លោកជំទាវ អ៊ឹម រចនា លើកទឹកចិត្តឱ្យសមាគម នាវាយុវជនអាស៊ីអាគ្នេយ៍ ចូលរួមផ្សព្វផ្សាយអំពីផលិតផលសក្ដានុពលស្រូវរបស់កម្ពុជា
(ភ្នំពេញ)៖ លោកជំទាវ អ៊ឹម រចនា មន្រ្តីនាំពាក្យក្រសួងកសិកម្មបានលើកទឹកចិត្តដល់ក្រុម ប្រតិភូ យុវជន ផ្សព្វផ្សាយអំពីផលិតផលសក្ដានុពលរបស់ខ្មែរ ដូចជា អង្ករប្រណិតពូជផ្ការំដួល ដែលបានជាប់ជាអង្ករល្អបំផុត លើពិភព លោករហូតដល់ទៅ៥ដង និងអង្ករពូជសែនក្រអូប ដែលបានទទួល ពានរង្វាន់មាសពីប្រទេសចិន កាលពីចុងឆ្នាំ២០២៣ ក៏ដូចជា ផលិតផល គ្រាប់ស្វាយចន្ទី និងម្រេចជាដើម។
ការលើកឡើងពីសំណាក់មន្រ្តីជាន់ខ្ពស់រូបនេះធ្វើឡើងក្នុងពិធីជួបសំណេះ សំណាល ជាមួយគណៈប្រតិភូយុវជន តំណាងក្រសួងអប់រំ យុវជន និងកីឡា និងថ្នាក់ដឹកនាំសមាគមនាវាយុវជនអាស៊ីអាគ្នេយ៍កម្ពុជា នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ថ្លែងទៅកាន់តំណាងក្រសួងអប់រំ យុវជន និងកីឡា ថ្នាក់ដឹកនាំសមាគមន៍ នាវាយុវជនអាស៊ីអាគ្នេយ៍ និងប្រតិភូយុវជនចំនួន ១៦រូប ដែលនឹងត្រូវ ទៅចូលរួមកម្មវិធីនាវាយុវជនអាស៊ីអាគ្នេយ៍និងជប៉ុន លើកទី៤៨ ក្នុងខែវិច្ឆិកា ឆ្នាំ២០២៤ខាងមុខនេះ លោកជំទាវបានថ្លែងកោតសរសើរ និងលើកទឹកចិត្តដល់ប្អូនៗប្រតិភូយុវជន ឱ្យយកចិត្តទុកដាក់ចូលរួម គ្រប់សកម្មភាពរបស់កម្មវិធី ដើម្បីផ្លាស់ប្ដូរបទពិសោធនិងចំណេះដឹង ជាមួយប្រតិភូយុវជនមកពីប្រទេសអាស៊ាន និងជប៉ុន និងជាពិសេស ដើម្បីបង្ហាញថា យុវជនកម្ពុជាមានសមត្ថភាពនិងសក្ដានុពល មិនចាញ់យុវជននៃបណ្ដាប្រទេសផ្សេងទៀតឡើយ។
អតីតធ្លាប់ជាប្រតិភូយុវជននៃកម្មវិធីយុវជនអាស៊ីអាគ្នេយ៍និងជប៉ុន លើកទី៣៧ កាលពី១៤ឆ្នាំមុន លោកជំទាវបានណែនាំដល់ប្រតិភូយុវជន ប្រកាន់ខ្ជាប់ជានិច្ចនូវអាកប្បកិរិយាល្អ រក្សាសាមគ្គីភាពក្នុងក្រុមចេះ ស្រឡាញ់គ្នា រក្សាទំនាក់ទំនងល្អ ហើយត្រូវចេះចែករំលែក ចំណេះដឹង រវាងគ្នា ជាជាងយកឈ្នះគ្នា។
លោកជំទាវសង្កត់ធ្ងន់ថា នៅក្នុង កាលៈទេសៈណាក៏ដោយ ប្រតិភូយុវជនមិនត្រូវភ្លេចទេថា ខ្លួនគឺជាប្រតិភូ តំណាងឱ្យប្រជាជនខ្មែរទូទាំងប្រទេសចំនួន ១៧លាននាក់ ហើយត្រូវកសាងមិត្តឱ្យបានច្រើន ដើម្បីថ្ងៃអនាគតអាចក្លាយទៅ ជាដៃគូសហប្រតិបត្តិការដ៏ល្អ។
នៅក្នុងជំនួបសំណេះសំណាលនេះ លោកជំទាវក៏បានពន្យល់ប្រតិភូ យុវជន អំពីកម្មវិធីគោលនយោបាយអាទិភាពទី៥និង៦ សម្រាប់ វិស័យកសិកម្ម គឺការដាក់ពង្រាយមន្ត្រីបច្ចេកទេសកសិកម្ម ទៅគ្រប់ឃុំ-សង្កាត់ ដែលមានសកម្មភាពកសិកម្មនៅទូទាំងប្រទេស ដើម្បីជំរុញការ លើកកម្ពស់ផលិតភាពកសិកម្ម និងជួយដល់គ្រួសារកសិករក្នុង ការលើកស្ទួយផលិតផលកសិកម្ម និងប្រាក់ចំណូលរបស់ខ្លួន។
លោកជំទាវបញ្ជាក់ថា វិស័យកសិកម្ម មិនត្រឹមតែបានរួមចំណែក ធានាសន្តិសុខស្បៀងសម្រាប់កម្ពុជាប៉ុណ្ណោះទេ តែថែមទាំងអាចធានា នូវអធិបតេយ្យភាពស្បៀងសម្រាប់ប្រជាជនខ្លួន ហើយថែមទាំងមាន ស្បៀងសល់សម្រាប់ការនាំចេញដើម្បីរួមចំណែកជួយដល់សេដ្ឋកិច្ចជាតិថែមទៀត។
លោកជំទាវ ក៏បានជូនពរក្រុមប្រតិភូ យុវជនទាំងអស់ ទទួលបានជោគជ័យនៅក្នុងការចូលរួមកម្មវិធី នាវាយុវជនអាស៊ីអាគ្នេយ៍និងជប៉ុន លើកទី៤៨ នាពេលខាងមុខនេះ ទាំងសម្រាប់ប្រតិភូយុវជនផង និងសម្រាប់កិត្យានុភាពកម្ពុជា នៅក្នុង តំបន់ផង៕
ដោយ៖ម៉ាដេប៉ូ
