ហាណូយ៖ កាសែតវៀតណាម VNexpress បានចេញផ្សាយ នៅថ្ងៃអង្គារនេះថា ជើងហោះហើរវៀតណាម ពីទីក្រុង Da Nang ទៅកាន់ទីក្រុងហូជីមិញ ត្រូវពន្យាពេលហោះហើរកាលពីរសៀលថ្ងៃអាទិត្យ ក្រោយពេលអ្នកដំណើរបានអះអាងថា មានគ្រាប់បែកដៃ នៅក្នុងវ៉ាលី នៅលើយន្តហោះ។

អ្នកបម្រើការលើយន្តហោះ បានរាយការណ៍រឿងនេះទៅគណៈគ្រប់គ្រង ទើបឈានដល់ការពន្យារពេល ដើម្បីទុកឲ្យបុគ្គលិកសន្តិសុខអាកាសយានដ្ឋានត្រួតពិនិត្យឡើងវិញ នូវរាល់ទំនិញទាំងអស់ នៅលើយន្តហោះ។

ប៉ុន្តែ នៅថ្ងៃដដែល គេមិនបានរកឃើញវត្ថុគ្រោះថ្នាក់ដូចដែលបុរសនោះបានលើកឡើងនោះទេ ហើយ ជើងហោះហើរបានហោះចេញដំណើរធម្មតាវិញ នៅប៉ុន្មានម៉ោងបន្ទាប់។

អាជ្ញាធរជំនាញបាននិយាយ កាលពីថ្ងៃចន្ទថា ពួកគេកំពុងបំពេញឯកសារ ដើម្បីផាកពិន័យបុរសអ្នកដំណើរដែលរាយការណ៍មិនពិត តែអាជ្ញាធរមិនបានឲ្យដឹងទេពីស្ថានភាពរបស់អ្នកដំណើរនោះ ឬថាតើមានពាក់ព័ន្ធនឹងស្ថានភាពផ្លូវចិត្តឬយ៉ាងណា។

តាមច្បាប់វៀតណាម អ្នកដែលផ្សព្វផ្សាយព័ត៌មានមិនពិត អំពីវត្តមានរបស់កាំភ្លើង គ្រាប់កាំភ្លើង គ្រាប់បែក សារធាតុផ្ទុះ សារធាតុវិទ្យុសកម្ម និងអាវុធជីវគីមី នៅលើជើងហោះហើរ អាចនឹងត្រូវពិន័យជាប្រាក់ ១៥០០ដុល្លារអាមេរិក។ ក្រៅពីនេះ ពួកគេក៏អាចត្រូវបានចោទប្រកាន់ព្រហ្មទណ្ឌ ពីបទរារាំងចរាចរណ៍អាកាសចរណ៍ផងដែរ។ នេះបើតាម VNexpress ដដែល៕

ប្រែសម្រួល៖ សារ៉ាត