សៀមរាប​៖លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធាន​ក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជន​សម្តេច​តេជោ (TYDA) កាលពីព្រឹកថ្ងៃទី១៥ ខែកញ្ញា ឆ្នាំ២០២៤ បានដឹកនាំក្រុម​គ្រូពេទ្យស្ម័គ្រចិត្តចុះពិនិត្យ និងព្យាបាល​ជំងឺជូនប្រជា​ពលរដ្ឋ នៅសង្កាត់​រុនតាឯក ក្រុងរុនតាឯកតេជោសែន ខេត្តសៀមរាប ។សកម្មភាពមនុស្សធម៌ដែលប្រព្រឹត្តទៅនៅក្នុងបរិវេណ បឋមសិក្សា-អនុវិទ្យាល័យ ហ៊ុន សែន រុនតាឯក ក្រុមគ្រូពេទ្យបានពិនិត្យចំនួន ៩ ២២៤ ករណី។

មានប្រសាសន៍នាឱកាសនោះ លោកជំទាវបណ្ឌិត ពេជ ចន្ទមុន្នី បានបញ្ជាក់ថា សម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា តែងតែយកចិត្តទុកដាក់គិតគូរអំពីសុខទុក្ខ និងសុខភាព​របស់បង​ប្អូនប្រជាពលរដ្ឋ តាមរយៈការបង្ខិតសេវាព្យាបាល ជូនប្រជាពលរដ្ឋ​ដោយឥតគិតថ្លៃ។ ជាក់ស្ដែងថ្ងៃនេះសមាគមគ្រូ​ពេទ្យ​ស្ម័គ្រចិត្តយុវជន​សម្ដេចតេជោ បានចុះពិនិត្យនិងព្យាបាលជំងឺ ជូនប្រជាពលរដ្ឋនៅក្នុង​តំបន់រុនតាឯកនេះ ដោយឥតគិត​ថ្លៃអ្វីទាំងអស់។

សកម្មភាពរបស់គ្រូពេទ្យនៅក្រុងរុនតាឯក បានពិនិត្យជំងឺទូទៅ, ជំងឺមាត់ធ្មេញ, ពិនិត្យអេកូ និងរោគស្រ្តី, ជំងឺបេះដូង, ពិនិត្យជំងឺភ្នែក, វះកាត់តូច, ជំងឺឫសដូងបាត, ជំងឺសន្លាក់, ជំងឺសើរស្បែក, ជំងឺត្រចៀក ច្រមុះ បំពងក, ថតកាំរស្មី, ពិនិត្យឈាម, និងបញ្ជូនទៅ​ព្យាបាល​បន្តក្នុង​ករណីមានជំងឺធ្ងន់ធ្ងរ ។ប្រជាពលរដ្ឋដែលអញ្ជើញមក​ទទួលសេវា​ពិនិត្យ និងព្យាបាលសុខភាពទាំងអស់ បានសម្តែង​ក្តីសប្បាយរីករាយ និងថ្លែង អំណរគុណជាអនេក ចំពោះលោកជំទាវ​បណ្ឌិត ដែលបាន​ដឹកនាំក្រុមគ្រូពេទ្យជំនាញ ចុះមកពិនិត្យ និងព្យាបាលសុខភាព​របស់ពួកគាត់ស្ទើរតែដល់ខ្នងផ្ទះ និងមិនមាន​ការបង់ថ្លៃអ្វីទាំងអស់។

សូមបញ្ជាក់ថា ក្រុមគ្រូពេទ្យ TYDA ព្យាបាលជំងឺទូទៅជូនប្រជាពលរដ្ឋ​ដោយគិតថ្លៃនាឱកាសនេះ ចំនួន ៩ ២២៤ ករណី។ ករណី​ឈឺធ្ងន់ធ្ងរ​ត្រូវ​បញ្ជូនមកព្យាបាលបន្តមានចំនួន ៥៨នាក់។ រាល់ការចំណាយ​ទាំងអស់ក្នុងសកម្មភាពនេះ គឺឧបត្ថម្ភដោយសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។ក្នុងឱកាសនោះ ក្រៅពីការពិនិត្យ និងព្យាបាលជំងឺ លោកជំទាវ​បណ្ឌិត ក៏បានចែកជូនកាបូប ស្ពាយ ដល់សិស្សានុសិស្សមួយចំនួន៕
ដោយ៖​ប៊ុន​រដ្ឋា