តាមប្រមាញ់រូបភាពតាមព្រៃភ្នំ ថតរូបសត្វកម្រៗ និងជីវចម្រុះ ដើម្បីបង្ហាញពលរដ្ឋខ្មែរ និងពិភពលោកបានស្គាល់
(ភ្នំពេញ)៖ ការប្រមាញ់រូបភាពដ៏កម្រ និងបង្ហាញពីភាពស្រស់ស្អាតទាំងសត្វព្រៃ ជីវចម្រុះ និង ទេសភាពព្រៃភ្នំ ទាំងនេះ គឺកើតចេញពីការចង់ឱ្យពលរដ្ឋខ្មែរបានស្គាល់ពីរបស់មានតម្លៃដែលមិនអាចកាត់ថ្លៃបានកំពុងបង្កប់នៅតាមព្រៃភ្នំ ។ ការគាស់រំលើងឱ្យបានឃើញពីសត្វព្រៃកម្រៗកន្លងមកគឺត្រូវបាន”ក្រុមអ្នកប្រមាញ់រូបភាពជីវចម្រុះនៅកម្ពុជា” បង្ហោះតាមបណ្តាញសង្គម និងបានដាក់តាំងបង្ហាញឱ្យឃើញបន្តបន្ទាប់។
រូបភាពទាំងនេះបាន បង្ហាញអំពីសត្វស្លាបដ៏ស្រស់ស្អាត រូបភាពដើមផ្កា ព្រៃប្រឹក្សា និងទេសភាពដ៏ស្រស់ត្រកាលតាមព្រៃភ្នំដែលបានបង្ហាញតាមរយៈទំព័រ ហ្វេសប៊ុក ព្រមទាំងបណ្តាញផ្សព្វផ្សាយមួយចំនួនផង។
ក្រុមអ្នកប្រមាញ់រូបភាពជីវចម្រុះនៅកម្ពុជាបានឱ្យដឹងថា៖ រូបភាពអស្ចារ្យ និងបង្កប់ទៅដោយអត្ថន័យទាំងនេះមិនមែនបានដោយងាយៗនោះទេ តាមពិតវាត្រូវការតស៊ូ ចូលព្រៃភ្នំ ដេកក្នុងព្រៃ ឆ្លងកាត់ជ្រោះដងអូរ និងពេលខ្លះដេកសម្រាកត្រាំត្រែងក្នុងព្រៃរាប់ថ្ងៃ។
លោក លី សុវណ្ណា សមាជិកនៃក្រុមអ្នកប្រមាញ់រូបភាពជីវចម្រុះដែលបានមកចូលរួមក្នុងពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និងវេទិកាកេសរកូលជាតិលើកទី៤ នៅមុខទីស្តីការក្រសួងបរិស្ថានចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៤ បានឱ្យដឹងថា៖ដោយសារតែចិត្តស្រឡាញ់សត្វស្លាប ពិសេសសត្វកម្រៗនៅកម្ពុជាទើបរូបលោកបានស្ម័គ្រចិត្តចូលរួមថតរូបរយៈពេលជាង២ឆ្នាំមកនេះ ហើយបើគិតពីរូបសត្វស្លាបប្លែកៗពីគ្នាមិនតិចជាង ៣០០ទៅ ៤០០ប្រភេទទេ។ សម្រាប់ការថតរូបទៀតសោតដែលចង់បានរូបល្អៗក៏ត្រូវការផ្គួបផ្សំបទពិសោធន៍និង រួមផ្សំម៉ាស៊ីនថត និងឧបករណ៍ទំនើបៗផងដែរ។
លោក សួង ម៉ារឌី ដែលជាអ្នកប្រមាញ់រូបភាពស្ម័គ្រចិត្តដ៏សំខាន់មួយរូបទៀតស្ថិតក្នុងក្រុមអ្នកប្រមាញ់រូបភាពជីវចម្រុះនៅកម្ពុជានេះដែរបានឱ្យដឹងថា ៖ ក្រុមរបស់លោកមានសមាជិកចម្រុះគ្នាដែលបានបង្កើតក្រុមលើកដំបូងនៅថ្ងៃទី១ ខែមករា ឆ្នាំ២០២២ដោយដំបូងឡើយមានគ្នា៩នាក់ ហើយរហូតមកដល់ពេលនេះមានគ្នាចំនួនសរុបជាង ៣០នាក់។ សម្រាប់គិតរហូតមកដល់ពេលនេះសត្វស្លាបលោកថតបានចំនួនជាង៣០០ប្រភេទក្នុងចំណោមសត្វជាង ៦០០ប្រភេទនៅកម្ពុជា។
