ភ្នំពេញ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើការ​ណែនាំពីរបៀបផ្តល់សេវាថែទាំព្យាបាលដោយក្រុមគ្រូពេទ្យនៅតាមមន្ទីរពេទ្យ ជូន​ដល់អ្នកដឹកនាំគ្រប់ឋានានុក្រម ក្រោមឱវាទក្រសួងសុខាភិបាល តាមប្រព័ន្ធ​វីដេអូសន្និសីទ នារសៀលថ្ងៃទី១០ ខែកញ្ញា ឆ្នាំ២០២៤ ដែលមានសមាសភាព​ចូលរួមសរុបចំនួន ៣៩០៣នាក់។

ឯកឧត្តមសាស្រ្តាចារ្យរដ្ឋមន្រ្តី បានធ្វើការក្រើនរំលឹកដល់ថ្នាក់ដឹកនាំក្នុងវិស័យ សុខាភិបាលគ្រប់ ឋានានុក្រមឱ្យចាប់អារម្មណ៍ថា វិស័យសុខាភិបាល គឺជាឧស្សាហកម្មនៃសេវាកម្ម ដូច្នេះ មន្ទីរពេទ្យគ្រប់កម្រិត និង មណ្ឌល សុខភាពទាំងអស់ត្រូវបន្តយកចិត្តទុកដាក់ រៀបចំការផ្តល់សេវា របស់ខ្លួន ឱ្យកាន់តែមានប្រសិទ្ធភាពជាជំហ៊ានៗ។

ឯកឧត្តមសាស្រ្តាចារ្យរដ្ឋមន្រ្តី បានជម្រាបជូនដល់មន្ទីរពេទ្យ ជាពិសេស​សម្រាប់​មន្ទីរពេទ្យបង្អែកស្រុក ខេត្ត គ្រប់កម្រិត ឱ្យបង្កើត​យន្តការពិនិត្យ និងព្យាបាល​ជំងឺ​ដោយក្រុមគ្រូពេទ្យដែលមានពហុជំនាញ ជួបជជែក​ពិភាក្សាគ្នា​លើការផ្តល់រោគ​វិនិច្ឆ័យ-វិធីសាស្ត្រព្យាបាល និងការតសមដានបន្ត។ ក្នុងការអនុវត្ត​គំនិតផ្តួច​ផ្តើម​នេះ ថ្នាក់ដឹកនាំនៅតាមឋានានុក្រមបន្តបន្ទាប់ត្រូវចូលរួមអនុវត្តទៅតាមតួនាទី និងភារកិច្ច ដើម្បីធានាឱ្យមានខ្សែគណនេយ្យភាពពីប្រធានស្ថាប័ន រហូតដល់​អ្នកអនុវត្តផ្ទាល់នៅតាមមន្ទីរពេទ្យ។

ឯកឧត្តមសាស្រ្តាចារ្យរដ្ឋមន្រ្តី​ បានអនុញ្ញាតដល់ក្រុមការងារមណ្ឌលសុខភាព​ចំណារក្រោម​នៃមន្ទីរសុខភិបាលនៃរដ្ឋបាលខេត្តកំពង់ធំ ដើម្បីបង្ហាញពីការ​ប្រើប្រាស់ PDIA សម្រាប់បង្កើនការមកប្រើប្រាស់សេវានៅមណ្ឌលសុខភាព និងមណ្ឌលសុខភាពស្លា នៃមន្ទីរសុខាភិបាលនៃរដ្ឋបាលខេត្តត្បូងឃ្មុំ ក៏បានបង្ហាញ​ពីការប្រើប្រាស់ PDIA សម្រាប់បង្កើនការស្រាវជ្រាវរកអ្នកជំងឺទឹកនោមផ្អែម​នៅក្នុងតំបន់គ្របដណ្តប់របស់មណ្ឌលសុខភាព ៕

ដោយ ៖ ហេង សម្បត្តិ