អគ្គនាយកដ្ឋានគយគ្រោងកម្ទេចចោលទំនិញល្មើសច្បាប់ជាង៦០០តោន
កំពង់ស្ពឺ៖អគ្គនាយកដ្ឋានគយនិងរដ្ឋាករកម្ពុជា គ្រោងនឹងកម្ទេចចោលនូវទំនិញគ្មានការទាមទារដែលខូចគុណភាពប្រមាណជាង ៦០០តោន នៅក្នុងភូមិសាស្ត្រស្រុកឱរ៉ាល់ ខេត្តកំពង់ស្ពឺ នាពេលខាងមុខ ។នេះបើយោងតាមស្មារតីនៃកិច្ចប្រជុំស្តីពីការកំណត់វិធីសាស្ត្រក្នុងការកម្ទេចចោលទំនិញគ្មានការទាមទារដែលខូចគុណភាពស្ថិតក្រោមការសម្របសម្រួលរបស់រដ្ឋបាលខេត្តកំពង់ស្ពឺក្នុងសប្ដាហ៍នេះ។
តំណាងអគ្គនាយកដ្ឋានគយនិងរដ្ឋាករកម្ពុជា ដែលមានវត្តមានក្នុងកិច្ចប្រជុំនោះបានលើកឡើងថា កន្លងមក មន្ត្រីជំនាញគយនិងរដ្ឋាករបានបង្ក្រាបបានទំនិញល្មើសនឹងច្បាប់ស្តីពីគយជាច្រើនមុខទំនិញ ដែលម្ចាស់មិនព្រមចូលខ្លួនមកដោះស្រាយ ហើយត្រូវបានចាត់បញ្ចូលជាទំនិញគ្មានការទាមទារស្របតាមនីតិវិធីជាធរមាន។ ក្នុងចំណោមទំនិញគ្មានការទាមទារទាំងនោះមានចំនួន ១២៣ មុខទំនិញបានខូចគុណភាព និងជាកម្មវត្ថុនៃការកម្ទេចចោលតាមវិធី សាស្ត្រកម្ទេចដែលនឹងត្រូវកំណត់ដោយស្ថាប័នជំនាញ។
ទំនិញគ្មានការទាមទារដែលខូចគុណភាពទាំង១២៣ មុខត្រូវបានបែងចែកជាប្រាំប្រភេទរួមមាន៖១- បារីចម្រុះម៉ាក និងធាតុផ្សំនានា ៤១មុខ ស្មើនឹង ១៣២,៩០២ គីឡូក្រាម។២-ថ្នាំកសិកម្មនិងសារធាតុគីមី ១៣ មុខស្មើនឹង ១១០,៦៤៦គីឡូក្រាម ។៣-ភេសជ្ជៈនិងចំណីអាហារ ២០ មុខ ស្មើនឹង ១៤៤,៩៧៤គីឡូក្រាម។៤- សំណល់ប្លាស្ទិក កៅស៊ូក្រាលថ្នល់និងអាគុយប្រើរួច៩មុខស្មើនឹង ១៧៧,៧១៥ គីឡូក្រាម និង ៥-សម្ភារៈប្រើប្រាស់និងទំនិញផ្សេងៗ៤០មុខ ស្មើនឹង៨៤,២៣៥គីឡូក្រាម ។
លោក ជាវ វិជ្ជាក់ អភិបាលរងខេត្តកំពង់ស្ពឺបានបញ្ជាក់ថា រដ្ឋបាលខេត្តនឹងចូលរួមគាំទ្រនិងសម្រួលដល់ការងារកម្ទេចចោលនេះ ។លោកបានណែនាំឱ្យមន្ទីរជំនាញពាក់ព័ន្ធទាំងអស់ត្រូវចូលរួមពិនិត្យវាយម្លៃ និង ញែកឱ្យដាច់រវាងទំនិញនិងផលិតផលដែលមានផលប៉ះពាល់ខ្ពស់ដល់មនុស្ស សត្វ បរិស្ថានរួមទាំង រុក្ខជាតិ និងត្រូវរកឱ្យឃើញថាតើទំនិញឬផលិតផលណាមួយត្រូវកិនកម្ទេច កប់ និងដុតបំផ្លាញ ដើម្បីជៀសវាងនូវផលប៉ះពាល់ខាងលើ។ មួយវិញទៀត លោកបានស្នើឱ្យពិនិត្យលទ្ធភាពក្នុងការប្រើប្រាស់ឡដុត ដែលអាច ដុតបំផ្លាញនូវទំនិញទាំងអស់ខាងលើបានប្រកបដោយប្រសិទ្ធភាព និងសុវត្ថិភាព និងមានបន្សល់កាក សំណល់តិចតួចដែលអាចមានផលប៉ះពាល់ស្ថិតក្នុងកម្រិតទាបបំផុត៕
ដោយ៖ ម៉ុន សំអាត