ទារិកាអាយុ ៨ខែ គ្មានរន្ធគូថ មកពីគ្រួសារក្រីក្រនៃខេត្តក្រចេះ ត្រូវបានឯកឧត្តមហ៊ុន ម៉ានី និងលោកជំទាវ សម្របសម្រួលវះកាត់ជូនដោយមិនគិតថ្លៃ
(ភ្នំពេញ)៖ ទារិកាកំសត់អាយុ៨ខែ ឈ្មោះ មោក នីតា កើតមកមិនមានរន្ធគូថ (Recto-vestibulaire) រស់ក្នុងគ្រួសារទីទ័លក្រ ក្នុងភូមិអូរក្រៀង ឃុំអូរក្រៀង ស្រុកអូគ្រៀងសែនជ័យ ខេត្តក្រចេះ មានសមាជីកចំនួន ៦នាក់ ឪពុកឈ្មោះ អូន ប្រុស អាយុ ៤៥ឆ្នាំ មុខរបរ អ្នកនេសាទត្រីតាមបឹង និងម្តាយឈ្មោះ រាជ ចាន់នី អាយុ ៤២ឆ្នាំ មុខរបរ មេផ្ទះ (ស្លាប់មួយចំហៀងខ្លួន បន្ទាប់ពីសំរាលកូនរួចបាន ២សប្តាហ៍) ត្រូវបាន ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា និងលោកជំទាវសម្របសម្រួលផ្តល់ជូននូវការវះកាត់ និងព្យាបាលដោយឥតគិតថ្លៃនៅមន្ទីរពេទ្យកុមារជាតិ តាមរយៈសម្ព័ន្ធគ្រូពេទ្យស.ស.យ.ក និងដោយមានការយកចិត្តទុកដាក់ពីឯកឧត្តមបណ្ឌិត ហេង សុខគង់ ប្រធានសម្ព័ន្ធគ្រូពេទ្យ ស.ស.យ.ក ឯកឧត្តមប្រធានមន្ទីរពេទ្យកុមារជាតិ លោកវេជ្ជបណ្ឌិត កែវ វណ្ណា អនុប្រធានមន្ទីរពេទ្យកុមារជាតិ និងជាអនុប្រធានសម្ព័ន្ធគ្រូពេទ្យ ស.ស.យ.ក បានដឹកនាំក្រុមគ្រូពេទ្យឯកទេស ដែលមានលោកវេជ្ជបណ្ឌិតឯកទេស ជឺ ហរ ប្រធានសម្ព័ន្ធគ្រូពេទ្យ ស.ស.យ.ក សាខាមន្ទីរពេទ្យកុមារជាតិ និងសហការីធ្វើការវះកាត់ជូនដោយផ្ទាល់ និងទទួលបានលទ្ធផលជោគជ័យ គួរជាទីគាប់ចិត្ត ។
ម្តាយ ឪពុក ទារិកាកំសត់ សូមលើកម្រាមដៃដប់ថ្លែងអំណរគុណដល់ឯកឧត្តម ហ៊ុន ម៉ានី ក៏ដូចជាលោកជំទាវ ព្រមទាំងក្រុមគ្រូពេទ្យឯកទេស នៃសម្ព័ន្ធគ្រូពេទ្យស.ស.យ.ក ដែលបានផ្តល់នូវការពិនិត្យ ព្យាបាល និងវះកាត់ដល់កូនស្រីគាត់ដោយមិនគិតថ្លៃ និងប្រកបដោយទឹកចិត្តសប្បុរសក្រៃលែង ៕
ដោយ ៖ ង៉ាន់ ទិត្យ