រដ្ឋលេខាធិការ៖កង្វះសាលាបណ្តុះបណ្តាលជំនាញវិជ្ជាជីវៈទេសចរណ៍ នៅតែជាបញ្ហាប្រឈម
សៀមរាប៖ឯកឧត្តម ប៉ាក់ សុខុម រដ្ឋលេខធិការក្រសួងទេសចរណ៍បានថ្លែងថា កង្វះសាលាបណ្តុះបណ្តាលជំនាញវិជ្ជាជីវៈទេសចរណ៍ នៅតែជាបញ្ហាប្រឈមមួយក្នុងការផលិតកម្លាំងពលកម្មក្នុងវិស័យមួយនេះ ។ ប៉ុន្តែការបណ្តុះបណ្តាលវិជ្ជាជីវៈទេសចរណ៍ និងកម្មវិធីបណ្តុះបណ្តាលពេញម៉ោង ដែលដំណើរការដោយអង្គការជាតិ-អន្តរជាតិ សមាគមឧស្សាហកម្ម ទេសចរណ៍មួយចំនួន បានក្លាយជាកម្លាំងចលករមួយដ៏សំខាន់ក្នុងការផលិតកម្លាំងពលកម្មនេះ។
ថ្លែងក្នុងពិធីបើកវគ្គបណ្តុះបណ្តាលជំនាញបដិសណ្ឋារកិច្ច វគ្គទី២ដល់យុវជនចំនួន ២០០ នាក់ ដែលរៀបចំដោយក្លឹបទេសចរណ៍ខេត្តសៀមរាបកាលពីព្រឹកថ្ងៃទី២២ ខែកក្កដា ឆ្នាំ២០២៤ ឯកឧត្តម ប៉ាក់ សុខុម បានបន្តថា បច្ចុប្បន្ន មានតែសាលាបណ្តុះបណ្តាលវិជ្ជាជីវៈទេសចរណ៍ និងកម្មវិធីបណ្តុះបណ្តាលពេញម៉ោង ដែលដំណើរការដោយអង្គការជាតិ-អន្តរជាតិ សមាគមឧស្សាហកម្ម ទេសចរណ៍មួយចំនួនប៉ុណ្ណោះ ដែលកំពុងធ្វើការបណ្តុះបណ្តាលអ្នកជំនាញបានប្រមាណ ១,៥០០ ទៅ ២០០០នាក់ក្នុងមួយឆ្នាំ។ឯកឧត្តមបន្តថា ជាផ្នែកមួយនៃដំណោះស្រាយ ,រាជរដ្ឋាភិបាលកម្ពុជា បានអនុញ្ញាតឱ្យក្រសួងទេសចរណ៍បង្កើតសាលាជាតិទេសចរណ៍ចំនួនពីរសាលា នៅរាជធានីភ្នំពេញ និងខេត្តព្រះសីហនុ ដែលមានសមត្ថភាពបណ្តុះបណ្តាល កម្លាំងពលកម្មថ្មីបានប្រមាណ៣៤៥នាក់ ក្នុងមួយឆ្នាំ ចាប់ពីឆ្នាំ២០២៤ តទៅបើតាមការគ្រោងទុក។ ក្នុងន័យនេះ ការចូលរួមរបស់ក្លឹបទេសចរណ៍ខេត្តសៀមរាប គឺបានចូលរួមយ៉ាងសំខាន់ និងសកម្មដល់ការផ្គត់ផ្គង់ជំនាញទេសចរណ៍ក្នុងទីផ្សារការងារបច្ចុប្បន្ន និងការជំរុញតម្រង់ទិសអាជីពដល់យុវជនកម្ពុជាសម្រាប់ថ្ងៃអនាគតផងដែរ។
ប្រធានសមាគមក្លឹបទេសចរណ៍សៀមរាប (STC)លោក សែតកៅ ហ្វីលីព បានឱ្យដឹងថា កម្មវិធីបើកវគ្គបណ្តុះបណ្តាល ជាលើកទី២ ដល់សិក្ខាកាមចំនួន ២០០នាក់ ធ្វើឡើងលើបួនមុខជំនាញ។ គឺ ជំនាញការិយាល័យជួរមុខ ,ជំនាញគេហកិច្ច ,ជំនាញសេវាកម្មម្ហូបអាហារ និងភេសជ្ជៈ និងជំនាញផ្នែកចុងភៅ” ។កម្មវិធីបណ្តុះបណ្តាលនៅពេលនេះចាប់ផ្តើមពីថ្ងៃទី១ ខែកក្កដា ឆ្នាំ២០២៤និងបញ្ចប់នៅថ្ងៃទី ២៨ កុម្ភៈ ឆ្នាំ២០២៥។ក្នុងនោះសិក្ខាកាមនឹងទទួល បាន មេរៀនទ្រឹស្តីនិងការអនុវត្តក្នុងថ្នាក់រៀនចំនួនបួនខែ ។ចំណែកបួនខែទៀតជាវគ្គកម្មសិក្សាដែលតម្រូវឱ្យសិក្ខាកាម ត្រូវទៅធ្វើការហាត់ការតាមមុខជំនាញរៀងៗខ្លួននៅតាមបណ្តា សណ្ឋាគារ ភោជនីយដ្ឋាន និងក្រុមហ៊ុននានា ក្នុងខេត្តសៀមរាប ឬក្រៅខេត្តសៀមរាបតាមលក្ខខណ្ឌជាក់ស្តែងដែលសមាគមមានដៃគូសហការត្រូវការសិក្ខាកាម៕
ដោយ៖ ប៊ុន រដ្ឋា