(ស្ទឹងត្រែង)៖ ឧត្តមសេនីយ៍ទោ ពង្ស ខេមរា នាយករង នៃនាយកដ្ឋានហិរញ្ញវត្ថុ នៃអគ្គ នាយកដ្ឋានភស្តុភារហិរញ្ញវត្ថុ ក្រសួងការពារជាតិ តំណាងឧត្តមសេនីយ៍ឯក លី កុសល រដ្ឋលេខាធិការក្រសួងការពារជាតិ បានអញ្ជើញជាអធិបតី ក្នុងសិក្ខាសាលាស្ដីពីការអនុវត្ត ថវិកាសមិទ្ធកម្ម ការគណនា តម្រូវការចំណាយ និងការរៀបចំរបាយការណ៍ហិរញ្ញវត្ថុ ដើម្បីចែករំលែកចំណេះដឹងជូនដល់នាយទាហាន ជំនាញហិរញ្ញវត្ថុ តាមបណ្ដាកងឯក​ភាពនានាចំណុះ កងយោធពលខេមរភូមិន្ទ កាលពីថ្ងៃទី១៤ ខែកញ្ញាឆ្នាំ ២០២៤ នាទី​រួមខេត្ត ស្ទឹងត្រែង ។

ឧត្តមសេនីយ៍ទោ ពង្ស ខេមរា នាយករង នៃនាយកដ្ឋាន ហិរញ្ញវត្ថុ បានលើកឡើងថា ការជួបជុំនេះមានសារៈសំខាន់ ក្នុងគោលបំណងពង្រីក និងពង្រឹងប្រសិទ្ធភាព នៃការ​អនុវត្ត ថវិកាសមិទ្ធកម្ម សំដៅផ្ដល់ឱកាសដើម្បីសិក្សាឈ្វេងយល់ និងដកបទពិសោធន៍ និងឧត្តមានុវត្តនិងការអនុវត្តជាក់ស្ដែង នៃការងារកែទម្រង់ការគ្រប់គ្រង​ហិរញ្ញវត្ថុសាធា​រណៈ ។

ឧត្តមសេនីយ៍ទោ ពង្ស ខេមរា បានបន្តថា ស្របតាមមាគ៌ា នៃកម្មវិធីកែទម្រង់ការគ្រប់​គ្រង​ហិរញ្ញវត្ថុសាធារណៈរបស់រាជរដ្ឋាភិបាល និងផ្អែកតាមបទពិសោធន៍ដ៏ល្អនៅកម្ពុជា ថវិកាសមិទ្ធកម្ម ត្រូវរៀបចំឡើងដោយការពង្រឹងកំណត់កាន់តែច្បាស់ជាងមុន នូវសូចនា​ករសមិទ្ធកម្ម តាមកម្រិតរចនាសម្ព័ន្ធកម្មវិធី ទាំងការកំណត់សូចនាករលទ្ធផលក្នុងឆ្នាំ ទាំងសូចនាករលទ្ធផលចុងក្រោយ ដែលក្រសួងគ្រោងនឹងសម្រេច ។

ថវិកាសមិទ្ធកម្មនេះ អាចផ្ដល់ភាពបត់បែន ក្នុងការបង្កើតរចនាសម្ព័ន្ធកម្មវិធី ដោយផ្អែក ឬមិនផ្អែកទាំងស្រុង ទៅលើរចនាសម្ព័ន្ធរដ្ឋបាល ប៉ុន្តែតម្រូវឲ្យមានការវាស់វែងប្រ​សិទ្ធ​ភាព និងភាពស័ក្តិសិទ្ធិ តាមរយៈសូចនាករសមិទ្ធកម្ម ដោយផ្សារភ្ជាប់រវាងលទ្ធផល ក្នុង​ឆ្នាំ និងលទ្ធផលចុងឆ្នាំ ឲ្យបានច្បាស់លាស់ ។

ឧត្តមសេនីយ៍នាយករង បានស្នើដល់អង្គសិក្ខាសាលា ផ្តោតលើការឈ្វេង​យល់​ចំណុច​គន្លឹះៗ និងលើកទឹកចិត្ត ដល់កម្មសិក្សាការី ចូលរួមស្តាប់ជាមួយគ្រូឧទ្ទេសាចារ្យ និងវា​គ្មិន ព្រមទាំងពិភាក្សា និងផ្លាស់ប្ដូរមតិយោបល់ ដើម្បីប្រមូល និងយកបទពិសោធន៍ មេ​រៀន​ល្អៗ ជាធាតុចូល សម្រាប់តម្រង់ទិសការអនុវត្តការងារឱ្យកាន់តែមានប្រសិទ្ធភាព ក្រោយពេលបញ្ចប់វគ្គសិក្សា ហើយនាំយកចំណេះដឹង ត្រឡប់ទៅបម្រើអង្គភាពរៀងៗ​ខ្លួនវិញ ដោយប្រសិទ្ធិភាព ៕

ដោយ ៖ វណ្ណលុក