វ៉ាស៊ីនតោន៖ ក្រុមហ៊ុនអាកាសចរណ៍ Delta Air Lines បានប្រកាសកាលពីថ្ងៃព្រហស្បតិ៍ថា ខ្លួនកំពុងផ្អាកជើងហោះហើរត្រង់រវាងទីក្រុង New York និងទីក្រុង Tel Aviv រហូតដល់ដំណាច់ឆ្នាំ២០២៤នេះ។

ក្រុមហ៊ុនអាកាសចរណ៍អាមេរិក Delta បានចូលរួមជាមួយក្រុមហ៊ុនអាកាសចរណ៍ដទៃទៀត ប្រកាសលុបចោល ឬផ្អាកជើងហោះហើរទៅកាន់ទីក្រុងនានានៅតំបន់មជ្ឈិមបូព៌ា ក្នុងនោះរួមទាំងទីក្រុងបេរូត និងតេហេរ៉ង់ ចំពេលផ្ទុះជម្លោះរវាងអ៊ីស្រាអែល និងក្រុមហេសបូឡា នៅលីបង់។

ក្រុមហ៊ុនអាកាសចរណ៍ Delta បាននិយាយនៅក្នុងសេចក្តីថ្លែងការណ៍មួយថា ជើងហោះហើរត្រង់របស់ Delta រវាងទីក្រុង New York-JFK និងទីក្រុង Tel Aviv នឹងត្រូវផ្អាករហូតដល់ថ្ងៃទី ៣១ ខែធ្នូ ដោយសារតែជម្លោះដែលកំពុងបន្តនៅក្នុងតំបន់។

អតិថិជនដែលរងផលប៉ះពាល់អាចកក់ជើងហោះហើររបស់ពួកគេឡើងវិញ រហូតដល់ថ្ងៃទី១ ខែមីនា ឆ្នាំ ២០២៥។ ការផ្អាកនេះមានន័យថា Delta ឥឡូវនេះបានផ្អាករាល់ជើងហោះហើរត្រង់រវាងសហរដ្ឋអាមេរិក និងអ៊ីស្រាអែល រហូតដល់ដំណាច់ឆ្នាំ ២០២៤ នេះអ្នកនាំពាក្យក្រុមហ៊ុនអាកាសចរណ៍ប្រាប់កាសែតបារាំង AFP។

ការភ័យខ្លាចផ្ទុះសង្រ្គាមដ៏ធំនៅតាមព្រំដែនភាគខាងជើងរបស់អ៊ីស្រាអែលបានកើនឡើង បន្ទាប់ពីឧបករណ៍ទំនាក់ទំនងរបស់ប្រតិបត្តិករហេសបូឡារាប់ពាន់គ្រឿងបានផ្ទុះនៅទូទាំងប្រទេសលីបង់ ដោយបានសម្លាប់មនុស្ស ៣៧នាក់ និងរបួសជិត ៣,០០០នាក់ទៀតក្នុងរយៈពេលពីរថ្ងៃ។

ទន្ទឹមគ្នា ក្រុមសកម្មប្រយុទ្ធដែលគាំទ្រដោយអ៊ីរ៉ង់ បានស្តីបន្ទោសលើអ៊ីស្រាអែល។ ក្រុមហ៊ុនអាកាសចរណ៍ដទៃទៀត រួមមាន Air France, Lufthansa និង Swiss ក៏បានផ្អាកជើងហោះហើរទៅកាន់ប្រទេសអ៊ីស្រាអែលបន្ទាប់ពីឧបទ្ទវហេតុនេះផងដែរ៕

ប្រភព៖ AFP ប្រែសម្រួលដោយ៖ ឈឹម ទីណា