កំពង់ធំ៖ កូនឈើចម្រុះប្រមាណ ៤ ០០០ដើម ត្រូវបាននាំយក​មកដាំនៅក្នុងបរិវេណវត្តពាមមេត្រី ភូមិពោធិ៍ ឃុំត្បែង ស្រុក​កំពង់​ស្វាយ ខេត្តកំពង់ធំ នៅថ្ងៃទី១៦ ខែកក្កដា ឆ្នាំ២០២៤​នេះ។

ក្នុងសកម្មភាពប្រព្រឹត្តិទៅក្រោមប្រធានបទ «ពន្លកបៃតង»​ឯកឧត្តម ខ្វៃ អាទិត្យា អនុរដ្ឋលេខាធិការនិងជាអ្នកនាំពាក្យ​ក្រសួងបរិស្ថាន តំណាងឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាលបានដាក់​ចេញនូវយុទ្ធសាស្ត្រ​បញ្ចកោណ ដំណាក់កាលទី១ ហើយតាមរយៈយុទ្ធសាស្ត្រ​នេះសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានធ្វើការណែនាំ និងចង្អុលបង្ហាញដល់ក្រសួងបរិស្ថាន​ឱ្យរៀបចំឡើងនូវយុទ្ធសាស្ត្រចក្រា ដែលមានសរសរស្ដម្ភបី គឺ ភាពស្អាត ភាពបៃតង និងចីរភាព។

ឯកឧត្តមគូសបញ្ជាក់ថា សសរស្ដម្ភទីមួយ ភាពស្អាត គឺសំដៅ​ធ្វើយ៉ាងណាឱ្យផ្ទះយើង សង្គមយើង ប្រទេសយើងមាន​ភាព​ស្អាត ដើម្បីសុខមាលភាពប្រជាពលរដ្ឋផង ដើម្បីបង្កបរិយា​កាស​ស្រស់ស្រាយស្អាត មាន សណ្តាប់ធ្នាប់ល្អទាក់ទាញ​ភ្ញៀវទេសចរ​និង​វិនិយោគិនមកកម្ពុជាផងដែរ។ ឯកឧត្តមបន្ថែមថា «កាលបើផ្ទះយើង ឬប្រទេសយើងមិនមាន​ភាពស្អាត ពោរពេញដោយសំរាមពាស​វា​លពាសកាលច្បាស់​ណាស់ថា ប្រជាពលរដ្ឋយើងមិនមានសុខុមាលភាព ហើយក៏​មិនមានភ្ញៀវណាម្នាក់ចង់មកលេងផ្ទះយើង ឬប្រទេសយើង​នោះដែរ»។

ឯកឧត្តមបន្តថា ក្រសួងបរិស្ថាន បានជំរុញការដាំដើមឈើ​ឱ្យច្រើន ដើម្បីរក្សានូវកំណើន ជាពិសេសការជំរុញ ការដាំ​ស្តារព្រៃឈើ ដែលជាទិសដៅអាទិភាព បង្កើនគម្រប​ព្រៃឈើឱ្យបាន៦០ភាគរយនៅឆ្នាំ២០៥០ ស្របតាម​យុទ្ធសាស្ត្រ​​បញ្ចកោណ របស់រាជរដ្ឋា​ភិបាលកម្ពុជា និងលើកកម្ពស់ជីវភាពប្រជាពលរដ្ឋ នៅតាមសហគមន៍ រួមទាំងការអភិរក្សជីវចម្រុះដោយចីរភាព។ តាមរយៈនេះ ក្រសួងបរិស្ថានបានដាក់ចេញយុទ្ធនាការថ្ងៃទី១០ តុលា ឆ្នាំ២០២៣ រហូតមកធ្វើការផ្តល់ និងដាំដើមឈើយ៉ាងតិច មួយលានដើម​ក្នុង​មួយឆ្នាំ ចាប់ពីឆ្នាំ២០២៤។

