វ៉ាស៊ីនតោន៖ លោក Donald Trump បាននិយាយនាពេលថ្មីៗនេះថា ប្រសិនបើជាប់ឆ្នោត លោកនឹងពិចារណាបញ្ចប់ឥណទានពន្ធ សម្រាប់ការទិញរថយន្តអគ្គិសនី និងតែងតាំងលោក Elon Musk ជាទីប្រឹក្សា។

បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump បានប្រាប់រ៉យទ័រនៅក្នុងបទសម្ភាសន៍មួយថា ប្រសិនបើជាប់ឆ្នោត លោកនឹងពិចារណាបញ្ចប់ឥណទានពន្ធចំនួន ៧.៥០០ដុល្លារ សម្រាប់ការទិញរថយន្តអគ្គិសនី។

លោក Trump បន្ថែមថា លោកនឹងបើកចំហរក្នុងការដាក់ឈ្មោះមហាសេដ្ឋីបច្ចេកវិទ្យា និងជានាយកប្រតិបត្តិក្រុមហ៊ុន Tesla លោក Elon Musk ឱ្យធ្វើជាគណៈរដ្ឋមន្ត្រី ឬតួនាទីជាទីប្រឹក្សា ពីព្រោះគាត់គឺជាមនុស្សឆ្លាតណាស់ និងជាមនុស្សពូកែម្នាក់។

លោក Musk កាលពីខែមុន បានគាំទ្រលោក Trump ជាសាធារណៈ ក្នុងការប្រជែងតំណែងប្រធានាធិបតីអាមេរិក។ យ៉ាងណាមិញ ក្រុមហ៊ុន Tesla មិនបានឆ្លើយតបភ្លាមៗចំពោះសំណើសុំការអត្ថាធិប្បាយ ពាក់ព័ន្ធនឹងបញ្ហានេះទេ៕

ប្រភព៖ Yahoo News ប្រែសម្រួលដោយ៖ ឈឹម ទីណា