ភ្នំពេញ៖ ខ្លោងទ្វារខាងលិច ក្នុងចំណោមខ្លោងទ្វារទាំង៤​របស់ប្រាសាទ​បន្ទាយក្តី ដែលបានបញ្ចប់ការងារជួសជុលអភិរក្ស តាមបច្ចេកទេស​អាណា​ស្ទីឡូ (Anastylosis) នៅចុងឆ្នាំ២០២៣កន្លងមក រួចផុតពីស្ថានភាព​ខូច​ខាតទ្រុឌទ្រោម ហើយពេលនេះបានលេចសម្រស់យ៉ាងស្រស់ស្អាត​ជាទី​ទាក់ទាញភ្ញៀវទេសចរទាំងក្នុងស្រុក និងក្រៅប្រទេស។

មុនការជួសជុលឡើងវិញ ខ្លោងទ្វារនេះមានស្ថានភាពទ្រុឌទ្រោមខ្លំាង តួប៉ម​ខាង​លើនៃប្រាង្គកណ្តាលបានរលុះអស់ នៅសល់តែមុខព្រហ្មចំនួន ២ប៉ុណ្ណោះ​។ ចំណែកស្លាបសងខាង នៃថ្មដំបូលបានរលុះធ្លាក់អស់មួយចំនួន ហើយថ្ម​ជញ្ជាំងបានក្រៀកហែកស្ទើរតែរលុះធ្លាក់មួយភាគធំផងដែរ។

អាជ្ញាធរជាតិអប្សរាបានឱ្យដឹងនៅថ្ងៃទី ២៨ ខែកក្កដានេះថា ក្រោយ​ពង្រឹង​នូវគ្រឹះ ជួសជុលតួខ្លោងទ្វារដែលស្រុត ជញ្ជាំងហែក ហើយថ្មនៃរចនាសម្ពន្ធ​មួយចំនួន​ដែលរលុះធ្លាក់ត្រូវបានរៀបផ្គុំនៅទីតាំងដើម ផ្នែកខ្លះទៀត​ចាំបាច់​ក៏ត្រូវប្រើថ្មថ្មីជំនួសដើម្បីភាពរឹងមាំឡើងវិញ។ បច្ចុប្បន្ននេះខ្លោងទ្វារ​ខាងលិច​នៃប្រាសាទបន្ទាយក្តី មានភាពរឹងមាំ និងសោភ័ណភាព ដែលវង់ភក្ត្រកំពូល​ខ្លោងទ្វារញញឹមសារជាថ្មីដោយស្នាដៃកូនខ្មែរជំនាន់ថ្មីក្រោមការគ្រប់គ្រងរបស់អាជ្ញាធរជាតិអប្សរា។ សុវត្ថិភាពទាំងសំណង់ប្រាសាទបុរាណ និងភ្ញៀវ​ទេសចរ ។

គួរបញ្ជាក់ថា អាជ្ញាធរជាតិអប្សរា បានបញ្ចប់ការងារជួសជុល​ខ្លោងទ្វារខាង​លិច​ប្រាសាទបន្ទាយក្តីហើយ ដោយបានរៀបផ្គុំថ្មទៅតាមលំនាំរូបរាង​ដើមឡើងវិញ ដោយចំណាយរយៈពេលជិត៤ឆ្នាំ។ការងារជួសជុល​ខ្លោងទ្វារនេះ ត្រូវបានអនុវត្តចំនួនពីរដំណាក់កាល។ ដំណាក់កាលទី១ នៅក្នុង​ឆ្នាំ២០២០ ដោយចាប់ផ្តើមប្រមូលឯកសារ សិក្សាអំពីររូបរាង សម្រង់​ប្លង់ សិក្សា​អំពីហានិភ័យរបស់ខ្លោងទ្វារ និងចុះបញ្ជីថ្មនៅ​រាយប៉ាយជុំវិញខ្លោងទ្វារ។ រីឯដំណាក់កាលទី២ បានចាប់ផ្តើមពីឆ្នាំ២០២២ ដោយ អនុវត្តគម្រោង​ជួស​ជុល​ពង្រឹងតែម្តង ដោយការជួសជុលនេះត្រូវរុះរើ​ថ្មទាំងអស់ ចាប់ពីគ្រឹះរហូត​ដល់កំពូលខាងលើ ទើបរៀបចំពង្រឹងគ្រឹះផ្គុំ​ទៅតាមលំនាំដើមវិញ និងបាន​បញ្ចប់ការជួសជុលជាស្ថាពរនាចុង​ឆ្នាំ២០២៣។

បើតាមការចុះផ្សាយរបស់អាជ្ញាធរជាតិអប្សរាកន្លងមកបានឱ្យដឹងថា ក្រោយ​បញ្ចប់​ការជួសជុល ខ្លោងទ្វារខាងលិចប្រាសាទបន្ទាយក្តីនឹងរឹងមាំឡើងវិញ ធានាបាននូវសុវត្ថិភាពសម្រាប់ទេសចរឆ្លងកាត់ចូលទស្សនាប្រាសាទតាមច្រកខាងលិចឡើងវិញ និងអាចចូលមកផ្តិតយករូបភាពដ៏ស្រស់ស្អាតនៅទីនេះ។ លើសពីនេះ ខ្លោងទ្វារនេះក៏បានលើកតម្លៃសំណង់បុរាណ រក្សាស្នាដៃ​ទុកជា​មរតកសម្រាប់មនុស្សជំនាន់ក្រោយបន្តទៀត៕

ដោយ៖ម៉ាដេប៉ូ