ឯកឧត្តមរំលេចថា ព្រឹត្តិការណ៍ «ពន្លកបៃតង» ប្រារព្ធធ្វើពីថ្ងៃ​ទី១០ដល់ថ្ងៃទី១៦ ខែកក្កដា ឆ្នាំ២០២៤ ដើម្បីផ្សព្វផ្សាយ និងចែកកូន​ឈើជូនសាធារណជនយកទៅដាំ នៅតាម​គេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានា ដោយឥត​គិតថ្លៃ ។ធ្វើបែបនេះ​ដើម្បីផ្សព្វផ្សាយលើកកម្ពស់ការយល់ដឹង ស្ដីពីការដាំឈើ​ឱ្យបានច្រើន ដើម្បីបង្កើនគម្របបៃតងនៅកម្ពុជា និង​ជំរុញការចូលរួមអភិរក្សជីវៈចម្រុះពីគ្រប់ភាគីពាក់ព័ន្ធស្របនឹងយុទ្ធសាស្ត្រចក្រវិស័យបរិស្ថាន ដែលបានដាក់ចេញជា​បន្តបន្ទាប់ និងជាជំហានៗ​ ផ្តោតលើមុំយុទ្ធសាស្ត្រចំនួនបីគឺស្អាត បៃតង និងចីរភាព ក្នុងគោលបំណងចម្បង គឺលើកកម្ពស់សេដ្ឋកិច្ចជាតិ និងជីវភាពប្រជាំពលរដ្ឋនៅតាមតំបន់ការពារធម្មជាតិ ឱ្យទទួលបានប្រាក់ចំណូលខ្ពស់ តាមរយៈភ្ញៀវទេសចរ អ្នកវិនិយោគជាតិ អន្តរជាតិ ដែលនិយម និងស្រឡាញ់ធនធានធម្មជាតិ។

ព្រះភិក្ខុរជិរប្បញ្ញោ គូ សុភាព ព្រះរាជាគណថ្នាក់កិត្តិយស ព្រះសមុហ៍គណរាជធានីភ្នំពេញ និងជាព្រះគ្រូសូត្រស្តាំ វត្តនិគ្រោធវ័ន​គល់ទទឹង មានថេរដិកាថា ការដាំកូនឈើ​ឡើងវិញនិងការចូលរួមថែរក្សាបរិស្ថាន មិនជាសិទ្ធិផ្តាច់​របស់នរណាម្នាក់នោះទេ។ ព្រះភិក្ខុបានអំពាវនាវដល់​ប្រជាពុទ្ធបរិសិទ ឱ្យស្រឡាញ់ភាពស្អាតទាំងអស់គ្នា។

ចំណែកលោក ជា វ៉ាន់ចាន់ អភិបាលរងខេត្តកំពង់ធំ​បានរំលឹកដល់សិស្សានុសិស្ស ត្រូវបណ្តុះផ្នត់គំនិតស្អាត រួមគ្នាថែរក្សាអនាម័យ​បរិស្ថាន នៅជុំវិញខ្លួនយើងឱ្យមាន​ភាពស្រស់ស្អាត រួមគ្នាដាំកូនឈើឡើងវិញ និងកម្ចាត់ផ្នត់​គំនិតមិនល្អឱ្យអស់នៅក្នុងខ្លួនជាដើម។

ចូលរួមក្នុងពិធីនេះដែរ លោក មួង សូនី ប្រធានក្រុមការងារ​សមាគម ១០០ រាត្រីបានថ្លែងថា ការចូលដាំកូនឈើនៅថ្ងៃនេះ​នឹងផ្តល់​ប្រយោជន៍ដល់អ្នកជំនាន់ក្រោយ។

ចំណែកលោក គោរម្យ ដាឡា ប្រធានសមាគមនិស្សិតសន្តិភាព ដើម្បីប្រជាធិបតេយ្យ បានលើកឡើងថា ការដាំ និងថែរក្សា​ព្រៃឈើ​ឱ្យនៅគង់វង្ស ដើម្បីមនុស្សជំនាន់ក្រោយ ហើយត្រូវគិត​ថា ការចូលលើវិស័យបរិស្ថាន គឺជាកាតព្វកិច្ចទាំងអស់គ្នា។ ដូច្នេះ ការបណ្តុះ​ស្មារតីឱ្យរួមគ្នាដាំកូនឈើឡើងវិញ គឺជា​យុទ្ធសាស្ត្រដ៏ល្អសម្រាប់បង្កើនគម្របបៃតងនៅកម្ពុជា៕

ដោយ៖ ង៉ាន់ ទិត្យ
រូបភាព៖ រិន រចនា