បរទេស៖ នៅថ្ងៃចន្ទនេះ កាសែតថៃ The Nation បានចេញផ្សាយថា ស្ត្រីថៃបន្តរៀបការជាមួយជនបរទេសកាន់តែច្រើន ក្នុងនោះ មានចំនួន ១១,២៥៦នាក់ ក្នុងរយៈពេល៣ឆ្នាំចុងក្រោយ ហើយបើធៀបនឹងបុរសថៃ រៀបការជាមួយជនបរទេសជាស្ត្រីវិញ គឺមានត្រឹមតែ ១,៧៣៤នាក់ ខុសគ្នា ជាង៦ដង។

បើតាមប្រភពដដែល ទីក្រុងបាងកកនៅតែបន្តជាមជ្ឈមណ្ឌលសម្រាប់អាពាហ៍ពិពាហ៍ឆ្លងវប្បធម៌ ឬ ថៃរៀបការជាមួយបរទេស ក្នុងនោះ យោងតាមទិន្នន័យរបស់ក្រសួងមហាផ្ទៃ អាពាហ៍ពិពាហ៍ ជាង១០,០០០គូ រវាងជនជាតិថៃ និងជនបរទេស ត្រូវបានចុះបញ្ជី នៅឆ្នាំ២០២៣ កើនឡើង ១៥% ធៀបនឹងឆ្នាំ២០២២។

ការកើនឡើង នៃទំនាក់ទំនងឆ្លងវប្បធម៌ នៅក្នុងប្រទេសថៃ អាចបណ្តាលមកពីកត្តាជាច្រើន រួមទាំង បរិយាកាសពហុវប្បធម៌ ក្នុងប្រទេសស្ថិតនៅតំបន់អាស៊ីអាគ្នេយ៍មួយនេះ ព្រមទាំង ការកើនឡើងនៃទំនាក់ទំនងអន្តរជាតិ តាមរយៈវេទិកាណាត់ជួបតាមអ៊ីនធឺណិត ហើយចំណុចមួយទៀត អាចបណ្តាលមកពីការទាក់ទាញជាសកលរបស់ទីក្រុងបាងកក។ អ្នកជំនាញជឿជាក់ថា នៅពេលដែលទីក្រុងបាងកក បន្តធ្វើទំនើបកម្ម នោះនិន្នាការនៃអាពាហ៍ពិពាហ៍ឆ្លងវប្បធម៌ នឹងបន្តកើនឡើង នេះបើតាម The Nation ដដែល។

យ៉ាងណាមិញ ប្រភពមិនបានបញ្ជាក់អំពីសញ្ជាតិណាខ្លះ ដែលទាំងបុរសនិងស្ត្រីថៃរៀបការ ជាមួយនោះទេ៕

ប្រភពពី The Nation ប្រែសម្រួល៖ សារ៉ាត