(ភ្នំពេញ)៖ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងអ្នក​ឧក​ញ៉ា គិត ម៉េង សហប្រធានក្រុមការងារ កាលពីព្រឹកថ្ងៃទី១៦ ខែកញ្ញា ២០២៤ បាន​អញ្ជើញជាអធិបតីដឹកនាំកិច្ចប្រជុំក្រុមការងារផ្នែកសេដ្ឋកិច្ច សង្គមឌីជីថល និងទូរគមនា​គមន៍ (ក្រុមការងារ “ណ”) នៃវេទិការាជរដ្ឋាភិបាល-ផ្នែកឯកជន ដោយមានការអញ្ជើញ​ចូលរួមពី អនុប្រធាន សមាជិក សមាជិកា នៃក្រុមការងារអន្តរក្រសួង-ស្ថាប័ននៃរាជរដ្ឋាភិ​បាល និងវិស័យឯកជន សរុបប្រមាណ ១៥០នាក់ នៅសណ្ឋាគារ Hyatt Regency Phnom Penh។

កិច្ចប្រជុំនេះ មានគោលបំណងស្វែងយល់អំពីបញ្ហាប្រឈម និងក្តីកង្វល់នានា ព្រម​ទាំង​សំណូមពរ​ផ្សេងៗរបស់វិស័យឯកជន។ ជាមួយគ្នានេះ អង្គប្រជុំបានដោះស្រាយបញ្ហា​មួយ​ចំនួនចំពោះមុខ ដោយឡែកបញ្ហាផ្សេងទៀត ឯកឧត្តមរដ្ឋមន្ត្រី ជា វ៉ាន់ដេត សហប្រ​ធាន បានលើកទឹកចិត្តឱ្យបង្កើតអនុក្រុមការងារជាក់លាក់តាមអនុវិស័យនីមួយៗ ដោយ​មាន​សមាសភាពពីរដ្ឋនិងវិស័យឯកជន ដើម្បីស្វែងយល់បន្ថែម និងរកដំណោះស្រាយ​នៅ​ពេលបន្ទាប់។

កិច្ចប្រជុំភាពជាដៃគូនេះ ដែលនឹងប្រព្រឹត្តទៅនៅថ្ងៃចន្ទ ទី១៦ ខែកញ្ញា ឆ្នាំ២០២៤ នៅទី​សណ្ឋាគារ Hyatt Regency Phnom Penh។ កិច្ចប្រជុំនេះផងដែរនឹង​មានការចូលរួម​ពីសំណាក់សមាជិក សមាជិកា សភាពាណិជ្ជកម្មកម្ពុជា និងសមាជិកក្រុមការងារ “ណ” ផ្នែកឯកជន ព្រមទាំងថ្នាក់ដឹកនាំសំខាន់ៗ ពីស្ថាប័នរដ្ឋ និងឯកជន តំណាងក្រុមហ៊ុន សមាគមជាតិ និងអន្តរជាតិជាច្រើន។

គួរបញ្ជាក់ថា គោលបំណងនៃកិច្ចប្រជុំភាពជាដៃគូនេះ បានពិភាក្សាលើបញ្ហាដែល​បាន​លើក​ឡើងដោយវិស័យឯកជន រួមមាន៖ ១.បញ្ហាក្នុងវិស័យទូរគមនាគមន៍ ២.ការប្រើ​ប្រាស់​ប្រព័ន្ធបញ្ជរជាតិតែមួយ ៣. បទល្មើសបច្ចេកវិទ្យា ៤. តំបន់គ្របដណ្តប់សេវា​ប្រ​ព័ន្ធ អ៊ិនធើណេត និងសេវាទូរស័ព្ទនៅមិនទាន់ពេញលេញ និងហេដ្ឋារចនាសម្ព័ន្ធ​ទូរគម​នាគមន៍ ៥. កង្វះខាតធនធានមនុស្សដែលមានជំនាញក្នុងស្រុកលើវិស័យឌីជីថល ៦. ការរៀបចំ Cybersecurity and Data Privacy និងទី៧. ការទទួលស្គាល់ (Type Approval) លើបរិក្ខាវិទ្យុ គមនាគមន៍ និងបរិក្ខារទូរគមនាគមន៍ រៀបចំការបង់ថ្លៃ​សេវា​បន្ថែមទៅលើម៉ូ ឌែលគ្រឿងអេឡិត្រូនិច ដែលមានភ្ជាប់ សេវា Wifi & Blutooth និង​ការស្នើសុំវិញ្ញាបនបត្រទទួលស្គាល់គុណវុឌ្ឍិជាភ្នាក់ងារនំាចូលផ្គត់ផ្គង់ និងចែក​ចាយ​គ្រឿសម្ភារះបរិក្ខារ ទូរគមនាគមន៍ ៕

ដោយ ៖ ង៉ាន់ ទិត្យ
រូបភាព ៖ រិន រចនា