កំពង់ឆ្នាំង៖សម្ដេចមហាមន្ត្រី គុយ សុផល ឧបនាយករដ្ឋមន្ត្រី និង​រដ្ឋមន្ត្រីក្រសួងព្រះបរមរាជវាំង លោកជំទាវ កែ ច័ន្នមុន្នី តំណាង​រាស្ត្រមណ្ឌលខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ឋិ អភិបាលខេត្ត​កំពង់ឆ្នាំងព្រមទាំងមន្ត្រីរាជការ ប្រជាពលរដ្ឋ ពុទ្ធបរិស័ទជិត
ឆ្ងាយ​យ៉ាងច្រើនកុះករកាលពីព្រឹកថ្ងៃទី២៥ ខែកញ្ញា បានអញ្ជើញ​ចូលរួម​ក្នុងពិធីកាត់ឫសសីមាព្រះវិហារ វត្តគំរាបរុក្ខារាម ដែលជាវត្ត​បុរាណមានចំណាស់ជាង៣០០ឆ្នាំ​ស្ថិតនៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។

ព្រះវិហារដែលទើបសាងសង់ថ្មីទាំងស្រុងបានប្រារព្ធពិធីបញ្ចុះខណ្ឌសីមារយៈពេល ២ យប់ ៣ ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែកញ្ញា ដែលជាព្រះរាជូបត្ថម្ភដ៏ថ្លៃថ្លារបស់សម្ដេចព្រះមហាក្សត្រីព្រះវរៈរាជមាតាជាតិខ្មែរ នរោត្តមមុនិនាថសីហនុ ជាទីគោរព​សក្ការៈដ៏ខ្ពង់ខ្ពស់បំផុត ដើម្បីប្រគេនព្រះសង្ឃគង់នៅក្នុងវត្តគំរាបរុក្ខារាម និងប្រជាពុទ្ធបរិស័ទ​សម្រាប់ជាទីគោរពប្រតិបតន៍សាសនា។

បើតាមការរំលឹករបស់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់​ឆ្នាំង  វត្តគំរាបរុក្ខារាមនេះ បានកសាងឡើងនៅ​មុនឆ្នាំ​១៧០៧  ក្នុងព្រះរាជ្ជកាល​ព្រះបាទ ស៊ីសុវត្ថិ មុនីវង្ស លើផ្ទៃដីដែលសម្បូរដោយ​ព្រៃឈើធំៗ។រហូតដល់ឆ្នាំ ១៧០៧ ពេលដែល​ខ្មែរមានសង្គ្រាមជា​មួយសៀម កុដិ ព្រះវិហារ ត្រូវបានឆាប់ឆេះខ្ទេចទាំងស្រុង។ក្រោយថ្ងៃរំដោះ៧ មករា ១៩៧៩ ទីតាំងវត្តចាស់ គឺសល់តែទីទួល​មួយ​ប៉ុណ្ណោះនៅឆ្នាំ២០០៩  ទើបពុទ្ធបរិស័ទស្រុកបរិបូណ៌ពិសេសពុទ្ធ​បរិស័ទ​ចំណុះជើងវត្តត្រពាំងចាន់ឯកភាពគ្នាកសាងវត្តគំរាបរុក្ខារាម នេះឡើងវិញ លើទីតាំង ដដែលតាមគំនិតផ្ដួចផ្ដើមរបស់ព្រះវិន័យ​ស្រុកបរិបូណ៌ព្រះនាម ជួប សុផល ព្រះគ្រូចៅអធិការវត្ត​ត្រពាំង​ចាន់​មកដល់បច្ចុប្បន្ន។

សម្ដេចមហាមន្ត្រី គុយ សុផល មានប្រសាសន៍សំដៅលើ​សំណង់​ព្រះវិហារដ៏ស្កឹមស្កៃ ដែលលេច​ត្រដែតនៅកណ្ដាល​វត្ត​ភ្នំគំរាប​រុក្ខារាមថា ជាគុណ​បំណាច់ដ៏ថ្លៃថ្លានិងសូមឧទ្ទិសមគ្គផលជូនសម្ដេចចៅហ្វាវាំង គង់ សំអុល អតីតឧបនាយក​រដ្ឋមន្ត្រី រដ្ឋមន្ត្រី​ក្រសួង​ព្រះបរមរាជវាំង ដែលសម្ដេចបានផ្ដួចផ្ដើមគំនិតយកទីតាំងវត្តអារាមនេះ ដើម្បីកសាង​បូជនីយដ្ឋានព្រះវិហារដ៏ស្កឹមស្កៃនេះ សម្រាប់​ប្រជាជាតិកម្ពុជាក្រោមការ​ដឹកនាំដ៏ប៉ិនប្រសប់របស់សម្ដេចតេជោ ហ៊ុន សែន ប្រធានព្រឹទ្ធសភា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

សម្ដេចមហាមន្ត្រី គុយ សុផល ក៏បានផ្ដាំផ្ញើដល់ប្រជាពលរដ្ឋ ពុទ្ធ​បរិស័ទ អាចារ្យ គណៈកម្មការវត្តនិងព្រះសង្ឃ សូមចូលរួមថែ​រក្សា​នូវសមិទ្ធផលថ្មីដែលកសាងបានយ៉ាងល្អឯកនេះ៕

ដោយ៖សុខ គឹមសៀន