អនុប្រធានក្រុមការងាររាជរដ្ឋាភិបាលចុះមូលដ្ឋាននាំទៀនវស្សាប្រគេនដល់វត្តចំនួនពីរ
កំពង់ធំ៖ ឧត្តមសេនីយ៍ទោ សោម ស៊ុន អនុប្រធានក្រុមការងាររបស់រាជរដ្ឋាភិបាលចុះមូលដ្ឋាននិងជាប្រធានក្រុមការងាររបស់រាជរដ្ឋាភិបាលចុះមូលដ្ឋានឃុំដងកាំបិត ស្រុកសណ្ដាន់ ខេត្តកំពង់ធំ កាលពីព្រឹកថ្ងៃទី១១ ខែកក្កដា ឆ្នាំ២០២៤ បានយកទៀនវស្សាទៅប្រគេនព្រះសង្ឃដែលនឹងគង់ចាំព្រះវស្សានៅវត្តចំនួនពីរគឺ វត្តស្រែវាលខាងកើត និងវត្តស្រែវាលខាងលិច ។
ក្នុងឱកាសនេះលោក គង់ ឈុំ ក្រុមប្រឹក្សាឃុំដងកាំបិត បានអរគុណឧត្តមសេនីយ៍ទោ សោម ស៊ុន ដែលតែងតែបានជួយដោះស្រាយនូវរាល់ការលំបាកខ្វះខាត របស់ក្រុមគ្រួសារអតីតយុទ្ធជន និងប្រជាជន ដែលមានជីវភាពលំបាកខ្វះខាត ចូលរួមកសាងសមិទ្ធផលនានា ការផ្គត់ផ្គង់ចង្ហាន់នៅវត្តស្រែវាលខាងកើតរហូតមក។
ឧត្តមសេនីយ៍ទោ សោម ស៊ុន បានកោតសរសើរអាជ្ញាធរដែនដី ព្រះតេជគុណ ជុំ ម៉ុត ព្រះចៅអធិការវត្តស្រែវាលខាងកើត និងព្រះចៅអធិការវត្តស្រែវាលខាងលិច ដែលព្រះអង្គបានខិតខំដឹកនាំការកសាងសមិទ្ធផលនានា ដែលកើតឡើងដោយសារប្រទេសមានសុខសន្តិភាព និងមានការឯកភាពជាតិក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន និងបន្តដោយសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា ។
ជាមួយនឹងទៀនព្រះវស្សា វត្តទាំងពីរក៏បានទទួលនូវគ្រឿងឧបភោគបរិភោគ និងបច្ច័យមួយចំនួនធំផងដែរ៕
ដោយ៖ ប៊ុន រដ្ឋា
