ឆមាសទី១ឆ្នាំ២០២៤ សំណង់ខេត្តកំពតមាន៧៦គម្រោង តម្លៃទុនវិនិយោគជាង៧លានដុល្លារ
កំពត៖លោក ស៊ឹម សុខជា អនុប្រធានមន្ទីររៀបចំដែនដី នគររូបនីយកម្ម សំណង់ និងសូរិយោដីខេត្ត បានឱ្យដឹងថា ខេត្តកំពតក្រោមការដឹកនាំរបស់ឯកឧត្តម ម៉ៅ ធនិន វិស័យសំណង់នៅតែមានដំណើរការល្អពីមួយឆ្នាំទៅមួយឆ្នាំ ដោយសារតែអាជ្ញាធរខេត្តយកចិត្តទុកដាក់ លើការងារអភិវឌ្ឍន៍ហេដ្ឋារចនាសម្ព័ន្ធផ្សេងៗ និងការកែលម្អសោភណភាពក្រុង។
លោកស៊ឹម សុខជា អនុប្រធានមន្ទីររៀបចំដែនដី បានបន្ថែមថា សម្រាប់ឆមាសទី១ ឆ្នាំ២០២៤ សំណង់ខេត្តកំពតមាន៧៦គម្រោង មានផ្ទៃក្រឡាសរុបស្មើនឹង ២១ ៧៩៨ ម៉ែត្រការ៉េ គិតជាតម្លៃទុនវិនិយោគប៉ាន់ស្មានស្មើនឹង ៧ ៣២០ ៦០០ ដុល្លារ ។ក្នុងនោះគម្រោងមានលិខិតអនុញ្ញាតចំនួន៦៩គម្រោង មានផ្ទៃក្រឡាសរុបស្មើនឹង២០ ៧៤៤ ម៉ែត្រការ៉េ បើគិតជាតម្លៃទុនវិនិយោគប៉ាន់ស្មានស្មើនឹង ៦ ៩៥២ ០៥០ ដុល្លារ។ចំណែកសំណង់គ្មានលិខិតអនុញ្ញាតសាងសាង់សរុប៧គម្រោង ផ្ទៃក្រឡាសរុបស្មើនឹង ១០៥៣ ម៉ែត្រការ៉េ បើគិតជាតម្លៃទុនវិនិយោគប៉ាន់ស្មានស្មើនឹង ៣៦៨ ៥៥០ ដុល្លារ ។
ពាក់ព័ន្ធនឹងវិស័យសំណង់ លោក យ៉ុន ឡុច វិស្វករប្រចាំការដ្ឋានសំណង់មួយកន្លែងក្នុងក្រុងកំពត ឱ្យដឹងថា បច្ចុប្បន្នវិស័យសំណង់មិនសូវមានសន្ទុះខ្លាំងដូចមុនទេ ប៉ុន្តែនៅខេត្តកំពតសកម្មភាពសំណង់នៅតែមានពិសេសគម្រោងធំៗ។ការដ្ឋានសំណង់នីមួយៗ មានការត្រួតពិនិត្យ និងគោរពតាមបទដ្ឋានគតិយុត្តិ និងច្បាប់សំណង់ត្រឹមត្រូវ។
យ៉ាងណាក៏ដោយមន្ត្រីជំនាញស្នើសុំឱ្យអាជ្ញាធរមូលដ្ឋាន ក្រុងស្រុក ឃុំសង្កាត់ បន្តជួយផ្សព្វផ្សាយ ដល់ស្ថាប័ននានា និងប្រជាពលរដ្ឋឱ្យបានយល់ដឹងអំពីច្បាប់សំណង់ ឯកសារបទដ្ឋានគតិយុត្តិ និង គោរពតាមនីតិវិធីច្បាប់ ឱ្យបានល្អប្រសើរថែមទៀត ដើម្បីធានាដល់សុវត្ថិភាព គុណភាព និងរក្សាប្រយោជន៍ជូនដល់ម្ចាស់សំណង់៕
ដោយ៖ សិលា សារិន