គ្រប់គ្រឹះស្ថានសាសនានៅខេត្តកំពត បានត្រៀមរួចរាល់ដើម្បីអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ
កំពត៖មកដល់ពេលនេះគ្រប់គ្រឹះស្ថានសាសនានានាទូទាំងខេត្តកំពតដូចជា វត្តអារាម វិហារ សារ៉ាវ ជាដើម បានត្រៀមលក្ខណៈរួចរាល់ហើយ ដើម្បីអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ ដែលនឹងប្រព្រឹត្តទៅនៅថ្ងៃទី៥ ខែសីហាខាងមុខក្រោមអធិបតី ភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋកម្ពុជា។តាមគម្រោងព្រែកជីកប្រវត្តិសាស្រ្តនេះមានប្រវែងជាង១៨០គីឡូម៉ែត្រដោយឆ្លងកាត់ខេត្តចំនួនបួន គឺខេត្តកណ្ដាល តាកែវ កំពត និងខេត្តកែប ។
លោក នាក់ យិតថូ ប្រធានមន្ទីរធម្មការ និងសាសនា ខេត្តកំពតបានប្រាប់ឱ្យដឹងថា បន្ទាប់ពីបានទទួលការណែនាំពីក្រសួងធម្មការ និងសាសនា និងរដ្ឋបាលខេត្តកំពត,មន្ទីរបានធ្វើការផ្សព្វផ្សាយដល់គ្រឹះស្ថានសាសនា ពុទ្ធសាសនា ឥស្លាមសាសនា គ្រិស្តសាសនា និងសាសនាដទៃទៀតឲ្យត្រៀមលក្ខណៈ ចូលរួមអបអរសាទរការបើកកាដ្ឋានសាងសង់ព្រែកជីកហ្វូណនតេជោនៅថ្ងៃទី៥ ខែសីហា វេលាម៉ោង ៩ និង៩នាទីព្រឹក ។គ្រប់វត្តអារាម វិហារសាសនាទាំងអស់ ត្រូវចងទង់ជាតិ ទង់ជ្វាលា ទង់សាសនា សម្អាតបរិស្ថានទីធ្លាតាមគ្រឹះស្ថាន សាសនានីមួយៗឱ្យបានស្អាតនិងត្រូវវាយរគាំង ទូងស្គរ ទះប៉ោត គោះត្រដោកជាដើម។ល។ ដើម្បីបន្លឺសំឡេង អបអរសាទរ ។លោកបានបន្តថា មកដល់ថ្ងៃនេះ គ្រប់ គ្រឹះស្ថានសាសនាទាំងអស់ ពិសេសតាមវត្តអារាម បានត្រៀមរៀបចំរួចរាល់ហើយ។
ចំណែក ព្រះជលធីវាសី ញ៉ែត ចន្ទតារា ព្រះមេគណខេត្តកំពតមានថេរដីកាថា គ្រប់វត្តបានត្រៀមស្គរ រគាំង និងចងទង់សាសនា ទងជ្វាលារួចរាល់ហើយ ។
ជួបជាមួយទូរទស្សន៍អប្សរា ព្រះសង្ឃនិងប្រជាពលរដ្ឋជាច្រើនអង្គនាក់ បានបង្ហាញអារម្មណ៍រំភើបរីករាយគាំទ្រគម្រោងព្រែកជីកហ្វូណនតេជោ ហើយក៏ត្រៀមខ្លួនរួចជាស្រេចហើយ ដើម្បីចូលរួមអបអរពិធីបើកការដ្ឋាននៅថ្ងៃទី៥ ខែសីហាឆាប់ៗខាងមុខនេះ ។
ដោយឡែករដ្ឋបាលខេត្តកំពតក៏បានណែនាំដល់មន្ទីរ អង្គភាពជុំវិញខេត្ត រដ្ឋបាលក្រុងស្រុក ប្រជាពលរដ្ឋឱ្យរៀបចំទីកន្លែង និង គេហដ្ឋានរបស់ខ្លួនឱ្យបានស្អាតដោយមានចងទង់ជាតិ ទង់ជ្វាលា និងទូងស្គរ ទះប៉ោត បន្លឺសំឡេងអបអរនៅវេលាម៉ោង៩និង៩នាទីថ្ងៃទី៥ ខែសីហា ឱ្យបានកងរំពងឡើង៕
ដោយ៖ សិលា សារិន