រតនគិរី៖ គណៈប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង និង​អង្កេត នៃព្រឹទ្ធសភា (គណៈកម្មការទី១) ដឹកនាំដោយ ឯកឧត្តម ងី ច័ន្ទ្រផល ប្រធានគណៈកម្មការ បានអញ្ជើញទៅកាន់ខេត្តរតនគិរី ដែល​ជាខេត្តភាគឦសាន។នៅសាលាខេត្តកាលពីព្រឹកថ្ងៃទី១៩ ខែ​កញ្ញា ឆ្នាំ២០២៤ឯកឧត្តមប្រធានគណៈកម្មការបានជួបពិភាក្សាការងារនិងស្តាប់សេចក្តីរាយការណ៍របស់​លោក ងិន ណែល អភិបាលរងខេត្ត តំណាង​ឯកឧត្តម ញ៉ែម សំអឿន អភិបាលខេត្តរតនគិរី។

បន្ទាប់ពីសេចក្តីរាយការណ៍របស់លោក ងិន ណែល , ឯកឧត្តម ងី ច័ន្ទ្រផល ប្រធានគណៈកម្មការទី១ព្រឹទ្ធសភាបានបញ្ជាក់ថា បេសក​កម្មនៅខេត្តរតនគិរីដើម្បីឈ្វេងយល់អំពីដំណើរការវិមជ្ឈការ និង​វិសហមជ្ឈការសិទ្ធិរបស់ជនជាតិដើមភាគតិចដែល ទទួលបាននូវ​កម្មសិទ្ធិដីសមូហភាព ,សិទ្ធិរបស់អ្នកជាប់ឃុំ ,ការអនុវត្តក្រមទាំង៤ និងការផ្សព្វផ្សាយព័ត៌មានទាក់ទងនឹងនៅ តំបន់ត្រីកោណអភិវឌ្ឍន៍​ក្នុងខេត្តរតនគិរី។

ឯកឧត្តមប្រធានគណៈកម្មការទី១ បានកោតសរសើរចំពោះរដ្ឋបាល​ខេត្តរតនគិរីដែលជានិច្ចកាលបានយកចិត្តទុកដាក់ ក្នុងការបម្រើសេវា និងខិតខំដោះស្រាយរាល់ការលំបាកជូនប្រជាពលរដ្ឋដោយឈរលើគោលការណ៍ច្បាប់។

សូមបញ្ជាក់ថា ក្នុងដំណើរបំពេញបេសកកម្មមកកាន់ខេត្តរតនគិរី គណៈ​ប្រតិភូគណៈកម្មការទី១នៃព្រឹទ្ធសភា បានអញ្ជើញ​ ចុះជួបសំណេះ​សំណាល​ជាមួយអាជ្ញាធរស្រុកអូរយ៉ាដាវ សមាជិកក្រុមប្រឹក្សា​ឃុំបរខាំ ឃុំប៉ាតេ ឃុំលំជ័រ សហគមន៍ ជនជាតិដើមភាគតិច,​អង្គការសង្គម​ស៊ីវិល​ជនជាតិដើមភាគតិចនិងប្រជាពលរដ្ឋដែលរស់នៅជាប់ព្រំដែនតំបន់ត្រីកោណអភិវឌ្ឍ និងបានអញ្ជើញទស្សនកិច្ចបង្គោលព្រំដែនលេខ២៩ និង៣០ ក្នុងតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) នៃ​ច្រកទ្វារ​អន្តរជាតិព្រំដែនអូរយ៉ាដាវ ដែលស្ថិតនៅភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរីផងដែរ៕
ដោយ៖ គតិ យុត្ត