នាយករដ្ឋមន្ត្រី៖ ចាប់ពីឆ្នាំ២០១២មក រាជរដ្ឋាភិបាលកម្ពុជា មិនមានផ្តល់អាជ្ញាបណ្ណដីសម្បទានសេដ្ឋកិច្ចថ្មីទៀតនោះឡើយ
(ភ្នំពេញ)៖ ក្នុងពិធីសំណេះសំណាល និងពិសាភោជនាហារ ជាមួយសមាគមឧកញ៉ាកម្ពុជា និងសមាគមអ្នកអភិវឌ្ឍលំនៅ ឋាន កម្ពុជា នារសៀលថ្ងៃទី២ ខែសីហា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា បានគូសបញ្ជាក់ថា ចាប់ពីឆ្នាំ២០១២មក រាជរដ្ឋាភិបាលកម្ពុជា មិនមានផ្តល់អាជ្ញាបណ្ណដីសម្បទានសេដ្ឋកិច្ចថ្មីទៀតនោះឡើយ ខណៈដីសម្បទានសេដ្ឋកិច្ចមុនៗ នោះក៏មានរយៈពេលត្រឹម ៥០ឆ្នាំប៉ុណ្ណោះ រីឯច្បាប់ដីសម្បទានសេដ្ឋកិច្ច រាល់ការមកវិនិយោគ គឺត្រូវយកកម្លាំងពលកម្មជាពលរដ្ឋខ្មែរ ៩០ភាគរយឡើងទៅ ។
សម្ដេចធិបតីបានថ្លែងជុំវិញការព្រួយបារម្ភរឿងដីសម្បទានសេដ្ឋកិច្ច ដែលមានមតិលើកឡើងថា ការជួលដីឱ្យពលរដ្ឋប្រទេសជិតខាង តាមរយៈដីសម្បទានសេដ្ឋកិច្ច ហើយពលរដ្ឋខ្មែរ ដែលធ្វើការនៅកន្លែងនោះ មានចំនួនតិចតួច។ ត្រង់ចំណុចនេះ សម្ដេចបានពន្យល់ថា៖ សារាចរណែនាំលេខ ៨ ស.រ ឆ្នាំ២០១៥ ចុះហត្ថលេខាដោយសម្ដេចតេជោ ហ៊ុន សែន អតីតនាយករដ្ឋមន្ត្រី គឺមិនឱ្យប្រជាពលរដ្ឋលក់ ឬជួលដី ឬលំនៅដ្ឋាននៅតាមតំបន់ព្រំដែនឱ្យទៅប្រជាពលរដ្ឋនៃប្រទេសជិតខាង ទោះក្នុងរូបភាពណាក៏ដោយ ហើយរាជរដ្ឋាភិបាលនីតិកាលទី៧ នៅតែបន្តកិច្ចការងារនេះ មិនមានប្រែប្រួលឡើយ។ កាវិនិយោគតាមអចលនទ្រព្យ គឺច្បាប់ស្ដីសិទ្ធិកម្មសិទ្ធចំណែកឯកជននៃអគារ និងច្បាប់ស្ដីពីសហកម្មសិទ្ធិរបស់ជនបរទេស ឆ្នាំ២០១០ ត្រង់មាត្រា៦ បានចែងថា ជនបរទេសអាចមានសិទ្ធិទិញខន់ដូបានតែជាន់ទី១ឡើងទៅ មិនមានសិទ្ធិទិញជាន់ផ្ទាល់ដី ឬជាន់ក្រោមដីបានទេ ។ នេះគឺសម្រាប់តែចលនទ្រព្យដែលមានចម្ងាយចាប់ពី ៣០គីឡូម៉ែត្រពីព្រំដែនជុំវិញទាំងអស់ ប្រសិនបើតិចជាង ៣០គីឡូម៉ែត្រ គឺមិនមានសិទ្ធិទិញនោះឡើយ ។
សម្ដេចបានបញ្ជាក់បន្ថែមទៀតថា៖ តាំងពីឆ្នាំ២០១២មក រាជរដ្ឋាភិបាល មិនមានអាជ្ញាបណ្ណដីសម្បទានសេដ្ឋកិច្ចបន្តទៀតឡើយ ដីសម្បទានសេដ្ឋកិច្ចដែលមានក្នុងពេលបច្ចុប្បន្ន គឺមានពីមុនៗមកហើយ។ ពីមុនមានរយៈពេល ៩៩ឆ្នាំ តែមកដល់ឆ្នាំ២០១៥ រាជរដ្ឋាភិបាល ក៏បានកែមកឱ្យនៅត្រឹម ៥០ឆ្នាំវិញ ។ ក្រុមហ៊ុនដែលទទួលបានអាជ្ញាបណ្ណដីសម្បទានសេដ្ឋកិច្ច ត្រូវអនុវត្តគោលការណ៍ជាធរមាន ដែលក្នុងនោះការប្រើប្រាស់កម្លាំងពលកម្មបរទេសត្រឹមតែ១០ភាគរយប៉ុណ្ណោះ ៩០ភាគរយទៀតត្រូវតែជាប្រជាពលរដ្ឋខ្មែរ ហើយរាជរដ្ឋាភិបាលកម្ពុជានៅតែបន្តអនុវត្តគោលការណ៍តទៅទៀត។
សម្ដេចធិបតីនាយករដ្ឋមន្ត្រី បានបន្តថា ការបន្តអនុវត្តគោលការណ៍ទាំងនេះ ធ្វើឱ្យប្រជាពលរដ្ឋលែងព្រួយបារម្ភរឿងបាត់បង់ទឹកដីទៅប្រទេសជាតិខាង ឬបាត់បង់ការងារនៅក្នុងបញ្ហាដីសម្បទានសេដ្ឋកិច្ចនោះឡើយ ពិសេសតំបន់ព្រំដែន។ សម្ដេច ក៏បានស្នើឱ្យអ្នកបញ្ចេញមតិទាំងឡាយសូមប្រកាន់នូវគោលការណ៍គោរពគ្នាទៅវិញទៅមក ចៀសវាងការញុះញង់បំបែកបំបាក់គ្នា ដែលនាំតែការខាតបង់ប្រយោជន៍ជាតិនោះទេ។
សម្ដេចធិបតី ហ៊ុន ម៉ាណែត ហ៊ានធានាទទួលខុសត្រូវចំពោះការការពារទឹកដី មិនឱ្យប្រវត្តិសាស្ត្រ ចារពីការបាត់បង់ទឹកដីក្នុងអាណត្តិដឹកនាំប្រទេសកម្ពុជា របស់សម្ដេចនោះឡើយ ៕
អត្ថបទ ៖ វណ្ណលុក
រូបភាព ៖ វ៉េង លីមហួត, សួង ពិសិដ្ឋ
