃនោះទេ តែនឹងបន្តដាំដើមឈើទាំងនេះរហូតទាល់តែគ្រប់ផែនការ។សម្រាប់នៅក្នុងក្រុងបាត់ដំបង នឹងត្រូវដាំដើមឈើប្រមាណ ២៥ ០០០ដើម។
សកម្មភាពដាំដើមឈើនៅខេត្តបាត់ដំបង បានធ្វើឡើងពីរថ្ងៃបន្ទាប់ពីពិធីថ្នាក់ជាតិបានប្រារព្ធនៅថ្ងៃទី៩ ខែកក្កដា នាឃុំលាយបូរ ស្រុកត្រាំកក់ ខេត្តតាកែវក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណាព្រះមហាក្សត្រនៃព្រះរាជាណាចក្រកម្ពុជា ។
តាមរយៈយុទ្ធនាការ”ផ្ទះមួយខ្នងដាំដើមឈើមួយដើម” ឯកឧត្តមអភិបាលខេត្តបាត់ដំបងសង្ឃឹមយ៉ាងមុតមាំថាក្រុងបាត់ដំបងកាន់តែមានសម្រស់ស្រស់ស្អាត បន្ទាប់ពីដើមឈើ ដែលបានដាំទាំងនោះលូតលាស់ល្អ។វាកាន់តែធ្វើឱ្យក្រុងបាត់ដំបង ប្រែក្លាយ”ជាទីក្រុងបៃតង” ដ៏គួរទាក់ទាញដល់ភ្ញៀវទេសចរជាតិ និងអន្តរជាតិឱ្យមកទស្សនាខេត្តបាត់ដំបងមានចំនួនកើនឡើង៕
( អត្ថបទ-រូបភាព៖ អ៊ុក សំអាន បប. )