កំពង់ឆ្នាំង៖ សប្បុរសជនដែលចូលរួមនៅក្នុងកម្មវិធីកីឡាដើម្បីទេសចរណ៍ ដែលប្រារព​ធ្វើ​ឡើង នៅក្នុង តំបន់ការពារធម្មជាតិទឹកធ្លាក់ស្រែអំពិល ស្ថិតនៅក្នុងភូមិ ក្តុល ឃុំក្តុល​សែន​ជ័យ ស្រុកទឹកផុស ខេត្ត កំពង់ឆ្នាំ រួមជាមួយក្រុមហ៊ុនឯកជន ក្នុងនោះ ក៏មានការ​ចូលរួមពីក្រសួងមន្ទីរពាក់ព័ន្ធ រួមមានក្រសួងបរិស្ថាន និងក្រសួងទេសចរណ៍ បាននាំ​កុំព្យូទ័រ អំពូលសូឡា សម្ភារៈសិក្សា និងដើមឈើជាង១០០ដើម ដាំ នៅក្នុងបរិវេណ​សាលាបឋមសិក្សាតាភន។

បេន យ៉ាមីន ប្រធានក្រុមអ្នករៀបចំកីឡាព្រឹត្តិការណ៍កីឡាដើម្បីទេសចរណ៍ បានបញ្ជាក់​ឱ្យដឹងថា ការកៀគរសប្បុរសនាំយកនូវសម្ភារៈមួយចំនួនចែកជូនសិស្សានុសិស្ស និងសា​លា​រៀន និងដាំកូនឈើ គឺជាសកម្មភាពមួយនៃថ្ងៃទី១ក្នុងកម្មវិធីកីឡាដើម្បីទេសចរណ៍។

លោកថា មូលហេតុដែលនាំឱ្យក្រុមការងារយើងបង្កើតកម្មវិធីសប្បុរសធម៍ និងដាំកូន​ឈើ​នៅក្នុងសាលារៀនមុននិងកម្មធីធំដែលនិងប្រារពធ្វើឡើងនេះ គឺជាកាយវិការ​បង្ហាញ​អំពី​ការយកចិត្តទុកដាក់ចំពោះសង្គម និងធ្វើជាគូរូដល់កុមារ៉ាកុមារីឱ្យពួកគេមើល​ឃើញពីការ​ចេះជួយគ្នា និងការចេះស្រលាញ់នូវបរិស្ថាន អនាម័យ នៅក្នុងមូលដ្ឋាន​ដែលខ្លួន​បាន​រស់នៅ ។

ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានលើកឡើងថា ក្នុងនាម​តំណាង​ឱ្យក្រសួងបរិស្ថាន ពិតជាមានក្តីរំភើបរីករាយ ដែលមើលឃើញមានការចូលរួម​យកចិត្តទុកលើវិស័យបរិស្ថាន ពីសំណាក់អាជ្ញាមូលដ្ឋាន វិស័យឯកជន និងយុវជននេះ បានធ្វើឱ្យយើងខ្ញុំដែលបម្រើការងារក្នុងវិស័យគ្រប់គ្រងធនធានធម្មជាតិ និងបរិស្ថាននេះ មានមោទនភាព។

ឯកឧត្តម អនុរដ្ឋលេខាធិការ បានគូសបញ្ជាក់ទៀតថា កម្មវិធីដែលបង្កើតឡើងនៅ​ពេល​នេះ ក៏យើងបានគិតគូអំពីវិស័យបរិស្ថាន ក្នុងនោះមានការចូលរួមពីសំណាក់​លោកគ្រូអ្នក​គ្រូ និងអាជ្ញាធរគ្រប់លំដាប់ថ្នាក់នាពេលកន្លងមកនេះ បានជួយឱ្យសាលារៀនយើងស្អាត ភូមិ ឃុំ យើងស្អាតតាមរយៈយុទ្ធនាការថ្ងៃនេះខ្ញុំមិនប្រើថង់ប្លាស្ទិកទេ។

រហូតមកដល់ពេលនេះ មានការចូលរួមពីលោកគ្រូអ្នកគ្រូនិងសិស្សានុសិស្សទាំងប្រទេស​មានចំនួន៣លាន៦សែននាក់ និងសរុបទាំងប្រជាពលរដ្ឋមានចំនួនជាង៩នាក់ហើយ។នេះជាជោគជ័យផ្តើមចេញពីបេះដូងបានធ្វើឱ្យសាលារៀន ភូមិដ្ឋាន និងមូលដ្ឋានរបស់​យើងស្អាត ហើយបន្ទាប់មកទៀតយើងបានជម្រុញលើកទឹក​តាមរយៈកម្មវិធីយុទ្ធ​នា​កម្ពុជា​​ស្អាតខ្មែរធ្វើបាន។ដូច្នោះក្នុងនាមតំណាងឱ្យក្រសួងបរិស្ថាន​សូមណូមពរ​ឱ្យអាជ្ញា​មូល​រដ្ឋានគ្រប់លំដាប់ថ្នាក់ និងអ្នកដែលពាក់ព័ន្ធទាំងអស់ចូលរួមសំអាតអនាម័យ​តាម​មូលដ្ឋាន ទុកដាក់សំរាមឱ្យបានល្អ កាត់បន្ថយការប្រើប្រាស់ថង់ប្លាស្ទិក ដែលនេះជាការ​ចូលរួម​ចំណែកយ៉ាងសំខាន់ក្នុងការកាត់បន្ថយការបំពុលដោយ​សារប្លាស្ទិកជាសត្រូវ​កំពុង​លាក់មុខដែលធ្វើឱ្យរងផលប៉ះពាល់ខ្លាំងដល់សុខភាពមនុស្ស សត្វ ជាខ្លាំងចាប់ពីដី​គោក​រហូតដល់សមុទ្រ។

ឯកឧត្តម អនុរដ្ឋលេខាធិការ ក្រសួងបរិស្ថាន បានពន្យល់ថា ប្រសិនបើយើងមិនមាន​ការ​គ្រប់គ្រងការកាត់បន្ថយប្លាស្ទិកនាពេលនេះនោះទេ នៅឆ្នាំ២០៥០ខាងមុខ ចំនួនប្លាស្ទិក នឹងមានចំនួនច្រើនជាងចំនួនត្រីនៅក្នុងសមុទ្រទៀត។ដូច្នោះហើយជាបន្តបន្ទាប់​យើង​បាន​ដាក់ចេញនូវយុទ្ធនាកម្ពុជាស្អាតខ្មែរធ្វើបានជំហ៊ានទី២ ហើយជំហ៊ានបន្ទាប់យើង​ចង់ឱ្យ​ប្រជាពលចេះញ៉ែកសំរាម និងរកចំណូលពីសំរាម មានន័យថា សំរាមប្លាស្ទិកយើង​យកទៅកែឆ្នៃ យើងអាចយកទៅប្រើប្រាស់ម្តងទៀត ឬប្រើប្រាស់ច្រើនដង និងអាចលក់​បាន ។ ចឹងនេះជាអ្វីដែលលើកឡើង​និងបញ្ជាក់​ជូន​សាធារណៈជននិងអ្នកពាក់ព័ន្ធទាំង​អស់​ចូលរួមដើម្បីកម្ពុជាស្អាត់ ស្អាតទាំងកម្ពុជា ស្អាតទាំងនៅលើឆាកអន្តរជាតិដែរ៕

រូបភាព ៖ មឿង គឹមរ៉ុង
អត្ថបទ ៖ ជាវ ចន្ធូ