តាមរយៈការថតរូបភាពនេះដែរត្រូវបានលោក សួង ម៉ារឌី បានឱ្យដឹងថា នៅបរទេសគេមានអ្នកថតបែបនេះច្រើនតែសម្រាប់នៅកម្ពុជាយើងគឺមានតិចតួចបំផុត ហើយពេលនេះក្រុមលោកបាននិងកំពុងខិតខំយ៉ាងណាដើរប្រមាញ់រូបភាពមកបង្ហាញ ដើម្បីឱ្យពិភពលោកបានស្គាល់ពីសត្វព្រៃក៏ដូចជាជីវចម្រុះនៅកម្ពុជា ដែលជាផ្នែកមួយសម្រាប់ទាក់ទាញលើវិស័យទេសចរណ៍ផងដែរ ។
ក្នុងនាមជាអ្នកប្រមាញ់រូបភាពស្ម័គ្រចិត្ត លោក សួង ម៉ារឌីបានឱ្យដឹងផងថា ៖ ឆ្លងកាត់ការដើរប្រមាញ់រូបភាពកន្លងមករូបលោកជួបឧបសគ្គច្រើនរាប់មិនអស់ ពិសេសការសម្រាកតាមព្រៃភ្នំ និង ការដើរផ្សងព្រេងគ្រប់ទីកន្លែងដើម្បីព្រោះតែបានរូបភាព។
លោកបានប្រាប់ឱ្យដឹងបន្ថែមថា៖សម្រាប់រូបភាពនីមួយៗដែលថតបានចាំបាច់ត្រូវតែមានម៉ាស៊ីនថតបែបទំនើប និងភាពប៉ិនប្រសព្វក្នុងការថតរួមផ្សំ។សម្រាប់រូបភាពសត្វព្រៃពិសេសសត្វស្លាបត្រូវការប្រើពេលខ្លីបំផុតដើម្បីចាប់រូបភាពបានស្រស់ស្អាតបំផុត ។ រូបភាពកម្រខ្លះនៅពេលថតបានត្រូវចាត់ទុកថា សំណាងពីព្រោះថា សកម្មភាពរបស់សត្វ និងបូករួមផ្សំជាមួយទេសភាពគឺជាការពិបាកបំផុតក្នុងការថតបានរូបដ៏អស្ចារ្យបានខ្លាំងណាស់។
លោកបានបញ្ជាក់ប្រាប់ដែរថាក្នុងចំណោមសមាជិកក្រុមអ្នកប្រមាញ់រូបភាពជីវចម្រុះនៅកម្ពុជាទាំងអស់ម្នាក់ៗថតរូបបានមិនតិចជាង៣០០ទៅ៥០០រូបទេ។រូបទាំងអស់សុទ្ធមានគុណភាព និងរូបសត្វ រុក្ខជាតិប្រភេទខុសៗគ្នា។
គួរបញ្ជាក់ថាបើយោងតាមរបាយការណ៍ក្រសួងបរិស្ថានបានឱ្យដឹងនាកកន្លងមកថា៖កម្ពុជាសម្បូរទៅដោយ សក្តានុពលធនធានជីវៈចម្រុះដ៏សម្បូរបែប។នៅភាគខាងជើង និងឦសាននៃប្រទេស មានប្រភេទព្រៃល្បោះ និងព្រៃស្រោងកំពុងគ្របដណ្តប់ នៅភាគនិរតី មាននូវព្រៃរងទឹកភ្លៀងនៃតំបន់ជួរភ្នំក្រវ៉ាញ និងនៅភាគកណ្តាល មានប្រព័ន្ធផ្លូវទឹកដ៏ធំធេងនៃបឹងទន្លេសាប និងទន្លេមេគង្គ។ តំបន់ភូមិសាស្ត្រនីមួយៗ បង្កើតបាននូវភាពសម្បូរបែបនៃធនធានជីវៈចម្រុះ ដែលក្នុងនោះ គេឃើញមានរុក្ខជាតិចម្រុះតូចធំប្រមាណ ២៣០០ប្រភេទ និងប្រភេទសត្វដូចជា ថនិកសត្វ ១២៣ប្រភេទ សត្វស្លាប ៥៤៥ប្រភេទ ឧរង្គសត្វ ៨៨ប្រភេទ ត្រី ៨៧៤ប្រភេទ និងថលជលិក ៦៣ប្រភេទ ជាដើម ៕
អត្ថបទ ៖ ម៉ាដេប៉ូ
រូបភាព ៖ សួងពិសិដ្ឋ
