ប្រកួតវាយសីមិត្តភាពជាតិ និងអន្តរជាតិ ពានរង្វាន់ឯកឧត្តមអភិសន្តិបណ្ឌិត ស សុខា លើកទី១ ផ្តោតសំខាន់ គឺការរិតចំណងមិត្តភាព
ភ្នំពេញ៖ ថ្លែងក្នុងបទសម្ភាសន៍ជាមួយអ្នកសារព័ត៌មានក្រោយបញ្ចប់កិច្ចប្រជុំចាប់ពូល ការ ប្រកួតវាយសីមិត្តភាពជាតិ និងអន្តរជាតិ ពានរង្វាន់ឯកឧត្តមអភិសន្តិបណ្ឌិត ស សុខា លើកទី១ កាលពីល្ងាចថ្ងៃទី១៥ ខែ សីហា ឆ្នាំ២០២៤ ឯកឧត្តម សរ សិទ្ធិ រដ្ឋលេខាធិការទទួលការងារអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ និងជាប្រធានគណៈកម្មការរៀបចំការប្រកួត បានថ្លែងថា ការប្រកួតនេះរៀបចំឡើងមានពានរង្វាន់ចំនួន៣ គឺពានរង្វាន់ទី១ សម្រាប់អន្តរអគ្គចំណុះឱ្យក្រសួងមហាផ្ទៃ ពានរង្វាន់ទី២ សម្រាប់ក្លិបវាយសី ឬសមាគមកីឡាវាយសីទូទាំងប្រទេសនិងពានរង្វាន់ទី៣ ជាពានរង្វាន់អន្តរជាតិ សម្រាប់កងកម្លាំងអនុវត្តច្បាប់នៃប្រទេសអាស៊ាន ដែលមាន៥ប្រទេស មានកម្ពុជាម្ចាស់ផ្ទះ ថៃ វៀតណាម សង្ហបុរី និងប្រទេសម៉ាឡេស៊ី។ ពានរង្វាន់ទាំង៣នេះគឺស្ថិតក្នុងថ្ងៃប្រកួតជាមួយគ្នា ដែលមានរយៈពេល៣ថ្ងៃស្ថិតនៅចន្លោះពីថ្ងៃទី១៦ ដល់ថ្ងៃទី១៨ ខែសីហា ឆ្នាំ២០២៤ នៅក្នុងបរិវេណសាលាបឋមសិក្សា ពញាហុកនេះឯង។
ឯកឧត្តមរដ្ឋលេខាធិការ មានប្រសាសន៍បន្ថែមថា ពានរង្វាន់នេះ បង្កើតឡើងក្នុងគោលបំណងរួមចំណែកលើកកម្ពស់វិស័យកីឡាក្នុងក្របខណ្ឌក្រសួងមហាផ្ទៃ សំដៅបណ្ដុះស្មារតីស្រលាញ់កីឡា និងជៀសឆ្ងាយពីគ្រឿងញៀន ព្រមទាំងរឹតចំណងសាមគ្គីភាព មិត្តភាព និងកិច្ចសហប្រតិបត្តិការលើវិស័យកីឡាជាមួយបណ្ដាក្លឹបកីឡាវាយសីយុវជនជានគរបាលប្រទេសនានាក្នុងតំបន់។
ឯកឧត្តមរដ្ឋលេខាធិការ មានប្រសាសន៍បន្ថែមថា ពានរង្វាន់នេះ បង្កើតឡើងក្នុងគោលបំណងរួមចំណែកលើកកម្ពស់វិស័យកីឡាក្នុងក្របខណ្ឌក្រសួងមហាផ្ទៃ សំដៅបណ្ដុះស្មារតីស្រលាញ់កីឡា និងជៀសឆ្ងាយពីគ្រឿងញៀន ព្រមទាំងរឹតចំណងសាមគ្គីភាព មិត្តភាព និងកិច្ចសហប្រតិបត្តិការលើវិស័យកីឡាជាមួយបណ្ដាក្លឹបកីឡាវាយសីយុវជនជានគរបាលប្រទេសនានាក្នុងតំបន់។
រដ្ឋលេខាធិការដដែលបានពន្យល់ទៀតថា ព្រឹត្តិការណ៍នេះ វាពិតជាមាន ផលចំណេញ ដ៏ធំធេងណាស់ សម្រាប់ការផ្ដួចផ្ដើមរបស់ឯកឧត្តម អភិសន្តិបណ្ឌិតឲ្យមានព្រឹត្តិការណ៍នេះកើតឡើង។ ពិតណាស់ក្រៅពីទទួលបានការរឹតចំណងរវាងប្រទេសដែលបានចូលរួម វាក៏អាចបង្កើនភាពស្ថិតស្នាលរវាងក្លឹប ស្ថាប័ន និងអង្គភាព ទូទាំងប្រទេសផងដែរ។
ឯកឧត្តម សរ សិទ្ធិ ក៏បានថ្លែងអំណរដល់ថ្នាក់ដឹកនាំឯកឧត្តម រដ្ឋលេខាធិការ ក៏បានថ្លែង អំណរគុណជូនចំពោះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី ក្រសួង មហាផ្ទៃ ដែលតែងតែយកចិត្តទុកដាក់ដល់សុខភាពមន្ត្រីរាជការ ក្រោមឱវាទ ដោយផ្ដល់អនុសាសន៍ និងជំរុញឱ្យមានការរៀបចំព្រឹត្តិការណ៍ប្រកួតនេះឡើង។ជាមួយគ្នានេះ ក៏សូមអរគុណក្រុមហ៊ុនឧបត្ថម្ភដែលបានរួមចំណែក ធ្វើឱ្យព្រឹត្តិ ការណ៍នេះ សម្រេចចេញជារូបរាងផងដែរ។
សូមបញ្ជាក់ថា ពានរង្វាន់នេះមានក្លិបក្នុងស្រុកចូលរួមប្រកួតចំនួន ១២ បន្ថែមលើស ពីនេះ ក៏មានក្លិបមកពីអង្គភាពនានាចំណុះឲ្យក្រសួងមហាផ្ទៃចូលរួមមានចំនួន ១៣ ។ ព្រឹត្តិការណ៍នេះមាន៤វិញ្ញាសារួមមានឯកត្តជនថ្នាក់ជាតិ វិញ្ញាសាប្រកួតជាក្រុមអន្តរជាតិ វិញ្ញាសាឯកត្តជនមហាផ្ទៃ និងវិញ្ញាសាប្រកួតគូកិត្តិយសក្រសួងមហាផ្ទៃ ៕
រូបភាព និងអត្ថបទ ៖ ជាវ ចន្ធូ