វ៉ាស៊ីនតោន៖ ក្រុមហ៊ុន Stellantis បានប្រកាសកាលពីថ្ងៃសុក្រថា ខ្លួននឹងបញ្ឈប់ការផលិតរថយន្ត Ram 1500 Classic ជាលើកដំបូងនៅរោងចក្រនៃរដ្ឋ Michigan ហើយបានព្រមានកាត់បន្ថយការងារជិត ២.៥០០កន្លែង។

ក្រុមហ៊ុនផលិតឡានខ្នាតយក្សអាមេរិក Stellantis បាននិយាយនៅក្នុងសេចក្តីថ្លែងការណ៍មួយថា ជាមួយនឹងការធ្វើបច្ចុប្បន្នភាពរថយន្ត Ram 1500 ថ្មី ក្រុមហ៊ុនគ្រោងនឹងឈប់ផលិតរថយន្ត Ram 1500 Classic នៅរោងចក្រដំឡើងរថយន្ត Warren នៃរដ្ឋ Michigan នៅត្រឹមចុងឆ្នាំ២០២៤នេះ។

ក្រុមហ៊ុនបន្តថា ខ្សែសង្វាក់ផលិតកម្មដំឡើងរថយន្តរបស់រោងចក្រនេះ ក៏នឹងត្រូវកាត់បន្ថយប្រតិបត្តិការពីពីរវេនក្នុងមួយថ្ងៃ ទៅមួយវេនក្នុងមួយថ្ងៃវិញផងដែរ ហើយនឹងផលិតតែរថយន្ត Jeep Wagoneer។

ទន្ទឹមគ្នា បុគ្គលិករហូតដល់ ២.៤៥០នាក់ ត្រូវបានគេរំពឹងថា ក៏នឹងត្រូវកាត់បន្ថយគិតចាប់ពីថ្ងៃទី៨ ខែតុលាខាងមុខនេះផងដែរ។ រោងចក្រនៅរដ្ឋ Michigan នេះ បានផលិតរថយន្ត Pick-up តាំងពីឆ្នាំ ១៩៣៨១៩៣៨ ហើយបានទទួលខុសត្រូវក្នុងការផលិតរថយន្ត Ram 1500 តាំងពីឆ្នាំ ១៩៩៣។

ក្នុងឆ្នាំ ២០១៣ Stellantis បានបន្ថែមវេនធ្វើការប្រចាំថ្ងៃដល់ទៅបីវេននៅរោងចក្រនេះ ហើយបានបង្កើតការងារថ្មីប្រហែល ១.០០០កន្លែង។ ប៉ុន្តែនៅឆ្នាំ ២០១៨ ក្រុមហ៊ុននេះបានផ្លាស់ប្តូរការផលិតរថយន្តជំនាន់ថ្មីនៃម៉ូដែល Ram 1500 ទៅកាន់ ទីក្រុងSterling Heights នៃរដ្ឋ Michiganវិញ។

Stellantis ដែលបង្កើតឡើងដោយការរួមបញ្ចូលគ្នានៃរថយន្ត Peugeot-Citroen និង Fiat-Chrysler ក្នុងឆ្នាំ ២០២១ ត្រូវបានគេចាត់ទុកថា ជាក្រុមហ៊ុនផលិតរថយន្តមួយ ក្នុងចំណោមក្រុមហ៊ុនផលិតរថយន្ត “Big Three” ដែលមានមូលដ្ឋាននៅក្នុងតំបន់ Detroit រួមជាមួយនឹងក្រុមហ៊ុន Ford និង General Motors៕ ប្រភព៖ AFP ប្រែសម្រួលដោយ៖ ឈឹម ទីណា