បរទេស៖ មនុស្សយ៉ាងតិច ២០០នាក់ បានស្លាប់ ដោយសារតែការបាក់ដី ដ៏សាហាវ នៅតំបន់ Gofa នៃប្រទេសអេត្យូពី ប៉ុន្តែ មន្ត្រីអះអាងថា ចំនួនអ្នកស្លាប់អាចមានច្រើនជាងនេះ ខណៈដែលការស្វែងរកមនុស្សបាត់ខ្លួន នៅតែបន្តធ្វើ។

មន្ត្រីក្នុងតំបន់បាននិយាយ កាលពីថ្ងៃអង្គារថា ការបាក់ដីបានកើតឡើង កាលពីព្រឹកថ្ងៃចន្ទ បន្ទាប់ពីមានភ្លៀងធ្លាក់ខ្លាំង នៅក្នុងតំបន់ភ្នំមួយ ភាគខាងត្បូង ប្រទេសអេត្យូពី ។

មន្ត្រីឈ្មោះ Habtamu បាននិយាយថា សាកសពបុរស ស្ត្រី ជាច្រើននាក់ ត្រូវបានរកឃើញ។ លោកបានបន្ថែមទៀតថា ការរុករកមនុស្សបាត់ខ្លួនកំពុងបន្ត យ៉ាងសស្រាក់សាស្រាំ ដោយព្រមានថា ចំនួនអ្នកស្លាប់ អាចកើនឡើង ថែមទៀត។

យោងតាមទីភ្នាក់ងារឆ្លើយតបមនុស្សធម៌របស់អង្គការសហប្រជាជាតិ ហៅកាត់ថា OCHA បានឱ្យដឹងថា រដ្ឋក្នុងតំបន់ខាងត្បូង ប្រទេស នៃប្លុកអាហ្វ្រិកខាងកើត មួយនេះ ត្រូវបានវាយលុក ដោយភ្លៀងធ្លាក់ តាមរដូវខ្លីៗ នៅចន្លោះខែមេសា និងដើមខែឧសភា ដែលបណ្តាលឱ្យមានទឹកជំនន់ និងការផ្លាស់ទីលំនៅរបស់ប្រជាជន ដ៏ធំ៕

ប្រភពពី AFP ប្រែសម្រួល៖ សារ៉ាត